ហេតុអ្វីប្រទេសជាច្រើន ជ្រើសរើស​ទិញ​អាវុធពីរុស្ស៊ី ជាជាង​​​​ពី​បស្ចឹមលោក​?

ការចុះផ្សាយពីសារព័ត៌មាន TASS នាថ្ងៃ១១ វិច្ឆិកា ដែលដកស្រង់សម្ដីរដ្ឋមន្ត្រី​ការបរទេស​រុស្ស៊ី លោក Sergei Lavrov បាន​​ឲ្យ​ដឹង​ថា ប្រទេស​ជាច្រើន​នៅ​តំបន់​អាស៊ី អារ៉ាប់ អាហ្វ្រិក និងតំបន់​អាមេរិកឡាទីន គឺជាដៃគូយូរអង្វែងរបស់រុស្ស៊ី ពោលប្រទេសកាន់តែច្រើនឡើងៗ កំពុងជ្រើសរើសទិញអាវុធរបស់រុស្ស៊ី ជំនួសឲ្យអាវុធរបស់លោកខាងលិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍មួយ ដែលប្រារព្ធខួបលើកទី២៥ នៃ Rosoboronexport ដែលជាសាជីវកម្មជួញដូរអាវុធធំជាងគេរបស់រុស្ស៊ី ​​លោក Lavrov បាននិយាយថា «ទំនាក់ទំនងនេះ ត្រូវបានបង្កើតឡើងជាយូរមកហើយ ជាមួយប្រទេសជាច្រើន»។

រដ្ឋមន្ត្រីការបរទេសចាស់វស្សារូបនេះថែមទាំងគូសបញ្ចាក់ទៀតថា ប្រទេសមួយចំនួនធ្លាប់ពឹងផ្អែកលើក្រុមហ៊ុនផលិត​​គ្រឿងសព្វាវុធ​​របស់​លោកខាងលិច ប៉ុន្តែឥឡូវនេះ បន្ទាប់ពីកាវិវឌ្ឍ​ក្នុង​សកលលោក ជម្លោះជាច្រើនបានប្រើប្រាស់អាវុធប្រភេទផ្សេងៗគ្នា ហើយពួកគេដឹងថា អាវុធរបស់រុស្ស៊ីគឺ​ជា​ជម្រើស​​ល្អបំផុត​​សម្រាប់​ពួក​គេ​​។

លោកក៏បាននិយាយផងដែរថា អាវុធរបស់រុស្ស៊ីងាយស្រួលប្រើជាង ពោលគឺបានបង្ហាញពីប្រសិទ្ធភាពរបស់ពួកវា បើប្រៀបធៀបទៅនឹងអាវុធ និងប្រព័ន្ធស្រដៀងគ្នាដែលផលិតនៅក្នុងប្រទេសលោកខាងលិច។ ពួកវាមានតម្លៃថោកជាង ក្នុងន័យវិជ្ជមាន។

យ៉ាងណាមិញ កាលពីថ្មីៗនេះ រុស្ស៊ីបានប្រកាសពីប្រព័ន្ធអាវុធចុងក្រោយបំផុតពីរ រួមទាំងដ្រូន​ក្រោមទឹក Poseidon និងមីស៊ីលផ្លោង​ប្រភេទ​ Burevestnik ដែលត្រូវបានគេនិយាយថា គ្មានគូប្រជែងនៅក្នុងពិភពលោក។ យោងតាមអ្នកជំនាញ​យោធារុស្ស៊ី លោក Andrey Marochko អាវុធទាំងពីរនេះនឹងជួយធានាសន្តិសុខរបស់រុស្ស៊ី សម្រាប់រយៈពេល​ជាច្រើនទសវត្សរ៍ខាងមុខ ដោយគ្មានសត្រូវណាហ៊ានវាយប្រហារឡើយ។

ដ្រូន​ក្រោមទឹកប្រភេទ Poseidon ដែលដើរដោយថាមពលនុយក្លេអ៊ែរ​ គឺ​​ជាប្រភេទ​ដ្រូន​មានសមត្ថភាពផ្ទុកក្បាលគ្រាប់នុយក្លេអ៊ែរ ឬក្បាល​គ្រាប់ធម្មតា។ ដ្រូន​ក្រោមទឹកនេះ អាចឈានដល់ល្បឿនអតិបរមា ៩០គីឡូម៉ែត្រក្នុងមួយម៉ោង អាចមុជដល់ជម្រៅ ១,០០០ ម៉ែត្រ និងមានចម្ងាយប្រតិបត្តិការយ៉ាងហោចណាស់ ១០,០០០គីឡូម៉ែត្រ។

ទន្ទឹមនឹងនេះ មីស៊ីលប្រភេទ​ Burevestnik 9M739 របស់រុស្ស៊ី មានសមត្ថភាពបំពាក់​​ក្បាលគ្រាប់នុយក្លេអ៊ែរ។ពិសេស​ទៅ​ទៀត​នោះ​ មីស៊ីលនេះត្រូវបានបំពាក់ដោយរ៉េអាក់ទ័រនុយក្លេអ៊ែរតូចមួយ ដូច្នេះវាមិនត្រូវបានកំណត់ដោយប្រភពឥន្ធនៈទេ ដោយហេតុនេះជួយឲ្យមីស៊ីល Burevestnik សម្រេចបានចម្ងាយគ្មានដែនកំណត់។ មីស៊ីលនេះអាចឈានដល់ល្បឿនរហូតដល់ ១៣០០ គីឡូម៉ែត្រក្នុងមួយម៉ោង និងអាចបត់បែនបានខ្ពស់នៅរយៈកម្ពស់ពី ២៥-១០០ ម៉ែត្រ ដើម្បីជ្រាបចូលទៅក្នុងប្រព័ន្ធការពារដែនអាកាសទំនើបៗ។

នៅឆ្នាំនេះផងដែរ ប្រធានាធិបតីលោក វ្ល៉ាឌីមៀរ ពូទីន បានបញ្ជាក់ជាថ្មីអំពីភាពលេចធ្លោរបស់រុស្ស៊ី នៅក្នុងវិស័យនាំចេញអាវុធសកល។ លោកថា រុស្ស៊ីនៅតែស្ថិតក្នុងចំណោមប្រទេសកំពូលទាំង៥ នៅក្នុងទីផ្សារអាវុធរបស់ពិភពលោកដដែល៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

អាវុធពិសេស ២ ប្រភេទ ជួយធានាសន្តិសុខ រុស្ស៊ី គ្មានប្រទេសណាហ៊ានវាយប្រហារ