រឿង Squid Game 2 មានតារាប្រុសម្នាក់ ដែលធ្លាប់ជាជនល្មើសផ្លូវភេទលើអនីតិជន

ដូចដែលដឹងស្រាប់ហើយថា រឿងភាគកូរ៉េដ៏ល្បីល្បាញ Squid Game បានកំណត់ថ្ងៃចាក់បញ្ចាំងវគ្គ២​ របស់ខ្លួន នៅក្នុងកម្មវិធី Netflix នៅថ្ងៃទី២៦ ខែធ្នូរ ខែក្រោយនេះហើយ។ ជាមួយគ្នានេះ គេបានចាប់អារម្មណ៍ជាខ្លាំង ជាមួយនឹងតួអង្គថ្មីៗ ដែលចូលរួមសម្ដែងដែលមានដូចជា T.O.P​ ដែលជាអតីតសមាជិកក្រុម Big Bang, តារាស្រី Jo Yuri និង តួឯកប្រុស Lim Si Wan ដែលអ្នកទាំងបី សុទ្ធតែមកពីវិស័យ K-pop។

ទន្ទឹមនឹងក្ដីរំភើបជាមួយនឹងតួអង្គសម្ដែងល្បីៗនោះ គេក៏បានប្រទះឃើញតារាប្រុសម្នាក់ ដែលធ្លាប់ត្រូវបានកាត់ទោសជាជនល្មើសរំលោភផ្លូវភេទ លោក Song Young Chang ដែលលោកបាត់មុខពីវិស័យសិល្បៈកូរ៉េ និង​មិនត្រូវបានគេផ្ដល់តម្លៃឲ្យលោកនោះទេ។

កាលពីឆ្នាំ២០០០ តារាប្រុស Song Young Chang ត្រូវបានជាប់ទោសពីបទរំលោភអនិតិជន ដែលនាងទើបតែមានអាយុ១៦ឆ្នាំប៉ុណ្នោះ។ គេបានឲ្យដឹងថា រូបលោកបានចំណាយលុយ១៥០ដុល្លារ ដើម្បីជួលក្មេងស្រីមិនទាន់គ្រប់អាយុទៅធ្វើការរួមភេទនៅក្នុងឡាន បានសម្រេច២ដង។

លោក ត្រូវបានតុលាការកាត់ទោសឲ្យជាប់ពន្ធនាគារចំនួន១០ខែ រួមជាមួយនឹងស្ថិតក្រោមការសង្កេតមើលរយៈពេល២ឆ្នាំផងដែរ។ មិនតែប៉ុណ្ណោះ តារាប្រុសវ័យ៦៦ឆ្នាំរូបនេះ ត្រូវបានគេស្គាល់ថា ជាតារាកូរ៉េដំបូង ដែលជាប់ឈ្មោះជាជនល្មើស បទរំលោភក្មេងមិនទាន់គ្រប់អាយុ មុនគេនៅក្នុងប្រវត្តិសាស្ត្រវិស័យសិល្បៈកូរ៉េ។

យ៉ាងណាមិញ ក្រោយពីបាត់មុខពីសិល្បៈយូរគ្រាន់ដែរ លោកក៏បានបន្ដអាជីពជាតារាសម្ដែង នៅក្នុងភាពយន្ដកូរ៉េជាបន្ដបន្ទាប់ ហាក់ដូចជាគ្មានប្រវត្តិឧក្រិដ្ឋនោះឡើយ ចំណែកឯអ្នកទស្សនាក៏មិនបានចាប់អារម្មណ៍ផងដែរ។ ដោយឡែក នៅក្នុងរឿង Squid Game 2 នេះ លោក Song Young Chang ត្រូវបានគេចាប់អារម្មណ៍ និងជីកកកាយរឿងរ៉ាវអតីតរបស់លោក។

បើទោះបីជាយ៉ាងនេះក្ដី វាមិនបានប៉ះពាល់ដល់ការចាក់បញ្ចាំងរឿងនេះនោះទេ ក៏ព្រោះតែរឿងរ៉ាវឧក្រិដ្ឋកម្មរបស់លោកបានកន្លងផុតទៅ២៤ឆ្នាំទៅហើយ៕

ប្រភព៖ Koreaboo