ប្រើល្បិចចាស់ Kim Sae Ron បង្ហោះរូបជាមួយតារាប្រុសរូបនេះ រួចចុចលុបរូបទៅវិញ

ប្រិយមិត្តដែលនិយមតាមដានរឿងភាគកូរ៉េ ច្បាស់ជាស្គាល់តារាសម្ដែងស្រីវ័យក្មេង Kim Sae Ron ដែលនាងចូលសិល្បៈតាំងពីកុមារភាពមកម្ល៉េះ ហើយនាងក៏បានប្រលោកនៅក្នុងរឿងភាគជាច្រើនផងដែរ។ ដោយឡែក ប្រជាប្រិយភាពរបស់នាង ត្រូវបានលេចលង់ កាលពីឆ្នាំ ២០២២ បន្ទាប់ពីរូបនាងបានបង្កគ្រោះថ្នាក់មួយ ដែលបើកបរដោយស្ថានភាពស្រវឹង ហើយគេចវេសពីកន្លែងកើតហេតុ ហើយនាងត្រូវប្រឈមមុខច្បាប់យ៉ាងតឹងរឹង។

ថ្មីៗនេះ តារាសម្ដែងស្រី Kim Sae Ron បានទាក់ទាញចំណាប់អារម្មណ៍អ្នកលេងអ៉ិនធើណែតម្ដងទៀត ដោយនាងបានបង្ហោះរូបភាពជាមួយនឹងតារាសម្ដែងប្រុស ដែលជាតួឯកដ៏ល្បីល្បាញ Lee Jae Wook និង តារាសម្ដែងជាច្រើននាក់ទៀត រួចក៏ធ្វើការលុបរូបភាពនោះភ្លាមៗវិញ។

ទន្ទឹមនឹងនេះ គេបានដឹងថា រូបភាពនេះ គឺត្រូវបានថតនៅក្នុងពេលពួកគេបានសម្ដែងរឿង Kiss Sixth Sense។ មិនតែប៉ុណ្ណោះ នាងក៏បានបង្ហោះរូបជាមួយនឹងតារាប្រុស Woo Do Hwan និង Lee Sang Yi ក្នុងកំឡុងពេលថតរឿង Bloodhounds ដែលរឿងនេះ មិនអាចចាក់បញ្ចាំងបានទេ ក្រោយមានរឿងអាស្រូវរបស់ Kim Sae Ron ដែលជាតួឯកស្រី។

ផ្ទុយទៅវិញ បន្ទាប់ពីបង្ហោះមិនទាន់បានប៉ុន្មានផង នាងក៏បានលុបវិញភ្លាមៗ ដែលធ្វើឲ្យផ្ទុះការចាប់អារម្មណ៍ និងមានមតិជាច្រើនវាយប្រហារមកកាន់នាង។ ជាពិសេស គេបានរិះគន់ថា រូបនាងស្រេកឃ្លានការចាប់អារម្មណ៍ពីអ្នកកាសែត ហើយយោងតាមការបង្ហោះនេះ គេសន្មត់ថា Sae Ron ហាក់ដូចជាបង្ហាញតម្រុយថា ខ្លួនចង់ត្រឡប់មកសម្ដែងម្ដងទៀតផងដែរ។

ជាមួយគ្នានេះដែរ រូបនាងធ្លាប់បានធ្វើបែបនេះម្ដងមកហើយ ដោយនាងបានបង្ហោះរូបភាពយ៉ាងស្និតស្នាលជាមួយនឹងតារាប្រុស Kim Soo Hyun ដែលបង្កឲ្យមានការវែកញែកពេញបណ្ដាញសង្គម៕

Kim Sae Ron និង Kim Soo Hyun