ព័ត៌មានអន្ដរជាតិ

ម៉ាក្រុងស្នើលោកស៊ីជួយឲ្យមានបទឈប់បាញ់នៅអ៊ុយក្រែន និងពង្រឹងពាណិជ្ជកម្ម

បានផុស

៥ ខែ មុន

នៅ

ថ្ងៃព្រហស្បតិ៍ ៤ ធ្នូ ២០២៥

ដោយ

ក្នុងដំណើរទស្សនកិច្ចនៅទីក្រុងប៉េកាំង និងជួបជាមួយសមភាគីចិន ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បានស្នើឲ្យចិនជួយឲ្យមានបទឈប់បាញ់នៅប្រទេសអ៊ុយក្រែនជាទីដែលជួបប្រទះសង្គ្រាមអស់រយៈពេលជិត៤ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីការស្នើឲ្យចិនជួយលើបទឈប់បាញ់នៅអ៊ុយក្រែន លោក អេមម៉ានូអែល ម៉ាក្រុង បានអំពាវនាវឱ្យមានទំនាក់ទំនងសេដ្ឋកិច្ចស្មើភាពគ្នាបន្ថែមទៀតរវាងប្រទេសចិន និងអឺរ៉ុបនៅក្នុងសន្និសីទសារព័ត៌មាននៅទីក្រុងប៉េកាំងកាលពីថ្ងៃព្រហស្បតិ៍ទី៤ខែធ្នូ ក្នុងដំណើរទស្សនកិច្ចផ្លូវការមកកាន់ទីក្រុងប៉េកាំង។

ប្រមុខដឹកនាំបារាំងលោក ម៉ាក្រុង បានធ្វើការអត្ថាធិប្បាយក្នុងអំឡុងសន្និសីទកាសែតរួមគ្នាជាមួយសមភាគីចិនលោក ស៊ី ជីនពីង (Xi Jinping) ក្នុងអំឡុងដំណើរទស្សនកិច្ចផ្លូវរដ្ឋលើកទីបួនរបស់មេដឹកនាំបារាំងទៅកាន់ប្រទេសចិន ចំពេលដែលភាពតានតឹងក្នុងពិភពលោកកំពុងឡើងកម្តៅ។

មានការកត់សម្គាល់ផងដែរថា ដំណើរទស្សនកិច្ចរបស់លោក ម៉ាក្រុង ធ្វើឡើង ចំពេលដែលអឺរ៉ុបស្វែងរកតុល្យភាពសេដ្ឋកិច្ច និងការគំរាមកំហែងផ្នែកសន្តិសុខពីប្រទេសដែលមានសេដ្ឋកិច្ចធំជាងគេទីពីររបស់ពិភពលោក។

ប្រធានាធិបតីបារាំង បាននិយាយថា៖«អឺរ៉ុប និងចិនស្របជាមួយដៃគូផ្សេងទៀត មានតួនាទីក្នុងការដាក់ចេញនូវមូលដ្ឋានគ្រឹះសម្រាប់អភិបាលកិច្ចសេដ្ឋកិច្ចសកលប្រកបដោយយុត្តិធម៌និងរឹងមាំ ដោយផ្អែកលើច្បាប់ និងមិនមែនជាច្បាប់សម្រាប់តែអ្នកខ្លាំងបំផុតនោះទេ»។

ទីភ្នាក់ងារព័ត៌មានរ៉យទ័រ បានរាយការណ៍ថា ប្រទេសចិនចង់បន្ធូរបន្ថយជម្លោះពាណិជ្ជកម្មជាមួយសហភាពអឺរ៉ុបដែលមានសមាជិក២៧ប្រទេស និងដែលមានទំហំសេដ្ឋកិច្ចធំជាមួយចិន។ ប៉ុន្តែ ភាគីទាំងពីរមានភាពតានតឹងជុំវិញវិស័យរថយន្តអគ្គិសនីដែលឧបត្ថម្ភធនយ៉ាងច្រើនរបស់រដ្ឋាភិបាលចិនលើឧស្សាហកម្មដែលកំពុងរីកចម្រើននេះ។

រដ្ឋាភិបាលទីក្រុងប៉េកាំងបានប្រឹងប្រែងរក្សាទំនាក់ទំនងល្អជាមួយភាគីអឺរ៉ុប ដោយសារតែចិនយល់ថាអឺរ៉ុបជាដៃគូពាណិជ្ជកម្មដែលខ្លួនអាចទុកចិត្តបាន និងជាទីផ្សារជំនួសសម្រាប់សហរដ្ឋអាមេរិក ខណៈដែលសេដ្ឋកិច្ចពិភពលោកប្រឈមនឹងហានិភ័យនៃការធ្លាក់ចុះសេដ្ឋកិច្ចដែលបណ្តាលមកពីពន្ធគយរបស់ប្រធានាធិបតី ដូណាល់ ត្រាំ។

ប្រធានាធិបតីបារាំង បានប្រាប់សមភាគី ស៊ី ជីនពីង ក្នុងអំឡុងពេលកិច្ចប្រជុំកាលពីថ្ងៃព្រហស្បតិ៍នៅឯមហាសាលប្រជាជននៃទីក្រុងប៉េកាំងថា «ឥឡូវនេះ សំខាន់ជាងពេលណាទាំងអស់ ការសន្ទនារវាងចិន និងបារាំងគឺមានសារៈសំខាន់។ ខ្ញុំស្នើរបៀបវារៈវិជ្ជមានបីដងសម្រាប់ទំនាក់ទំនងរបស់យើង ស្ថិរភាពភូមិសាស្ត្រនយោបាយ តុល្យភាពសេដ្ឋកិច្ច និងនិរន្តរភាពបរិស្ថាន»។

សម្រាប់ជម្លោះនៅប្រទេសអ៊ុយក្រែន សហរដ្ឋអាមេរិកក្នុងរដ្ឋបាលរបស់ប្រធានាធិបតី ដូណាល់ ត្រាំ កំពុងប្រឹងប្រែងដើម្បីរកច្រកចេញពីសង្គ្រាមដោយការសម្របសម្រួលជាមួយភាគីជម្លោះ គឺអ៊ុយក្រែននិងរុស្ស៊ីដើម្បីសម្រេចបានកិច្ចព្រមព្រៀងសន្តិភាព៕

រ៉ាន់ រើយ