កិច្ចប្រជុំ G20 នឹងចេញសេចក្តីថ្លែងការណ៍រួម ទោះមានការជំទាស់ពី អាមេរិក

ប្រធានាធិបតីអាហ្វ្រិកខាងត្បូង ដែលជាម្ចាស់ផ្ទះនៃកិច្ចប្រជុំកំពូល G20 ឆ្នាំ ២០២៥ បាននិយាយកាលថ្ងៃទី ២១ ខែវិច្ឆិកា ថា កិច្ចប្រជុំកំពូល G20 នឹងចេញសេចក្តីថ្លែងការណ៍រួម ទោះបីជាមានការជំទាស់ពីរដ្ឋាភិបាលអាមេរិកចំពោះការផ្លាស់ប្តូរនេះក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចេញផ្សាយដោយសារព័ត៌មាន news.sky កិច្ចប្រជុំកំពូល G20 ឆ្នាំ ២០២៥ ដែលមានប្រធានបទ «សាមគ្គីភាព សមភាព និងការអភិវឌ្ឍប្រកបដោយចីរភាព» នឹងប្រព្រឹត្តទៅនៅថ្ងៃទី ២២ និង ២៣ ខែវិច្ឆិកា នៅទីក្រុង Johannesburg ប្រទេសអាហ្វ្រិកខាងត្បូង។ នេះគឺជាកិច្ចប្រជុំកំពូលលើកដំបូងដែលបានធ្វើឡើងនៅអាហ្វ្រិកចាប់តាំងពីក្រុមសេដ្ឋកិច្ចអភិវឌ្ឍន៍ និងកំពុងរីកចម្រើនឈានមុខគេរបស់ពិភពលោកត្រូវបានបង្កើតឡើងក្នុងឆ្នាំ ១៩៩៩។

ព្រឹត្តិការណ៍នៅឆ្នាំនេះនឹងមានការចូលរួមពីមេដឹកនាំ ឬតំណាងជាន់ខ្ពស់នៃប្រទេសជាង ៤០ រួមទាំងរដ្ឋជាសមាជិក និងភ្ញៀវ។ ទោះជាយ៉ាងណាក៏ដោយ ប្រទេសម្ចាស់ផ្ទះនៃកិច្ចប្រជុំកំពូល G20 បន្ទាប់គឺសហរដ្ឋអាមេរិក បានប្រកាសថាខ្លួននឹងមិនចូលរួមក្នុងកិច្ចប្រជុំកំពូលនោះទេ។ លើសពីនេះ មន្ត្រីអាមេរិកក៏បានស្នើសុំឲ្យអាហ្វ្រិកខាងត្បូង មិនត្រូវចេញសេចក្តីថ្លែងការណ៍រួមនៅក្នុងកិច្ចប្រជុំកំពូលនេះផងដែរ។

បើទោះបីជាមានភាពតានតឹងនេះក៏ដោយ ប្រធានាធិបតីអាហ្វ្រិកខាងត្បូង លោក Cyril Ramaphosa បានទទូចថា កិច្ចប្រជុំកំពូល G20 ឆ្នាំនេះ នឹងចេញសេចក្តីថ្លែងការណ៍រួមមួយ។ នៅក្នុងសេចក្តីថ្លែងការណ៍មួយដែលត្រូវបានដកស្រង់ដោយសារព័ត៌មានអាហ្វ្រិកខាងត្បូងកាលពីម្សិលមិញ លោកប្រធានាធិបតី Ramaphosa បានសម្តែងការសោកស្តាយចំពោះអាមេរិកដែលមិនបានចូលរួមកិច្ចប្រជុំកំពូល និងដាក់សម្ពាធលើបញ្ហានៃសេចក្តីថ្លែងការណ៍រួម ប៉ុន្តែបានសង្កត់ធ្ងន់ថា រឿងនេះមិនអាចរារាំងកិច្ចប្រជុំកំពូល G20 ពីការចេញសេចក្តីថ្លែងការណ៍រួមនោះទេ។

យោងតាមសារព័ត៌មានអាហ្វ្រិកខាងត្បូង ប្រទេសនេះសង្ឃឹមថា នឹងប្រើប្រាស់កិច្ចប្រជុំកំពូល G20 ឆ្នាំ២០២៥ ដើម្បីសម្រេចបានវឌ្ឍនភាពលើបញ្ហាដែលប៉ះពាល់ដល់ប្រទេសក្រីក្រ រួមទាំងការកាត់បន្ថយផលប៉ះពាល់នៃការប្រែប្រួលអាកាសធាតុ និងគ្រោះមហន្តរាយធម្មជាតិ ការកាត់បន្ថយបន្ទុកបំណុលរបស់ប្រទេសកំពុងអភិវឌ្ឍន៍ និងការដោះស្រាយវិសមភាពទ្រព្យសម្បត្តិសកល៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ជម្លោះការទូតមិនទាន់ស្រាយចប់ ចិន ពន្យារកិច្ចប្រជុំរដ្ឋមន្ត្រីជប៉ុន-កូរ៉េខាងត្បូង ចោលភ្លាម