នាយ ក្រឹម បញ្ជាក់ច្បាស់ៗករណីសង្ស័យថាលោកនិងក្រុមកំប្លែងពាក់ព័ន្ធនឹង ស្រីពីន

តារាកំប្លែងជើងចាស់ នាយ ក្រឹម អះអាងថា លោកនឹងក្រុមការងាររបស់ខ្លួនពុំមានពាក់ព័ន្ធនឹង ស្រីពីន ទេ​ ខណៈតារាកំប្លែងស្រីរូបនេះកំពុងសង្ស័យថាបានឆ្លងវីរុស ក្រោយម្ដាយបានស្លាប់ដោយសារជំងឺកូវីដ-១៩។

តាមរយៈទំព័រហ្វេសប៊ុករបស់លោក ហេង ឡុង នាយ ក្រឹម បានបញ្ជាក់ពីពេលវេលាដែលលោកនិង​ស្រីពីនរួមជាមួយម្ដាយ​បានជួបគ្នា មុនពេលនាងត្រូវបានគ្រូពេទ្យយកសំណាកទៅពិនិត្យ។

នាយ ក្រឹម បានឱ្យដឹងថា ក្នុងកម្មវិធីសំណើចចុងសប្ដាហ៍ដែលលោកបាទទទួលនិពន្ធ និងដឹកនាំថត លោកពិតជាបានបានហៅតារាកំប្លែងមួយចំនួនក្នុងនោះក៏មាន ស្រីពីន និងម្ដាយផងដែរ  ដែលកាលណោះគឺ​ថតនៅនឹងថ្ងៃទី ៤ ខែមីនា ឆ្នាំ ២០២១ សម្រាប់ចាក់ផ្សាយថ្ងៃអាទិត្យទី ៧ ខែឆ្នាំដដែល។

លុះដល់ថ្ងែទី៧ ខែមីនា ឆ្នាំ ២០២១ ស្រីពីនបានទទួលថត MV ឱ្យផលិតកម្មហង្សមាស ជាមួយអ្នកនាង សួស វីសា។ ក្រោយត្រឡប់មកពីថតវិញ ស្រីពីនបានប្រាប់ក្នុងគ្រុប LiNE សំណើចចុងសប្ដាហ៍ថា នាងមានអាការក្ដៅខ្លួន ហើយក្អក និងផ្ដាសាយផង។

ពេលនោះ សមាជិកក្នុងក្រុមក៏បានឆាតប្រាប់ឱ្យនាងផឹកថ្នាំ ហើយហាមកុំចេញក្រៅផ្ទះ ដើម្បីការពារក្រែងលមានបញ្ហាអ្វីកើតឡើង ហើយនាងក៏ធ្វើតាមការណែនាំរបស់មិត្តរួមក្រុម។

រហូតដល់ថ្ងៃទី ៨-៩ ខែមីនា ឆ្នាំ ២០២១ មានក្រុមតារាហង្សមាសផ្ទុះជំងឺកូវីដ-១៩ ហើយអ្នកនាង សួស វីសា ក៏បានធ្វើតេស្តរកមេរោគលើកទី១ តែអវិជ្ជមាន និងលើកទី២ អវិជ្ជមានម្ដងទៀត។ ទើបតែមកដល់ថ្ងៃទី ២២ ខែមីនា តារាចម្រៀងរូបនេះបានរកឃើញឆ្លងវីរុសកូវីដ-១៩។

នៅក្នុងការបញ្ជាក់លើបណ្ដាញសង្គមពីប្រភពដដែលបន្តថា រយៈពេលនោះដែរ ស្រីពីន បានឆាតក្នុងគ្រុបថា ម្ដាយនាងបានឈឺ ហើយនាងក៏បានយកម្ដាយទៅពេទ្យឯកជនសម្រាកមួយរយៈខ្លី។ ប៉ុន្តែក្រោយការណែនាំពី នាយ ក្រឹម នាងបានបញ្ចូនម្ដាយទៅពេទ្យរុស្ស៊ីនៅថ្ងៃទី ២០ ខែមីនា។ រយៈពេលតែ ៤ ថ្ងែប៉ុណ្ណាះ មកដល់ថ្ងៃទី ២៣ ខែមីនា ម្ដាយស្រីពីនក៏បានស្លាប់។ ចំណែក ស្រីពីន កំពុងរង់ចាំលទ្ធផលធ្វើតេស្តនៅមន្ទីរពេទ្យរុស្ស៊ីនៅឡើយ។

នាយ ក្រឹម បន្ថែមថា​ រយៈពេល ២០ ថ្ងៃហើយ លោកនិងក្រុមកំប្លែង មិនបានជួបមុខស្រីពីន នឹងម្ដាយនោះទេ។ ដូច្នេះចំពោះការសង្ស័យថាលោកបានពាក់ព័ន្ធនឹង ស្រីពីន ពុំមែនជាការពិតឡើយ។ រីឯសមាជិកក្រុមកាងារក៏គ្មានបញ្ហាសុខភាពប្រែប្រួលអ្វីដែរ ពោលគឺសុខភាពល្អធម្មតា៕

អត្ថបទ៖ សន្យា

ចុចអាន៖ មិន​ដល់​១​សប្តាហ៍​ផង​ម្តាយ​តារា​ស្រី​២​រូប​ស្លាប់​ដោយ​សារ​កូ​វីដ​-១៩

ចុចអាន៖ ដំណឹង​ល្អ​សម្រាប់​អ្នក​គាំទ្រ! លីវ ជីលី ឈរ​លេខ​រៀងទី១ ក្នុង​ឈុត​ហែល​ទឹក ចំណោម Top 10