ភរិយាតារាចម្រៀង ថុល លីណា មិនទាន់ដាច់អា ល័យពីស្វាមី ដង្ហើយប្រាថ្នាសុំជួបគ្រប់ជាតិ

គិតមកដល់ពេលនេះ ម្ចាស់បទ “យល់ច្រឡំថាគេស្រលាញ់យើង” លោក ថុល លីណា ចូលអនិច្ចកម្មរយ:ពេល ៨ថ្ងៃទៅហើយ ខណ:ភរិយាតារាចម្រៀងរូបនេះ នៅមិនទាន់ដាច់អាល័យពីស្វាមីនៅឡើយ និងដង្ហើយប្រាថ្នាចង់ជួបគ្នាគ្រប់ៗជាតិ។

ពិធីបុណ្យគម្រប់ខួប៧ថ្ងៃរបស់តារាចម្រៀងលោក ថុល លីណា បានរៀបចំរួចហើយកាលពីថ្ងៃទី១៥ខែតុលាឆ្នាំ២០២៤។តាមរយៈសំណេរលើបណ្តាញទំនាក់ទំនងសង្គម ភរិយា លោក ថុល លីណា បានរៀបរាប់ថា “៧ថ្ងៃបង អូនធ្វើរួចរាល់ហើយ ពេលនេះរូបកាយបងរលាយសូន្យសុងពីលោកនេះហើយ នៅសល់តែរូបថត ទង់ព្រលឹង និងធ្មេញដែលបងបន្សល់ទុកឲ្យអូនប៉ុណ្ណោះ” ។

អ្នកនាងនិយាយបន្តថា “បងស្ថិតនៅក្នុងការចងចាំ និងបេះដូងប្រពន្ធជារៀងដ៏រាបរហូតដល់ថ្ងៃអូនមរណាអរគុណក្តីស្រលាញ់ និងការលះបង់ ៣ឆ្នាំ សម្រាប់អូន”។ ភរិយាលោក ថុល លីណា រម្លឹកទៀតថា រយ:ពេល៨ថ្ងៃហើយដែលស្វាមីចាកចេញពីខ្លួនគ្មានថ្ងៃត្រឡប់ ហើយអ្នកនាងនៅតែពិបាកទទួលយកបំផុតនៃការចាកចេញរបស់ស្វាមី។

អ្នកនាង តាតា បន្តទៀតថា “មិនដឹងថ្ងៃណាទើបអ្នកនាងអាចទទួលយកការពិតនេះបានទេ ស្រលាញ់គ្នាសុខៗ និងហូបបាយជាមួយគ្នារាល់ថ្ងៃ ស្រាប់តែមច្ចុរាជផ្ដាច់សង្ខាពង្រាត់ស្វាមីពីទ្រូងដោយគ្មានថ្ងៃវិលត្រឡប់ឡើយ។ អ្នកនាងបន្ថែមថា ផលបុណ្យដែលយើងបានធ្វើរួមគ្នាកន្លងមកអូនសុំប្រាថ្នាជាគូគ្រងនឹងបងគ្រប់ៗជាតិ ស្រលាញ់គ្នាដល់ចាស់ចាស់ជរារៀងខ្លួន”។

គួរបញ្ជាក់ថា អ្នកសិល្ប:បង្ហាញក្តីរន្ធត់គ្រប់ៗគ្នា បន្ទាប់ទទួលដំណឹងដ៏សោកសៅ នៃមរណភាពតារាចម្រៀងប្រុសលោក ថុល លី​ណា អតីតបេក្ខភាកម្មវិធី Cambodian Idol​ និង X Factor Cambodian​ ក្រោយជួបគ្រោះថ្នាក់ចរាចរណ៍បណ្តាលឲ្យស្លាប់បាត់បង់ជីវិតទាំងវ័យក្មេង កាលពីយប់ថ្ងៃទី០៩ខែតុលាឆ្នាំ២០២៤ នៅម្តុំស្វាយរលំខេត្តកណ្តាល៕ អត្ថបទ៖ ចាន់រ៉ា