លោក លៀក លីដា យល់ថា បើផលិតករទុកវិស័យភាពយន្តដើម្បីតែរកប្រាក់ចំណេញ វិស័យនេះនឹងថយក្រោយ

ផលិតករភាពយន្តរបស់ខ្មែរដ៏ល្បីឈ្មោះលោក លៀក លីដា បានបញ្ចេញទស្សន:ក៏ដូចជាខ្លឹមសារដាស់តឿនដល់បណ្តាផលិតករខ្មែរថា បើសិនជាពួកគេចាត់ទុកវិស័យភាពយន្តជាកន្លែងរកប្រាក់ចំណេញ គឺវិស័យនេះនឹងត្រូវបានគេមើលងាយ។

ថ្វីដ្បិតតែជោគជ័យភាពយន្តខ្នាតធំរបស់ខ្លួនរឿង “ភ្លើងឆេះក្លឹបក្រោមដី” ប៉ុន្តែកន្លងមកលោក លៀក លីដា ដែលជាផលិតករនិងថៅកែផលិតកម្ម LD នៅតែបញ្ចេញទស្សន:ដោយយល់ឃើញថា វិស័យភាពយន្តជាតិ នឹងដើរថយក្រោយក្នុងឆ្នាំ២០២៥ នេះ។

ការលើកឡើងរបស់ផលិតករភាពយន្តរូបនេះ គឺដោយសារលោកមើលឃើញពីសញ្ញាថា ពុំទាន់ឃើញមានបណ្តាផលិតកម្ម ឬផលិករភាពយន្តណាមួយ បង្ហាញពីឆន្ទ:ក្នុងការចំណាយដើមទុន ដើម្បីផលិតរឿងធំៗ ឬតាមបែបស្តង់ដាសម្រាប់ប្រកួតប្រជែងទីផ្សារក្រៅស្រុកនៅឡើយទេ។

ជាមួយគ្នានេះដែរ លោក លៀក លីដា បានលើកឡើងថា “នៅពេលដែលផលិតករចាត់ទុកវិស័យមួយនេះ (ភាពយន្ត) ជាកន្លែងរកប្រាក់ចំណេញតែមួយមុខគត់នោះ ប្រាកដណាស់វិស័យនេះនឹងត្រូវបានគេមើលងាយ”។ ក្នុងនោះដែរក៏មានការបញ្ចេញមតិមួយចំនួន ខណ:គាំទ្រនិងខ្លះទៀតយល់ថា ប្រាក់​ចំណេញ​ពិត​ជាតម្រូវការ តែ​អ្វីដែល​សំខាន់​គឺ​គុណភាព​នៃ​ភាពយន្ត​។

គួររម្លឹកដែរថា ប្រធានសមាគមផលិតករភាពយន្តខ្មែរ និងជាអ្នកដឹកនាំសម្តែងលោក លៀក លីដា កន្លងមកធ្លាប់បានបង្ហាញនូវក្តីព្រួយបារម្ភដោយលោកយល់ឃើញថា ភាពយន្តខ្មែរនឹងដើរថយក្រោយ ក្នុងឆ្នាំ២០២៥នេះ បើធៀបទៅឆ្នាំ២០២៣ និង២០២៤កន្លង៕ ចាន់រ៉ា