ជីវិតកម្សាន្ដ

តារាកំប្លែងថៃ Ball ចេញមុខបំភ្លឺ ក្រោយសារព័ត៌មានផ្សាយព្រាតថា លោកស្លាប់ក្នុងឧបទ្ទវហេតុ

បានផុស

២ years មុន

នៅ

ថ្ងៃពុធ ៦ មីនា ២០២៤

ដោយ

តារាកំប្លែងថៃលោក Ball Chernyim បានចេញមុខស្រាយបំភ្លឺនិងចោតសួរទៅកាន់សាធារណជនថា ហេតុអ្វីបានបង្ហោះប្រមាថជីវិតអ្នកដទៃ ខណៈដែលបណ្ដាញសង្គមផ្សព្វផ្សាយព័ត៌មានព្រោងព្រាត ដោយសូមចូលរួមរំលែកទុក្ខចំពោះឧបទ្ទវហេតុ និងមរណភាពរបស់លោក។

យោងតាមការចុះផ្សាយពីសារព័ត៌មានកម្សាន្ត Sanook ដោយដកដ្រង់នូវសំណេររបស់តារាកំប្លែងដ៏មានប្រជាប្រិយភាពរូបនេះបានបង្ហោះលើគណនីផ្ទាល់ខ្លួន ដោយស្រាយបំភ្លឺការពិតឈប់ឲ្យទស្សនិកជនមានការយល់ច្រឡំទៀត បន្ទាប់ពីមានហេតុការណ៍ប្រមាថជីវិតលើរូបលោកផ្ទាល់។

សារបញ្ជាក់តាមរយៈគណនីបណ្ដាញសង្គមរបស់តារាកំប្លែងវ័យ៤៤ឆ្នាំបានបញ្ជាក់ថា “តើអ្នកបង្កើតព័ត៌មានក្លែងក្លែងនេះឡើងមក ក្នុងគោលបំណងអ្វី? ប៉ុន្តែយ៉ាងណា សូមអរគុណអ្នកទាំងអស់គ្នា ដែលឆាតមកសួរសុខទុក្ខនិងបារម្ភពីអាយុជីវិតរបស់ខ្ញុំ។ ខ្ញុំសូមបញ្ចាក់ប្រាប់ថា ខ្ញុំនៅទីនេះនៅឡើយទេ មិនបានស្លាប់ទៅណាដូចការផ្សាយបំភ្លើសលើបណ្ដាញសង្គមឡើយ។ ខ្ញុំមិនរីករាយនឹងរឿងនេះទាល់តែសោះ វាប្រៀបដូចជាការប្រមាថអាយុជីវិតខ្ញុំអ្នកផ្សាយនោះ ពិតជាអាក្រក់ណាស់”។

**រូបភាពដែលគេបានចុះផ្សាយព្រោងព្រាតលើបណ្ដាញសង្គម**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះផ្សាយនូវពត៌មានក្លែងក្លាយពេញបណ្ដាញអ៉ិនធើណេត កើតឡើងស្របពេលដែលរូបលោកបានបង្ហោះក្នុង Facebook កាលពី១ថ្ងៃមុន ក្នុង Caption ថា “កុំបាត់បង់ខ្លួនឯង ដោយសារតែភាពល្ងង់ខ្លៅរបស់មនុស្ស”។

ពាក់ព័ន្ធនឹងបញ្ហានេះ ក៏មានអ្នកគាំទ្រមួយចំនួនបានចូលមកលើកទឹកចិត្ត Ball Chernyim កុំឲ្យមានការខឹងចំពោះមនុស្សដែលហ៊ានលេងសើចនឹងអាយុជីវិតរបស់លោក។ ចំណែកអ្នកផ្សេងទៀតបានបញ្ចេញមតិថា បន្ទាប់ពីពួកគេឃើញព័ត៌មាននេះដំបូង ម្នាក់ៗពិតជាតក់ស្លុតខ្លាំង។ ប៉ុន្តែក្រោយបានដឹងពីសេចក្ដីបំភ្លឺរបស់លោកផ្ទាល់ គ្រប់គ្នាហាក់ធូរចិត្តនិងជូនពរឲ្យលោកសុខភាពល្អនិងសុខសប្បាយ។

ទោះជាយ៉ាងណា តារាកំប្លែងរូបនេះមិនបានបង្ហាញពីចេតនាថាតើនឹងមានវិធានការចំពោះអ្នកប្រព្រឹត្តអាក្រក់ដែលផ្សព្វផ្សាយព័ត៌មានមិនពិត និងបង្កការខូចខាតនេះដែរឬទេ? ដូច្នេះហើយទស្សនិកមានតែរង់ចាំមើលបន្តទៀតប៉ុណ្ណោះថា តើលោកនឹងចាត់ការបែបណាចំពោះជនខិលខូចទាំងនោះឲ្យរាងចាលម្ដង៕