ដេត ស្រីនាឌ សន្យាបន្តផលិតមាតិកាផ្សព្វផ្សាយតំបន់ទេសចរណ៍ វប្បធម៌ អរិយធម៌ ទៅកាន់ពិភពលោក

ស្របពេលដែលអាជីពសិល្ប:កំពុងមានការមមារញឹកគួរសម បវរកញ្ញាកម្ពុជា ដេត ស្រីនាឌ បានធ្វើឱ្យមហាជនអ្នកគាំទ្រកាន់តែមានការសរសើរ និងចាប់អារម្មណ៍លើសកម្មភាពផ្សព្វផ្សាយវប្បធម៌ និងទេសចរណ៍ ខណ: ស្រីនាឌ ក៏បានអះអាងនូវឆន្ទ:របស់ខ្លួន ថានឹងបន្តធ្វើវីដេអូមាតិការផ្សព្វផ្សាយអំពីតំបន់ទេសចរណ៍ និងវប្បធម៌ ទៅកាន់ពិភពលោកបន្ថែមទៀត។

ជាការពិត កញ្ញា ដេត ស្រីនាឌ បានសម្រេចក្ដីស្រមៃរបស់ខ្លួនម្ដងទៀតលើវិស័យបវរកញ្ញា ដោយចូលខ្លួនប្រកួតដណ្ដើមបានជ័យលាភី និងបានគ្រងមកុដក្នុងកម្មវិធី Miss Lakamo Cambodia 2025 កាលពីថ្ងៃទី១៣ ខែកក្កដាឆ្នាំ២០២៥ កន្លងទៅ។ បន្ទាប់ពីមានឱកាសគ្រងមកុដបវរកញ្ញា ពេលកញ្ញាកំពុងសាងកេរ្តិ៍ឈ្មោះជាថ្មីឡើងវិញលើវិស័យ មួយនេះ។

តាមរយៈសារពីទំព័រហ្វេសប៊ុក កញ្ញា ដេត ស្រីនាឌ បង្ហាញការតាំងចិត្តថា “នាងខ្ញុំ ដេត ស្រីនាឌ នឹងសន្យាថានៅតែបន្តធ្វើវីដេអូមាតិកាផ្សព្វផ្សាយពីតំបន់ទេសចរណ៍ វប្បធម៌ អរិយធម៌ ទៅកាន់ពិភពលោក”។

គួររម្លឹកថាកញ្ញា ដេត ស្រីនាឌ កាលពីថ្មីៗកន្លងទៅ បានបញ្ចប់បេសកកម្មរបស់ខ្លួនយ៉ាងរលូនក្នុងការតំណាងកម្ពុជាចូលរួមប្រកួតលើឆាកអន្តរជាតិ Miss Charm 2025 នៅឯប្រទេសវៀតណាមកាលពីអំឡុងដើមខែធ្នូ ឆ្នាំ២០២៥៕ ដោយ៖ចាន់រ៉ា