ព័ត៌មានអន្ដរជាតិ

ទេសចរឥណ្ឌារងការវាយដំ និងប្លន់ដោយក្រុមស្រ្តីកែភេទនៅប៉ាតាយ៉ា ប្រទេសថៃ

បានផុស

៩ ខែ មុន

នៅ

ថ្ងៃសុក្រ ១៧ តុលា ២០២៥

ដោយ

បុរសទេសចរជនជាតិឥណ្ឌាម្នាក់រងការវាយដំនិងប្លន់ដោយក្រុមស្ត្រី និងស្រ្តីកែភេទនៅសណ្ឋាគារមួយនៅកណ្តាលទីក្រុងប៉ាតាយ៉ា ប្រទេសថៃ។ នេះបើយោងតាមការចេញផ្សាយរបស់សារព័ត៌មាន Pattaya Mail នៅថ្ងៃទី១៧ខែតុលា។

ខ្សែវីដេអូ CCTV ថតបានពេលកំពុងវាយគ្នា។រូបភាព៖ Pattaya Mail)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះមានឈ្មោះ Guruvayurappan Kunjan អាយុ៤៧ឆ្នាំ បានដាក់ពាក្យបណ្តឹងនៅប៉ុស្តិ៍ប៉ូលិសប៉ាតាយ៉ា កាលពីយប់ថ្ងៃពុធ ដោយមានសាក្សីជាមិត្តភក្តិ និងបុគ្គលិកសណ្ឋាគារ។ ជនរងគ្រោះបានផ្តល់វីដេអូ CCTV ដែលបង្ហាញពីជនសង្ស័យវាយខ្លួន និងលួចលុយ និងរបស់មានតម្លៃ យ៉ាងឃោឃៅ។

យោងតាមរបាយការណ៍របស់ប៉ូលិស ឧប្បត្តិហេតុនេះបានចាប់ផ្តើមនៅពេលដែលលោក Kunjan ជាទេសចរឥណ្ឌាបានជួបស្ត្រីជនជាតិថៃម្នាក់នៅជិតឆ្នេរ ប៉ាតាយ៉ា និងយល់ព្រមទៅគេងជាមួយគ្នាទៅសណ្ឋាគារដែលជនរងគ្រោះស្នាក់នៅក្នុងតម្លៃ ៥០០ បាត (ប្រហែល ១៣ដុល្លារ) ។ ពេលចូលទៅក្នុងបន្ទប់ ស្ត្រីនោះទារលុយថែមទៀត។ ពេលបុរសជនជាតិឥណ្ឌាបដិសេធ ស្រីនោះបានទូរស័ព្ទទៅស្រីកែភេទពីរនាក់ទៀត។ បន្ទាប់មក ជនសង្ស័យទាំង៣នាក់បានព្រួតគ្នាវាយជនរងគ្រោះបណ្តាលឱ្យរងរបួស និងខូចខាតទ្រព្យសម្បត្តិសណ្ឋាគារ មុនពេលរត់គេចខ្លួនពីកន្លែងកើតហេតុ ។

ប៉ូលិសកំពុងពិនិត្យមើលរូបភាពសន្តិសុខពីសណ្ឋាគារ និងតំបន់ក្បែរនោះ ខណៈពួកគេតាមប្រមាញ់ជនសង្ស័យ។(រូបភាព៖ Pattaya Mail)

ជនសង្ស័យបានលួចលុយចំនួន ១៥,០០០ បាត (ប្រហែល ៤១០ ដុល្លារ) និងប្រាក់ ២៥,០០០ រូពីឥណ្ឌា (ប្រហែល ៣០០ ដុល្លារ) ជាសាច់ប្រាក់។ បុគ្គលិកសណ្ឋាគារម្នាក់ ដែលព្យាយាមជួយអន្តរាគមន៍ ក៏ត្រូវបានវាយនឹងដំបងដែក និងដាច់ខ្សែកមាសតម្លៃប្រហែល ៦០០ដុល្លារ ខ្ទេចខ្ទី អំឡុងពេលវាយតប់គ្នា។

ការស៊ើបអង្កេតកំពុងដំណើរការដោយ ប៉ូលិសប៉ាតាយ៉ា បានទទួលរូបភាពឃ្លាំមើលពីសណ្ឋាគារ និងតំបន់ក្បែរនោះ ដើម្បីកំណត់អត្តសញ្ញាណជនសង្ស័យ។

គួរបញ្ជាក់ថា ឧបទ្ទវហេតុថ្មីៗជាច្រើននៅក្នុងប្រទេសថៃពាក់ព័ន្ធនឹងអ្នកទេសចររងរបួស ឬការវាយប្រហារ ជាពិសេសនៅក្នុងគោលដៅពេញនិយមដូចជា ប៉ាតាយ៉ា និងភូកេត។ ករណីរួមមានការប្លន់ ការវាយតប់គ្នាតាមផ្លូវ និងការឆបោកដែលកំណត់គោលដៅភ្ញៀវបរទេស។ អាជ្ញាធរថៃបានបង្កើនការល្បាត និងសន្យាចាត់វិធានការតឹងរ៉ឹងជាងមុនក្នុងការការពារភ្ញៀវទេសចរ និងដើម្បីស្ដារមុខមាត់ប្រទេសឡើងវិញ៕