ឥណ្ឌា និងចិនចាប់ផ្តើមជើងហោះហើរត្រង់ឡើងវិញក្រោយបញ្ឃប់អស់៥ឆ្នាំ

យោងតាមការចេញផ្សាយរបស់សារព័ត៌មាន CNA នៅថ្ងៃទី២៦ខែ តុលា ឥណ្ឌា និងចិនបានចាប់ផ្តើមជើងហោះហើរត្រង់ឡើងវិញ បន្ទាប់ពីបញ្ឈប់អស់ប្រាំឆ្នាំ ដែលបង្ហាញពីសញ្ញានៃការកែលម្អទំនាក់ទំនងរវាងប្រទេសទាំងពីរ។

ជើងហោះហើរដំបូងរបស់ក្រុមហ៊ុនអាកាសចរណ៍ IndiGo និងចាកចេញពីទីក្រុង Kolkata ទៅកាន់ទីក្រុង Guangzhou នៅយប់ថ្ងៃអាទិត្យ ដោយនឹងមានផ្លូវហោះហើរបន្ថែមទៀតពីទីក្រុង New Delhi ទៅកាន់ទីក្រុង Shanghai និង Guangzhou គ្រោងទុកសម្រាប់ខែវិច្ឆិកា។

គួររម្លឹកថាជើងហោះហើររវាងប្រទេសទាំងពីរត្រូវបានបញ្ឈប់ក្នុងអំឡុងពេលមានជំងឺរាតត្បាត កូវីដ-១៩ និងបន្ទាប់ពីការប៉ះទង្គិចគ្នាតាមព្រំដែនឆ្នាំ ២០២០ ដែលទាហានឥណ្ឌា ២០ នាក់ និងទាហានចិន ៤ នាក់ត្រូវបានសម្លាប់។ ឥឡូវនេះ ភាគីទាំងពីរកំពុងកសាងទំនុកចិត្តឡើងវិញបន្តិចម្តងៗ។ រដ្ឋាភិបាលឥណ្ឌាបាននិយាយថា ជើងហោះហើរទាំងនេះនឹងជួយជំរុញពាណិជ្ជកម្ម ទេសចរណ៍ និងការធ្វើដំណើររវាងប្រទេសទាំងពីរ។

ក្រុមធុរកិច្ចនៅទីក្រុង Kolkata ដែលជាទីក្រុងដែលមានទំនាក់ទំនងពាណិជ្ជកម្មចាស់ជាមួយប្រទេសចិន បានស្វាគមន៍ចំពោះចលនានេះ ដោយនិយាយថា វានឹងធ្វើឱ្យអាជីវកម្មកាន់តែងាយស្រួល និងលឿនជាងមុន។ លើសពីនេះឥណ្ឌានៅតែទិញចូលច្រើនជាងនាំចេញពទៅប្រទេសចិនដោយ ការនាំចូលបានឈានដល់ ១១ ពាន់លានដុល្លារអាមេរិកកាលពីខែមុន ខណៈដែលការនាំចេញមានចំនួន ១.៤៧ ពាន់លានដុល្លារអាមេរិក។

ប្រទេសទាំងពីរក៏បានបង្ហាញសញ្ញាតូចៗនៃមិត្តភាពផងដែរ ដូចជាទាហានបានដោះដូរបង្អែមនៅថ្ងៃបុណ្យឌីវ៉ាលីនៅតាមព្រំដែន។ អ្នកជំនាញនិយាយថា ការចាប់ផ្ដើមជើងហោះហើរឡើងវិញគឺជាសញ្ញាល្អនៃការកែលម្អទំនាក់ទំនង ប៉ុន្តែឥណ្ឌានៅតែត្រូវដោះស្រាយបញ្ហាប្រឈមការគ្រប់គ្រងអំណាចនិងឥទ្ធិពលកាន់តែខ្លាំងឡើងរបស់ចិននៅក្នុងតំបន់៕

អត្ថបទ៖ ប៊ុន សុភាព