ព័ត៌មានអន្ដរជាតិ

លោក Wang Yi ៖ UN មិនល្អឥតខ្ចោះ តែបើគ្មាន UN ពិភពលោកនឹងកាន់តែអាក្រក់

បានផុស

៣៩ វិនាទី មុន

នៅ

ថ្ងៃអង្គារ ២១ កក្កដា ២០២៦

ដោយ

រដ្ឋមន្ត្រីការបរទេសចិន លោក Wang Yi បានប្រាប់ លោកស្រី Carolyn Rodrigues-Birkett ជាបេក្ខជនបន្ទាប់ សម្រាប់តំណែងអគ្គលេខាធិការអង្គការសហប្រជាជាតិ(UN) កាលពីថ្ងៃចន្ទ ថា ទោះបីជា UN មិនល្អឥតខ្ចោះ ប៉ុន្តែបើគ្មាន UN ពិភពលោកនឹងកាន់តែមានសភាពអាក្រក់ទៅៗ។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋ CGTN ។

ក្នុងកិច្ចប្រជុំមួយនៅទីក្រុងប៉េកាំង លោក Wang បានលើកឡើងថា ភាគីទាំងអស់រំពឹងថា ប្រមុខ UN បន្ទាប់នឹងដឹកនាំអង្គការនេះប្រឈមនឹងការលំបាក បញ្ហានានា ដើរតួនាទីក្នុងបុព្វហេតុនៃសន្តិភាព និងការអភិវឌ្ឍអន្តរជាតិ។

រដ្ឋមន្ត្រីការបរទេសចិន លោក Wang Yi ។ រូបភាព៖ AA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បានបន្ថែមថា ប្រទេសចិនតែងតែគោរពតាមគោលបំណង និងគោលការណ៍នៃធម្មនុញ្ញ UN ហើយគាំទ្រយ៉ាងមុតមាំ ចំពោះបុព្វហេតុនៃអង្គការសហប្រជាជាតិ។

លោក Wang បន្តថា៖ « ប្រទេសចិនតែងតែជាប្រទេសមួយដែលនឹងបន្តជាអ្នកកសាងសន្តិភាពពិភពលោក ជាអ្នករួមចំណែកដល់ការអភិវឌ្ឍសកល និងជាអ្នកការពារសណ្តាប់ធ្នាប់អន្តរជាតិ។ ទីក្រុងប៉េកាំងនឹងចូលរួមក្នុងការបោះឆ្នោតជ្រើសរើសអគ្គលេខាធិការប្រកបដោយការទទួលខុសត្រូវ និងស្ថាបនា»។

ចំណែក លោកស្រី Rodrigues-Birkett មានប្រសាសន៍ថា៖ « មិនថាស្ថានភាពវិវត្តន៍យ៉ាងណានោះទេ ពហុភាគីនិយមមិនមែនជាជម្រើស ប៉ុន្តែជាកាតព្វកិច្ចសម្រាប់សហគមន៍អន្តរជាតិ»។

លោកស្រីបន្ថែមថា លោកស្រីនឹងបន្តជំរុញកំណែទម្រង់ UN ដើម្បីធ្វើឱ្យវាកាន់តែមានភាពរហ័សរហួន និងមានប្រសិទ្ធភាព ដើម្បីរក្សាភាពយុត្តិធម៌ និងដាក់ការអភិវឌ្ឍប្រកបដោយចីរភាព។

គួរបញ្ជាក់ថា ការបោះឆ្នោតជ្រើសរើសអគ្គលេខាធិការលើកទី១០ របស់ UN នឹងធ្វើឡើងនៅឆ្នាំក្រោយ។ ប្រធានថ្មីនឹងចូលកាន់តំណែង នៅថ្ងៃដំបូងនៃឆ្នាំថ្មី និងបម្រើការងាររយៈពេល ៥ឆ្នាំ។ ចាប់តាំងពីការបង្កើត UN នៅឆ្នាំ១៩៤៥ មក គ្មានស្ត្រីណាម្នាក់បានបម្រើការជាអគ្គលេខាធិការឡើយ៕

សម្រួល៖ ណឺ មិនា