ព័ត៌មានអន្ដរជាតិ

សហភាពអឺរ៉ុប កំពុងផ្តួចផ្តើមឲ្យមានការដាក់ទណ្ឌកម្មលើសេដ្ឋកិច្ចរុស្ស៊ីសម្រាប់ជុំទី២១

បានផុស

៧ វិនាទី មុន

នៅ

ថ្ងៃព្រហស្បតិ៍ ២៣ កក្កដា ២០២៦

ដោយ

សង្រ្គាមរុស្ស៊ី-អ៊ុយក្រែនជាង៤ឆ្នាំកន្លងមកនេះនៅតែមានសភាពក្តៅគគុកនៅឡើយ ទោះបីជាអត្ថបទសារព័ត៌មានមួយចំនួនធំផ្តោតតែសង្រ្គាមនៅអ៊ីរ៉ង់ក៏ដោយ។ ប្រឈមសង្គ្រាមរុស្ស៊ីនិងអ៊ុយក្រែនកាន់តែក្តៅ កាលពីថ្ងៃព្រហស្បតិ៍ ឯកអគ្គរដ្ឋទូតសហភាពអឺរ៉ុប(EU) បានឈានដល់កិច្ចព្រមព្រៀងនយោបាយលើកញ្ចប់ទណ្ឌកម្មលើកទី២១ ប្រឆាំងនឹងប្រទេសរុស្ស៊ី។ នេះបើយោងតាមអ្នកការទូតសហភាពអឺរ៉ុបម្នាក់លើកឡើង និងចុះផ្សាយបន្តដោយទីភ្នាក់ងារសារព័ត៌មាន Reuters AFP និង France24 ។

កញ្ចប់នោះ ធ្លាប់ត្រូវបានពន្យារពេលដោយការជំទាស់ជាច្រើនពីរដ្ឋជាសមាជិក ដែលបានស្នើឡើង។

លោកស្រី Ursula von der Leyen ប្រធានគណៈកម្មការអឺរ៉ុប។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Antonio Costa ប្រធានក្រុមប្រឹក្សាអឺរ៉ុបបានបង្ហោះលើបណ្តាញសង្គម ថា៖ « កញ្ចប់ទណ្ឌកម្មលើកទី ២១ របស់យើង ផ្តោតលើវិស័យដែលមានផលប៉ះពាល់ខ្ពស់បំផុត ដូចជា ថាមពល សេវាកម្មហិរញ្ញវត្ថុ រូបិយប័ណ្ណគ្រីបតូ និងពាណិជ្ជកម្ម»។

អ្នកការទូតសហភាពអឺរ៉ុបពីររូបនិយាយថា៖ « កញ្ចប់នេះរួមមានការបង្កកលើដែនកំណត់តម្លៃប្រេងរបស់រុស្ស៊ីរយៈពេល ១២ខែ ក៏ដូចជាការលើកលែងរយៈពេលមួយឆ្នាំ អនុញ្ញាតឱ្យផ្ទេរឧស្ម័នធម្មជាតិរាវ (LNG) របស់រុស្ស៊ីទៅកាន់ប្រទេសទីបី ជាមួយនឹងការបន្តដោយស្វ័យប្រវត្តិ»។

លោកស្រី Ursula von der Leyen ប្រធានគណៈកម្មការអឺរ៉ុប និយាយថា៖ « នេះ[ទណ្ឌកម្ម] នឹងធានាថាសង្គ្រាមរបស់រុស្ស៊ី មិនទទួលបានអត្ថប្រយោជន៍ពីលើទីផ្សារទេ»។

អ្នកការទូតបន្តថា ឧបសគ្គចុងក្រោយត្រូវបានយកឈ្នះ បន្ទាប់ពីប្រទេសក្រិកត្រូវបានផ្តល់ការលើកលែងដែលអនុញ្ញាតឱ្យក្រុមហ៊ុនដឹកជញ្ជូនមួយរបស់ខ្លួនបន្តដឹកជញ្ជូនឧស្ម័នធម្មជាតិរាវរបស់រុស្ស៊ីពីតំបន់អាកទិក។

អ្នកការទូតសហភាពអឺរ៉ុបបន្ថែមថា៖ « រដ្ឋជាសមាជិកបានបង្ហាញសាមគ្គីភាពជាមួយប្រទេសក្រិក ហើយរំពឹងថាប្រទេសក្រិកនឹងធ្វើដូចគ្នាជាមួយប្រទេសដទៃទៀតនាពេលអនាគត»។

ឯកអគ្គរដ្ឋទូតមកពីរដ្ឋជាសមាជិកចំនួន២៧ របស់សហភាពអឺរ៉ុប បានប្រណាំងប្រជែងគ្នាចុះហត្ថលេខាលើកិច្ចព្រមព្រៀងមួយ ដើម្បីចាក់សោរតម្លៃលើការនាំចេញប្រេងឆៅរបស់រុស្ស៊ីនៅត្រឹម ៤៤ដុល្លារ មុនថ្ងៃផុតកំណត់ដែលអាចធ្វើឱ្យវាលោតឡើងបន្ត។

កញ្ចប់ថ្មីនេះក៏ផ្តោតលើវិស័យហិរញ្ញវត្ថុ និងរូបិយប័ណ្ណគ្រីបតូរបស់ទីក្រុងមូស្គូផងដែរ៕

ណឺ មិនា