មរណភាពតារាថៃ  Om Akapan បន្សល់ទុកប្រពន្ធកម្សត់​ បានត្រឹមអង្គុយយំអោបញាតិ

កាលពីថ្ងៃទី២២ ខែកញ្ញា ម្សិលមិញនេះ តារាសម្ដែងប្រុសដ៏ល្បីល្បាញប្រចាំប៉ុស្ដិ៍លេខ៧ថៃ លោក Om Akapan បានទទួលមរណភាពក្នុងវ័យ៣៩ឆ្នាំ មូលហេតុដោយសារជម្ងឺមហារីក។ អ្វីដែលធ្វើឲ្យមហាជនកាន់តែសង្វេគចិត្តនោះគឺ តារាប្រុសរូបនេះ បានលាចាកលោកចោល Daria Chefrug ដែលជាប្រពន្ធ ទុកឲ្យនៅកំព្រាម្នាក់ឯង។

ជាមួយគ្នានេះ គេបានឃើញភរិយារបស់ Om បង្ហាញក្ដីសោកសៅជាខ្លាំង ក្រោយអស់ស្វាមីដែលជាគូជីវិត នាងបានត្រឹមអង្គុយយំអោបសាច់ញាតិយ៉ាងកម្សត់។ យោងតាមប្រភពបានឲ្យដឹងថា សពរបស់តួឯកប្រុសរូបនេះ ទើបតែដឹកមកដល់កន្លែងធ្វើបុណ្យនៅវត្តថាត់ថង នាវេលាម៉ោង២រសៀលម្សិលមិញនេះ ដើម្បីប្រារព្ធពិធីទៅតាមប្រពៃណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេបានឲ្យដឹងទៀតថា Daria ភរិយារបស់តារាប្រុស Om គឺមិនងាយនឹងបង្ហាញមុខចំពោះសាធារណជននោះទេ ដោយការបង្ហាញមុខលើកនេះ ធ្វើឲ្យមហាជនមានភាពក្រៀមក្រំទៅកាន់ភរិយាលោកជាខ្លាំង និង យល់អារម្មណ៍នៃការបាត់បង់មនុស្សជាទីស្រឡាញ់ទៅឲ្យជម្ងឺមហារីកដ៏កាចសាហាវនេះ ពិតជាពិបាកធ្វើចិត្តមែនទែន។

យ៉ាងណាមិញ មហាជន និង មិត្តៗសិល្បៈជាច្រើនបន្ដបន្ទាប់ បានបង្ហាញនូវក្ដីសោកសង្រែក ចូលរួមរំលែកទុក្ខចំពោះការបាត់បង់តារាសម្ដែងប្រុសដ៏ឆ្នើម Om Akapan បន្សល់ទុកនូវស្នាដៃភាពយន្ដជាច្រើន ទុកឲ្យប្រិយមិត្តទស្សនាកន្លងមក។

គួរបញ្ជាក់ដែរថា តារាសម្ដែងប្រុសវ័យ៣៩ឆ្នាំរូបនេះ បានព្យាយាមតស៊ូជាមួយនឹង ជម្ងឺមហារីកនេះ អស់រយៈពេល២ឆ្នាំមកហើយ តាំងពីឆ្នាំ២០២២កន្លងមកនេះ ប៉ុន្ដែជាអកុសល លោកបានចុះចាញ់ជម្ងឺមួយនេះត្រឹមថ្ងៃទី២២ ខែកញ្ញា ឆ្នាំ២០២៤នេះ ឃ្លាតចាកពីលោកិយនេះ៕

ប្រភព៖ Kapook