សង្វេគពេក! ហេង វិសាល ប្រកាសផ្តើមមូលនិធិជាលើកដំបូង ដើម្បីជួយពលរដ្ឋភៀសខ្លួនកម្ពុជា

លើកដំបួងហើយ អ្នកផលិតមាតិកាល្បីឈ្មោះ ហេង វិសាល ប្រកាសបង្កើតមូលនិធិដើម្បីជួយដល់ពលរដ្ឋកម្ពុជានៅតាមបណ្តោយព្រំដែន ដែលកំពុងរត់ភៀសខ្លួន ដោយគូសបញ្ជាក់ថា ដោយមើលឃើញទុក្ខលំបាកពលរដ្ឋខ្មែរក្នុងកាលៈទេសៈសង្គ្រាម លោកនិងភរិយា ដាច់ចិត្តដាក់ចុះការហួងហែងកេរ្តិ៍ឈ្មោះមួយឡែកសិន ដើម្បីបង្កើតមូលនិធិគៀងគរថវិកាជួយដល់ពលរដ្ឋកម្ពុជាដែលកំពុងរត់ភៀសខ្លួន។

តាមរយៈសំណេរលើទំព័រហ្វេសផុសផ្ទាល់ខ្លួន លោក ហេង សុខវិសាល បានរៀបរាប់ថា រូបភាពពលរដ្ឋខ្មែរជាច្រើនត្រូវបានចំណាកស្រុកនិងផ្ទះសម្បែងដោយសារសង្គ្រាម ពិតធ្វើឱ្យលោកខ្លោចចិត្តខ្លាំងណាស់។ លោកថា បើទោះបីជាកន្លងមក លោកនិងភរិយាបានឧបត្ថម្ភគាំទ្រហើយក៏ដោយក្តី ប៉ុន្តែទហំនៃរបស់ជួយរបស់លោក មិនអាចគ្រប់គ្រាន់ជួយពលរដ្ឋខ្មែរទាំងអស់ឡើយ ដូច្នេះលោកមានតែផ្តួចផ្តើមមូលនិធិមួយ ដើម្បីជួយដល់ពលរដ្ឋភៀសខ្លួនកម្ពុជា។

លោកគូសបញ្ជាក់ទៀតថា “ដោយស្មោះត្រង់ខ្ញុំបានល្មើសវិន័យខ្លួនឯងដោយកាន់នៅមូលនិធិនេះ ព្រោះខ្ញុំជាមនុស្សស្រលាញ់នូវកេរ្តិ៍ឈ្មោះខ្លួនឯង ហើយមិនចង់ពាក់ពាន់នឹងលុយនោះទេ ប៉ុន្តែថ្ងៃនេះខ្ញុំសម្រេចចិត្តថា មានរឿងខ្លះវាមានតម្លៃជាងការមិនចង់មានរឿងរបស់ខ្ញុំ”។ ក្នុងនោះ លោកនិងភរិយា ក៏ចូលរួមបរិច្ចាគ ១០០០០ដុល្លារបន្ថែមផងដែរ ដើម្បីជួយប្រជាពលរដ្ឋដែលត្រូវការ។

ទន្ទឹមនេះ លោកបញ្ជាក់ជូន ៣ចំណុចផងដែរ៖
– នេះគឺជាកុងថ្មី កុងនេះគឺសម្រាប់ជួយដល់បងប្អូនខ្មែរដែលកំពុងខ្វះខាតក្នុងអំឡុងពេលនេះ។
– បើសិនជារាជរដ្ឋាភិបាល មានកុងមូលនិធិនៅពេលណា លោកនឹងបាញ់លុយទាំងអស់ទៅកាន់មូលនិធីរបស់រាជរដ្ឋាភិបាលនៅពេលនោះភ្លាម។
– សម្រាប់លោក នេះគឺជាការងារដែលមានសម្ពាធធំ។ លោកថា “ខ្ញុំប្រហែលមិនមែនជាមនុស្សដែលពូកែចាត់ចែងលុយខ្លាំងទេ ប៉ុន្តែខ្ញុំមានភាពស្មោះត្រង់ ធានាថាលុយទាំងអស់នឹងមិនបាត់សូម្បី១សេន”។

តាមរយៈគំនិតផ្តួចផ្តើមនេះ សាធារណជនបានសម្តែងការគាំទ្រ និងជំរុញដល់ជនរួមជាតិ ចូលរួមឱ្យផុសផុលផងដែរ៕