ដេត ស្រីនាឌ នៅតែរងការរិះគន់ធ្ងន់ៗ ខណៈត្រៀមបកស្រាយ រឿងដកខ្លួនមិនចូលរួមប្រកួត MPI ថ្ងៃនេះ

បើទោះបីជាអតីតបវរកញ្ញាតំណាងកម្ពុជា ដេត ស្រីនាឌ បានប្រកាសត្រៀមបកស្រាយជុំវិញបញ្ហា ដែលកញ្ញាប្រកាសដកខ្លួនមិនចូលរួមប្រកួតកម្មវិធី Miss Planet Internation 2024 នៅថ្ងៃប្រឡងក្នុងវគ្គផ្តាច់ព្រ័ត្រ កាលពីថ្ងៃទី២៧ ខែវិច្ឆិកា ឆ្នាំ២០២៤ កន្លងទៅ ក៏ដោយ មហាជននៅតែសម្តែងការពេញចិត្ត។

ក្រោយផ្ទុះការវែកញែកនិងរិះគន់ពាក់ព័ន្ធរឿងរ៉ាវ ដែលបវរកញ្ញារូបនេះ ប្រកាសដកខ្លួនមិនចូលរួមប្រកួតកម្មវិធី Miss Planet Internation 2024 សាមុីខ្លួន កាលពីម្សិលមិញ ក៏បានប្រកាសថានៅថ្ងៃទី៣០ វិច្ឆិកានេះ នឹងធ្វើការបកស្រាយចំពោះចម្ងល់បន្តិចបន្តួច តាមសំណូមពរអ្នកគាំទ្រខ្លួន។

តាមរយៈសារកាលពីល្ងាចថ្ងៃទី២៩ ខែវិច្ឆិកា ឆ្នាំ២០២៤ កញ្ញា ដេត ស្រីនាឌ បានចេញមកបញ្ជាក់ថា “ពី​ដំបូង​គិត​ថា​មិន​និយាយ​អ្វី​ទាំង​អស់​ សុខ​ចិត្ត​ខាំ​មាត់​សង្កត់​ចិត្ត​យំ​តែ​ម្នាក់​ឯង ថ្ងៃ​ស្អែក​នេះ​នាង​ខ្ញុំ​ នឹង​មាន​ការ​បកស្រាយ​បន្តិច​បន្តួច​តាម​សំណូមពរ​របស់​ពុក​ម៉ែ​បបងប្អូនដែល​គាំទ្រ​នាង​ខ្ញុំ​”។

បើទោះបីជាមានការប្រកាសនេះក៏ដោយ សាធារណជនមួយចំនួន ក៏នៅបន្តការវែកញែកនិងសម្តែងការមិនពេញចិត្ត ដោយអ្នកខ្លះថា មិនចង់ដឹងពីហេតុផលរបស់បវរកញ្ញារូបនេះឡើយ និងខ្លះទៀតនៅតែបន្តចោទសួរធ្ងន់ៗ លើការសម្រេចចិត្តនោះ ដោយការប្រើពាក្យ “ពហិការ” ទៅវិញ។ យ៉ាងណាមិញ ជុំវិញរឿងរ៉ាវនេះ កញ្ញា ដេត ស្រីនាឌ នឹងធ្វើការបកស្រាយផងដែរនៅថ្ងៃនេះ៕