ម៉ា ដូណា ទម្លាយថា ខ្លួនមានបញ្ហាផ្លូវចិត្តធ្ងន់ធ្ងរ នៅពីក្រោយរូបភាពជោគជ័យ និងស្នាមញញឹម

តារាសម្តែងនិងកំប្លែងលោក ម៉ា ដូណា បានទម្លាយឲ្យដឹងថា លោកមានបញ្ញាផ្លូវចិត្តធ្ងន់ធ្ងរនៅពីក្រោយរូបភាពជោគជ័យនិងស្នាមញញឹម ខណ:លោករម្លឹកដែរថា ខ្លួនចង់វិលទៅរកអតីតកាលនៅបន្ទប់ជួលត្រឹមតម្លៃ ១០ដុល្លារ ដូចមុន។

គិតមកដល់ពេលនេះ លោក ម៉ា ដូណា បានចូលប្រឡូកក្នុងអាជីពសិល្បៈ រយ:ពេលប្រមាណជា ២០ឆ្នាំ ហើយ ដោយកន្លងមក គឺលោកបានតស៊ូធ្វើការតាំងពីប្រាក់ខែតិចតួច រហូតមានប្រាក់ចំណូលច្រើនជាមួយអាជីពសិល្ប: និងការប្រកបមុខរបររកស៊ីផ្ទាល់ខ្លួនផងដែរ។ ប៉ុន្តែក្រោយមកក៏ផ្ទុះរឿងរ៉ាវជំពាក់បំណុលគេជាងកន្លះលានដុល្លារផងដែរ។

កន្លងមក លោក ម៉ា ដូណា ធ្លាប់តែបង្កភាពរីករាយដល់សាធារណជន ប៉ុន្តែម្សិលមិញនេះ លោកស្រាប់តែបង្ហាញអារម្មណ៍សោកសៅរបស់លោក ដោយបញ្ជាក់បែបនេះថា “មិនលាក់បាំងអី្វទេ ខ្ញុំមានបញ្ហាផ្លូវចិត្តធ្ងន់ធ្ងរនៅពីក្រោយរូបភាពជោគជ័យនឹងស្នាមញញឹមរបស់ខ្ញុំ គឺមិនមែនជាឥន្ធនូពិតឡើយ ខ្ញុំនឹកអតីតកាលរបស់ខ្ញុំណាស់ ចង់វិលត្រឡប់នៅបន្ទប់ជួល១ខែ ១០ដុល្លារ វិញណាស់“។

តាមរយ:ការទម្លាយខាងលើនេះ ក៏ឃើញមានការលើកទឹកចិត្តពីសំណាក់អ្នកគាំទ្រ និងមិត្តភក្តិក្នុងរង្វង់សិល្ប:ជាមួយលោកផងដែរ។

អ្នកគាំទ្រកត់សម្គាល់ដែរថា លោក ម៉ា ដូណា ចាប់តាំងពីជួបរឿងរ៉ាវជំពាក់បំណុលគេជាងកន្លះលានដុល្លារមក តារារូបនេះបានខិតខំប្រឹងប្រែងរកលុយទាំងយប់ទាំងថ្ងៃ ដើម្បីដោះស្រាយបំណុលគេ ខណ:ដែលកន្លងមកលោកបានយកទ្រព្យសម្បត្តិ ផ្ទះវីឡា ខុនដូរ ដី ឡាន គ្រឿងពេជ្រទៅលក់អស់ពីខ្លួនដើម្បីសងទៅម្ចាស់បំណុលផងដែរ៕ អត្ថបទ៖ ចាន់រ៉ា