ព័ត៌មានអន្ដរជាតិ

តៃវ៉ាន់ផ្តើមចែកចាយសៀវភៅណែនាំការពារខ្លួន ពេលជួបសង្គ្រាមដល់គ្រួសាររាប់លាន

បានផុស

៨ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

ក្រសួងការពារជាតិតៃវ៉ាន់បានប្រកាសកាលពីថ្ងៃអង្គារទី១៨ខែវិច្ឆិកា បានប្រកាសថា តៃវ៉ាន់នឹងចាប់ផ្តើមចែកចាយសៀវភៅការពារជនស៊ីវិលរាប់លានក្បាលដល់ក្រុមគ្រួសារនៅទូទាំងកោះតៃវ៉ាន់ក្នុងសប្តាហ៍នេះ ក្នុងកិច្ចខិតខំប្រឹងប្រែងដែលមិនធ្លាប់មានពីមុនមក ក្នុងការរៀបចំអ្នកស្រុកសម្រាប់ភាពអាសន្នដែលអាចកើតមាន រួមទាំងលទ្ធភាពនៃការវាយប្រហាររបស់ចិនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់រ៉យទ័រ សៀវភៅណែនាំដែលបានបង្ហាញនៅក្នុងខែកញ្ញា រួមមានការណែនាំជាលើកដំបូងអំពីអ្វីដែលត្រូវធ្វើ ប្រសិនបើពលរដ្ឋជួបប្រទះនឹងទាហានសត្រូវ ហើយសង្កត់ធ្ងន់ថា ការអះអាងណាមួយអំពីការចុះចាញ់របស់តៃវ៉ាន់គួរតែត្រូវបានចាត់ទុកថាមិនពិត។ វាក៏ផ្តល់ការណែនាំអំពីការកំណត់ទីតាំងជ្រកកោនពីការវាយប្រហារដោយគ្រាប់បែក និងរៀបចំឧបករណ៍សង្គ្រោះបន្ទាន់ផងដែរ។

ការចែកចាយទៅកាន់ប្រអប់សំបុត្រជាង ៩.៨ លាននៅទូទាំងកោះតៃវ៉ាន់ នឹងចាប់ផ្តើមនៅសប្តាហ៍នេះ ហើយសៀវភៅណែនាំជាភាសាអង់គ្លេស និងភាសាបរទេសផ្សេងទៀតក៏នឹងត្រូវបានចែកចាយក្នុងពេលឆាប់ៗនេះផងដែរ។

ចិនបានអះអាងថា កោះតៃវ៉ាន់ដែលមានរដ្ឋបាលគ្រប់គ្រង់តាមបែបប្រជាធិបតេយ្យជាទឹកដីរបស់ខ្លួន ហើយមិនបានច្រានចោលការប្រើប្រាស់កម្លាំងដើម្បីគ្រប់គ្រងតៃវ៉ាន់ឡើយ។ រដ្ឋាភិបាលតៃវ៉ាន់ច្រានចោលការទាមទារទឹកដីរបស់រដ្ឋាភិបាលក្រុងដីគោក ដោយនិយាយថា មានតែប្រជាជនតៃវ៉ាន់ទេដែលអាចសម្រេចអនាគតរបស់ពួកគេ។

ក្នុងប៉ុន្មានថ្ងៃចុងក្រោយនេះ ជម្លោះការទូតកម្រិតខ្ពស់បានកើតឡើងរវាងចិន និងជប៉ុន បន្ទាប់ពីនាយករដ្ឋមន្ត្រីជប៉ុន លោកស្រី Sanae Takaichi បានថ្លែងនៅក្នុងរដ្ឋសភា អំពីលទ្ធភាពលើកទ័ពការពារតៃវ៉ាន់ ក្នុងករណីដែលរដ្ឋាភិបាលចិនលើកទ័ពវាយយកតៃវ៉ាន់ ដោយចាត់ទុកថា វាជាការគម្រាមកំហែងដល់សន្តិសុខជប៉ុន។

ជាការឆ្លើយតប ប្រទេសចិនបានប្រតិកម្មយ៉ាងខ្លាំងនិងបានចាត់ទុកថា អ្វីដែលនាយករដ្ឋមន្ត្រីជប៉ុនបានលើកឡើងជុំវិញដំណោះស្រាយកោះតៃវ៉ាន់ បានធ្វើឲ្យមូលដ្ឋាននយោបាយ និងសេដ្ឋកិច្ចរវាងចិននិងជប៉ុន ត្រូវបាត់បង់ ហើយ នាយករដ្ឋមន្ត្រី ចិនលោក លី ឈាង ក៏មិនមានផែនការជួបសន្ទនាផ្ទាល់ជាមួយនាយករដ្ឋមន្ត្រីជប៉ុនក្នុងពេលប្រជុំ G-20 នៅចុងសប្តាហ៍នេះនៅអាហ្វ្រិកខាងត្បូងដែរ៕

រ៉ាន់ រើយ