តាចេក រំពឹងមានអ្នកហៅកំប្លែងតាមរោងការ កំដរជីវិតចុងក្រោយ ខណៈឱកាសសម្តែងទើបថតបានមួយរឿងថ្មីៗ

តារាកំប្លែងជើងចាស់លោក ឈុំ ប៊ុនឈឿន ហៅ តាចេក ទោះបីបច្ចុប្បន្ននេះ លោកមានជីវភាពលំបាកខ្វះខាតយ៉ាងណា តែដើម្បីចិញ្ចឹមជីវិតចុងក្រោយគាត់ត្រូវតែខំប្រឹងតស៊ូ ទោះជួបការលំបាកឬឆ្លងកាត់ជីវិតកម្សត់បែបណាក៏ដោយនោះ។

តារាកំប្លែងលោកតា ចេក បានប្រាប់ឲ្យដឹងថា បច្ចុប្បន្នក្រៅពីការលក់បន្លែនៅខាងស្រុកពារាំងខេត្តព្រៃវែងលោកក៏ចាប់ផ្តើមមានគេហៅចេញច្រៀងនិង កំប្លែងតាមរោងការ១រោងឬ២រោងផងដែរ។ ប៉ុន្តែពុំមានច្រើនរោងដូចអ្នកសិល្ប:ផ្សេងៗទៀតឡើយ។

លោកតា ចេក បាននិយាយទៀតថា លោកមិនតូចចិត្តអ្វីទេគ្រាន់តែចង់ស្នើសុំដល់បណ្តាលក្រុមភ្លេងខ្មែរ ឬម្ចាស់ដើមការបើអាចត្រឹមឱកាសហៅទៅកំប្លែង ឬច្រៀងនៅក្នុងពិធីមង្គលការផងដើម្បីកំដរជីវិតចុងក្រោយក្នុងវិស័យសិល្ប:។លោកបន្តថាក្នុងខែនេះទើបចេញ លេងបានប្រមាណ ២ ឬ ៣រោងប៉ុណ្ណោះ។

ដោយឡែកនៅលើទំព័រហ្វេសប៊ុករបស់តារាកំប្លែងជើងចាស់រូបនេះ ក៏បានបង្ហោះសកម្មភាពច្រៀង និងកំប្លែងនៅតាមពិធីមង្គលការផងដែរ។ តាចេក បានបញ្ជាក់ដែរថា ថ្ងៃទី១៤.៣.២០២៥ មកលេងភ្លេងការនៅជិតវត្តបាក់ដាវបានមួយៗហើយគ្រាន់កំដរជីវិតចុងក្រោយក្នុងវិស័យសិល្ប:វប្បធម៌និងប្រពៃណីទំនៀមទម្លាប់របស់ខ្មែរ។

តារាកំប្លែងជើងចាស់លោកតាចេក ក៏ធ្លាប់បានបញ្ជាក់ប្រាប់កម្ពុជាថ្មីដែរថា លោកពិតជាសោកស្តាយជំនាញអាជីពសិល្ប:ដែលបានសាងឡើងជាង ៥០ឆ្នាំ ប៉ុន្តែចុងក្រោយត្រូវបាត់បង់ទៅវិញស្ទើរគ្មានអ្នកស្គាល់ ពិសេសក្មេងៗជំនាន់ក្រោយ។ ក្នុងលោកតាក៏ស្នើអ្នកសិល្ប:បើមានការងារថត ឬសម្តែងជួយហៅលោកទៅសម្តែងផង ដើម្បីបានលុយដោះស្រាយជីវភាពនិងចិញ្ចឹមជីវិត៕ អត្ថបទ៖ ចាន់រ៉ា