របបយោធាមីយ៉ាន់ម៉ាបន្តការបោះឆ្នោតដែលគ្រោង​ទុក ទោះរង​ការរិះគន់​ជាសកល​

របបយោធាមីយ៉ាន់ម៉ាបានប្រកាសថា ខ្លួននឹងបន្តការបោះឆ្នោតដែលបានគ្រោងទុក ទោះបីជាមានការថ្កោលទោសយ៉ាងទូលំទូលាយពីអន្តរជាតិ និងការបដិសេធមិនចូលរួមបោះឆ្នោតពីពលរដ្ឋក្នុងស្រុកក៏ដោយ។ នេះបើយោងតាមការចេញផ្សាយរបស់សារព័ត៌មាន The Irrawaddy នៅថ្ងៃទី១២ខែ តុលា។

បើតាមអ្នកនាំពាក្យរបបយោធាឧត្តមសេនីយ៍ Zaw Min Tun បាននិយាយថា ការបោះឆ្នោតនេះគឺជាបញ្ហាផ្ទៃក្នុង ហើយការជ្រៀតជ្រែកពីបរទេសនឹងមិនធ្វើឱ្យខូចដំណើរការនេះទេ។

ប្រទេសលោកខាងលិច ក្រុមសិទ្ធិមនុស្ស និងអ្នកឃ្លាំមើលការបោះឆ្នោតបានច្រានចោលការបោះឆ្នោតនេះថាជាការក្លែងបន្លំ ដោយលើកឡើងពីការដកចេញនូវគណបក្សធំៗ ការជាប់ពន្ធនាគាររបស់មេដឹកនាំជាប់ឆ្នោត លោកស្រី Aung San Suu Kyi និងលោក U Win Myint និងការតស៊ូជាបន្តបន្ទាប់ទូទាំងប្រទេសចំពោះការគ្រប់គ្រងរបស់យោធា។

លើសពីនេះការស្ទង់មតិថ្មីៗនេះបានបង្ហាញថា ប្រជាពលរដ្ឋ ៩៨% មិនទុកចិត្តលើការបោះឆ្នោតនោះទេ ដោយភាគច្រើនបដិសេធមិនបោះឆ្នោត។ របបយោធាក៏បានចាប់ខ្លួនមនុស្សប្រហែល១០០ នាក់ពីបទរិះគន់ ឬបដិសេធមិនសហការជាមួយការបោះឆ្នោតផងដែរ។

ការបោះឆ្នោតនឹងត្រូវធ្វើឡើងជាពីរដំណាក់កាល ដោយដំណាក់កាលទី១នៅថ្ងៃទី ២៨ ខែធ្នូ និងថ្ងៃទី ១១ ខែមករា នៅទូទាំង ២០២ ឃុំ សង្គ្កាត់ ទោះបីជាការបោះឆ្នោតនឹងមិនបានឡើងនៅក្នុងតំបន់ចំនួន ៥៦ ដែលស្ថិតនៅក្រោមការគ្រប់គ្រងរបស់ពួកប្រឆាំងក៏ដោយ។ គណបក្ស​សាមគ្គីភាព​សហភាព​និង​អភិវឌ្ឍន៍ (USDP) ដែល​គាំទ្រ​ដោយ​យោធា ត្រូវ​បាន​គេ​រំពឹង​ថា​នឹង​ឈ្នះ​អាសនៈ​ភាគ​ច្រើន ខណៈ​ដែល​គណបក្ស​នេះ​បាន​ដាក់​បេក្ខជន​ជាង ១,០០០នាក់​សម្រាប់​ការ​បោះឆ្នោត។

យោងតាមអ្នកវិភាគ ចលនារបស់របបយោធាក្នុងការរំលាយគណបក្ស និងហាមឃាត់គូប្រជែងគឺមានគោលបំណងធានាជ័យជម្នះរបស់គណបក្ស USDP៕

អត្ថបទ៖ ប៊ុន សុភាព