ស្ថានទូតចិនព្រមានប្រជាជនខ្លួនកុំឲ្យទិញកញ្ចប់ដំណើរកម្សាន្តតម្លៃថោកទៅប្រទេសថៃ

ស្ថានទូតចិនប្រចាំប្រទេសថៃបានចេញការព្រមានយ៉ាងធ្ងន់ធ្ងរដល់អ្នកដំណើរជនជាតិចិន កុំឲ្យទិញកញ្ចប់ដំណើរកម្សាន្តតម្លៃថោកទៅប្រទេសថៃ បន្ទាប់ពីបែកធ្លាយវីដេអូដ៏ល្បីមួយលាតត្រដាងពីមគ្គុទ្ទេសក៍ទេសចរណ៍ជនជាតិចិនម្នាក់ដែលធ្វើការនៅប្រទេសថៃដោយខុសច្បាប់ និងបង្ខំអ្នកទេសចរឱ្យទិញទំនិញដើម្បីឲ្យខ្លួនទទួលបានប្រាក់ចំណេញក្នុងកញ្ចប់ដំណើរកម្សាន្ត។ នេះបើយោងតាមការចេញផ្សាយរបស់សារព័ត៌មាន Pattaya Mail នៅថ្ងៃទី១៦ខែតុលា។

ឧបទ្ទវហេតុនេះបានធ្វើឱ្យមានការព្រួយបារម្ភអំពីកេរ្តិ៍ឈ្មោះទេសចរណ៍របស់ប្រទេសថៃ និងការកើនឡើងនៃប្រតិបត្តិការទេសចរណ៍ខុសច្បាប់ប្រទេសនេះ។ ជនសង្ស័យឈ្មោះ Li Hai ត្រូវបានចាប់ខ្លួននៅប៉ាតាយ៉ា រួមជាមួយនឹងជនជាតិថៃពីរនាក់ ដែលគ្រប់គ្រងក្រុមហ៊ុនទេសចរណ៍។ ជនសង្ស័ួយប្រឈមមុខនឹងការចោទប្រកាន់ពីបទបង្ខាំងមនុស្សខុសច្បាប់ និងការបង្ខិតបង្ខំ ខណៈដែលអាជ្ញាធរថៃបានបញ្ជាក់ថា ជនសង្ស័យមិនមានអាជ្ញាប័ណ្ណសម្រាប់មគ្គុទ្ទេសក៍ទេសចរណ៍ទេ ។ Li ក៏​ធ្លាប់ត្រូវ​បាន​ចាប់​ខ្លួន​ក្នុង​ឆ្នាំ ២០១៨ ពី​បទ​ល្មើស​ស្រដៀង​គ្នា​នេះ​ដែរ។

ស្ថានទូតចិនបានជំរុញឱ្យអ្នកទេសចរចិនជៀសវាងកញ្ចប់ដំណើរកម្សាន្តដែលមានតម្លៃថោកពេក និងបាន​ក្រើន​រំឭក​អ្នក​ធ្វើ​ដំណើរ​ថា មគ្គុទ្ទេសក៍​ទេសចរណ៍​ត្រូវ​បាន​ដាក់​កម្រិត​ចំពោះ​ជន​ជាតិ​ថៃ​ក្រោម​ច្បាប់​ថៃប៉ុណ្ណោះ។ស្ថានទូតចិនក៏កំពុងធ្វើការជាមួយប៉ូលិសទេសចរណ៍ថៃ និងអាជ្ញាធរទេសចរណ៍ថៃ (TAT) ដើម្បីទប់ស្កាត់ឧប្បត្តិហេតុនាពេលអនាគតផងដែរ៕