កូរ៉េខាងត្បូងនឹងដាក់ពង្រាយប៉ូលិសជិត ២០ ០០០​នាក់សម្រាប់កិច្ចប្រជុំកំពូល APEC

ប៉ូលិសកូរ៉េខាងត្បូងជិត ២ម៉ឺននាក់ នឹងត្រូវដាក់ពង្រាយ ដើម្បីធានាសន្តិសុខ ក្នុងអំឡុងកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ដែលគ្រោងនឹងធ្វើឡើងនៅទីក្រុង Gyeongju នា​ចុង​​ខែតុលា​នេះ។

យោងតាម​ការ​ប្រកាស​នៅ​ថ្ងៃ​ទី​១៣​ខែ​តុលា​​​របស់​ភ្នាក់ងារប៉ូលិសខេត្ត Gyeongbuk បុគ្គលិកសរុបចំនួន ១៩ ០០០​នាក់ រួមជាមួយនឹងម៉ូតូល្បាតចំនួន ១៨១​គ្រឿង និងរថយន្តល្បាតចំនួន ១៥៦​គ្រឿង នឹងត្រូវឈរជើងនៅទូទាំងទីក្រុងចាប់ពីថ្ងៃទី​២៦​ខែតុលា ដើម្បីការពារកិច្ចប្រជុំកំពូលរយៈពេល​២​ថ្ងៃដែលនឹងចាប់ផ្តើមនៅថ្ងៃទី​៣១​ខែតុលា។

លោក Oh Pu-moung ប្រធានទីភ្នាក់ងារប៉ូលិសខេត្ត Gyeongbuk បាននិយាយថា «យើងនឹងធានាសុវត្ថិភាពតាមរយៈការឆ្លើយតបរហ័សដោយប្រើឧបករណ៍ទំនើប។ គោលដៅគឺធានាសុវត្ថិភាពសាធារណៈដែលមិនអាចរង្គោះរង្គើដោយការគំរាមកំហែងណាមួយ​ឡើយ»។

Gyeongju ដែលមានប្រជាជនប្រហែល ២៤៤ ០០០​នាក់ បង្កបញ្ហាប្រឈមផ្នែកភស្តុភារពិសេស ដោយសារតែផ្លូវតូចចង្អៀត និងហេដ្ឋារចនាសម្ព័ន្ធមានកម្រិត។ លោក Oh បានកត់សម្គាល់ថា មេដឹកនាំពិភពលោកដែលចូលរួមក្នុងកិច្ចប្រជុំកំពូលនេះ នឹងត្រូវធ្វើដំណើរ​ឆ្ងាយ​ពីអាកាសយានដ្ឋាន ដែលទាមទារការសម្របសម្រួលយ៉ាងទូលំទូលាយ និងការគ្រប់គ្រងចរាចរណ៍។

លោក Oh បានបន្ថែមថា «ដើម្បីការពារឧប្បត្តិហេតុដែលមិននឹកស្មានដល់ ដូចជាការតវ៉ាដ៏គួរ​ឲ្យភ្ញាក់ផ្អើល និងដើម្បីធានាសុវត្ថិភាពទាំងមូល យើងនឹងដាក់ពង្រាយបុគ្គលិកប៉ូលិសប្រកបដោយប្រសិទ្ធភាព»។

ប៉ូលិសក៏កំពុងសម្របសម្រួលយ៉ាងជិតស្និទ្ធជាមួយទីភ្នាក់ងារ​សន្តិសុខប្រធានាធិបតី និងយោធាកូរ៉េខាងត្បូង ដើម្បីដោះស្រាយការគំរាមកំហែងភេរវកម្មដែលអាចកើតមាន។

លោក Oh បាន​លើក​ឡើង​ទៀត​ថា «នៅក្នុងការរៀបចំសម្រាប់ការវាយប្រហារដែលទាក់ទងនឹងយន្តហោះគ្មានមនុស្សបើក យើងបានអនុវត្តវិធានការតបតសម្រាប់គ្រប់សេណារីយ៉ូដែលរំពឹងទុក រួមទាំងការបង្កើតតំបន់គ្មានការហោះហើរ» ដោយកត់សម្គាល់ថា សមយុទ្ធប្រឆាំងភេរវកម្មអន្តរទីភ្នាក់ងារទ្រង់ទ្រាយធំត្រូវបានធ្វើឡើងកាលពីខែមុន ជាផ្នែក​មួយ​នៃការរៀបចំ​នេះ។

ទាក់ទិននឹងបាតុកម្មដែលអាចកើតមាននៅជិតកន្លែងប្រជុំ ប៉ូលិសបាន​ឲ្យ​ដឹង​ថា ពួកគេនឹងគោរពសិទ្ធិក្នុងការជួបប្រជុំដោយសន្តិវិធីក្រោមច្បាប់របស់កូរ៉េខាងត្បូង ប៉ុន្តែបានសង្កត់ធ្ងន់ថា ពួកគេនឹងរក្សាការត្រួតពិនិត្យយ៉ាងតឹងរ៉ឹងដើម្បីការពារការរំខានដល់ព្រឹត្តិការណ៍។

កិច្ចប្រជុំកំពូល APEC នៅទីក្រុង Gyeongju ត្រូវបានគេរំពឹងថានឹងទាក់ទាញមេដឹកនាំ និងគណៈប្រតិភូ​សេដ្ឋកិច្ច​មកពី​២១​ប្រទេស ដោយផ្តោតលើកិច្ចសហប្រតិបត្តិការក្នុងតំបន់ ពាណិជ្ជកម្ម និងស្ថិរភាពសេដ្ឋកិច្ច៕

ដោយ៖ ឈាង