ភ្លៀងធ្លាក់ខ្លាំងមិនធ្លាប់មាន​ បង្កជាទឹកជំនន់ធ្ងន់ធ្ងរនៅកណ្ដាលប្រទេសវៀតណាម

មនុស្សរាប់ពាន់នាក់នៅកណ្តាលប្រទេសវៀតណាមត្រូវបានបង្ខំជម្លៀសចេញពីផ្ទះរបស់ពួកគេ បន្ទាប់ពីមានភ្លៀងធ្លាក់ខ្លាំងមិនធ្លាប់មានបង្កជាទឹកជំនន់ ជន់លិចទីក្រុង Hue និងខេត្តក្បែរៗ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៩ខែតុលា។

ក្នុងរយៈពេលត្រឹមតែ ២៤ ម៉ោង ទីក្រុង Hue បានឃើញទឹកភ្លៀងពី ១ ទៅ ១.៧ ម៉ែត្រ ដែលបំបែកកំណត់ត្រាដែលបានកំណត់ក្នុងឆ្នាំ ១៩៩៩។ ផ្លូវនានាត្រូវបានគ្របដណ្ដប់ដោយទឹកជ្រៅ ហើយមនុស្សត្រូវដើរឆ្លងកាត់ទឹកជំនន់ ឬប្រើទូកតូចៗដើម្បីធ្វើដំណើរ។

ប្រជាជនជាង ៨,៦០០ នាក់មកពីខេត្តចំនួនបួនត្រូវបានជម្លៀសទៅកាន់សាលារៀន និងអគារសាធារណៈ ដើម្បីស្នាក់នៅជាបណ្ដោះអាសន្នដោយសារតែហានិភ័យនៃទឹកជំនន់ធ្ងន់ធ្ងរ និងបំណាក់ដី។ ផ្ទះជាច្រើនបានដាច់ចរន្តអគ្គិសនី ហើយសូម្បីតែមន្ទីរពេទ្យមួយចំនួនក៏ត្រូវបានជន់លិចដែរ។ ប្រជាជនបាននិយាយថានេះជាទឹកជំនន់ដ៏អាក្រក់បំផុតដែលពួកគេមិនធ្លាប់ជួបប្រទះ។

នៅខេត្ត Quang Ngai ភ្លៀងធ្លាក់ខ្លាំងបានបណ្តាលឱ្យមានការបាក់ដីដ៏ធំមួយប្រវែងប្រហែល ៣ គីឡូម៉ែត្រ ដោយកាត់ផ្តាច់មនុស្ស ១,៧០០នាក់ និងបំផ្លាញដំណាំ។ អាជ្ញាធរបានព្រមានថា ភ្លៀង និងទឹកជំនន់អាចបន្តរហូតដល់ថ្ងៃសុក្រ ហើយកម្រិតគ្រោះថ្នាក់ឥឡូវនេះស្ថិតនៅចំណុចខ្ពស់បំផុត។

សាលារៀននៅទីក្រុង Hue និងទីក្រុង Danang ត្រូវបានបិទ ហើយសេវាកម្មរថភ្លើងរវាងភាគខាងជើង និងភាគខាងត្បូងត្រូវបានពន្យារពេលដោយសារតែទឹកជំនន់។ អ្នកជំនាញនិយាយថា ការប្រែប្រួលអាកាសធាតុនេះកំពុងធ្វើឱ្យព្យុះ និងទឹកជំនន់កាន់តែធ្ងន់ធ្ងរ និងកាន់តែមានគ្រោះថ្នាក់។

រហូតមកដល់ពេលនេះ ក្នុងឆ្នាំនេះ មនុស្សចំនួន ១៨៧ នាក់នៅក្នុងប្រទេសវៀតណាមបានស្លាប់ ឬបាត់ខ្លួនដោយសារតែគ្រោះមហន្តរាយធម្មជាតិ។ ដំណាំជាង២៤០,០០០ ហិកតា និងផ្ទះចំនួន ៣៨,០០០ ខ្នងត្រូវបានខូចខាត ដែលបណ្តាលឱ្យមានការខាតបង់ប្រមាណជាង ៦១០ លានដុល្លារអាមេរិក៕

អត្ថបទ៖ ប៊ុន សុភាព