ប៉ាគីស្ថាន និងអាហ្វហ្គានីស្ថាន ពន្យាពេលបទឈប់បាញ់រហូតដល់បញ្ចប់កិច្ចចរចាសន្តិភាពនៅកាតា

ប៉ាគីស្ថាន និងអាហ្វហ្គានីស្ថានបានព្រមព្រៀងពន្យាពេលបទឈប់បាញ់គ្នារហូតដល់កិច្ចចរចាសន្តិភាពបញ្ចប់នៅទីក្រុងដូហា ប្រទេសកាតា ដើម្បី​រំងាប់​ភាព​តានតឹង​ដែល​កើន​ឡើង​បន្ទាប់​ពី​ការ​ប្រយុទ្ធ​គ្នា​នៅ​តាម​ព្រំដែន​អស់​រយៈពេល​ជាច្រើន​ថ្ងៃមកនេះ។​ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៨ខែតុលា។

ដើម្បីចូលរួមកិច្ចចរចារក្រុម​ប៉ាគីស្ថាន​បាន​ទៅដល់​ទីក្រុង​ដូហា​រួច​ហើយ ខណៈ​ក្រុម​អាហ្វហ្គានីស្ថាន​នឹងទៅដល់នៅថ្ងៃ​សៅរ៍នេះ។ កិច្ចពិភាក្សាដែលជួយដោយកាតា និងអារ៉ាប៊ីសាអូឌីតនេះ មានគោលបំណងស្វែងរកផែនការសន្តិភាពរយៈពេលវែងមួយបន្ទាប់ពីការប៉ះទង្គិចគ្នាដ៏អាក្រក់បំផុតរវាងប្រទេសជិតខាងទាំងពីរក្នុងរយៈពេលប៉ុន្មានឆ្នាំកន្លងមកនេះ។

ការពន្យាពេលបទឈប់បាញ់នេះបានកើតឡើងតែប៉ុន្មានម៉ោងប៉ុណ្ណោះបន្ទាប់ពីការបំផ្ទុះគ្រាប់បែកអត្តឃាតនៅជិតព្រំដែនអាហ្វហ្គានីស្ថានបានសម្លាប់ទាហានប៉ាគីស្ថាន ៧ នាក់ និងរបួស ១៣ នាក់ផ្សេងទៀត។

អ្នកនាំពាក្យក្រុមតាលីបង់អាហ្វហ្គានីស្ថាន លោក Zabihullah Mujahid បាននិយាយថា កងកម្លាំងអាហ្វហ្គានីស្ថាននឹងបន្តបទឈប់បាញ់ ដរាបណាប៉ាគីស្ថានមិនបើកការវាយប្រហារថ្មី។ បទឈប់បាញ់ដែលត្រូវបានប្រកាសជាលើកដំបូងកាលពីថ្ងៃពុធបានបញ្ឈប់ការបាញ់ផ្លោងយ៉ាងខ្លាំងក្លាជាច្រើនថ្ងៃ ដែលបានសម្លាប់មនុស្សរាប់សិបនាក់ និងរាប់រយនាក់រងរបួសទាំងសងខាង។

ទំនាក់​ទំនង​រវាង​ប្រទេស​ទាំង​ពីរ​កាន់​តែ​អាក្រក់​ឡើង​ក្នុង​ប៉ុន្មាន​សប្តាហ៍​ថ្មីៗ​នេះ ដោយប្រទេសប៉ាគីស្ថានបានចោទប្រកាន់ក្រុមតាលីបង់ថាបានអនុញ្ញាតឱ្យពួកសកម្មប្រយុទ្ធមកពី Tehreek-e-Taliban Pakistan (TTP) ប្រើប្រាស់ទឹកដីអាហ្វហ្គានីស្ថានដើម្បីវាយប្រហារប៉ាគីស្ថាន។ ពួកតាលីបង់បានបដិសេធរឿងនេះ ដោយនិយាយថា ប៉ាគីស្ថានកំពុងផ្សព្វផ្សាយព័ត៌មានមិនពិត និងគាំទ្រក្រុមដែលមានទំនាក់ទំនងជាមួយរដ្ឋអ៊ីស្លាម ដើម្បីបង្កើតអស្ថិរភាពនៅអាហ្វហ្គានីស្ថាន។

ស្ថានការណ៍នៅតែតានតឹង ប៉ុន្តែប្រទេសមួយចំនួនដូចជាកាតា អារ៉ាប៊ីសាអូឌីត និងសហរដ្ឋអាមេរិកកំពុងលើកទឹកចិត្តឱ្យភាគីទាំងពីរប្រើប្រាស់កិច្ចចរចានៅទីក្រុងដូហា ដើម្បីឈានដល់កិច្ចព្រមព្រៀងសន្តិភាពយូរអង្វែង៕

អត្ថបទ៖ ប៊ុន សុភាព