ត្រាំ ឲ្យ Maduro ចេញពីតំណែង ខណៈរុស្ស៊ី និងចិនគាំទ្រ វេណេស៊ុយអេឡា ពេញទំហឹង

ប្រធានាធិបតីសហរដ្ឋអាមេរិក ដូណាល់ ត្រាំ កាលពីថ្ងៃចន្ទទី២២ធ្នូ បានចេញការព្រមានថ្មីមួយដល់លោកនីកូឡាស ម៉ាឌូរ៉ូ ដោយថា វាជាការឆ្លាតវៃសម្រាប់មេដឹកនាំវេណេស៊ុយអេឡាក្នុងការចុះចេញពីតំណែង ខណៈដែលទីក្រុងវ៉ាស៊ីនតោនកំពុងបង្កើនយុទ្ធនាការដាក់សម្ពាធ ដែលទទួលបានការស្តីបន្ទោសយ៉ាងខ្លាំង ពីរុស្ស៊ី និងចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម aljazeera នៅក្នុងកិច្ចសម្ភាសន៍ជាមួយអ្នកយកព័ត៌មាននៅឯភូមិគ្រឹះ Mar-a-Lago ក្នុងរដ្ឋផ្លរីដា ត្រាំនិយាយថា លោកបានត្រៀមខ្លួនរួចជាស្រេចដើម្បីបង្កើនភាពតានតឹងបន្ថែមទៀត បន្ទាប់ពីមានសម្ពាធកើនឡើងរយៈពេល៤ខែលើទីក្រុងការ៉ាកាស។

មេ​ដឹក​នាំ​អាមេរិក​បាន​ថ្លែង​ប្រាប់អ្នកយកព័ត៌មានថា «ខ្ញុំគិតថាវាជាការឆ្លាតវៃសម្រាប់គាត់ ក្នុងការចុះចេញពីតំណែងមួយនេះ។ ប៉ុន្តែប្រសិនបើគាត់ចង់ធ្វើអ្វីមួយ ឬបើគាត់ចង់លេងវាឲ្យខ្លាំងជាងនេះ នោះនឹងក្លាយជាវិធីលេងលើកចុងក្រោយរបស់គាត់ក៏ថាបានដែរ»។

លោកត្រាំបានបន្ថែមការគំរាមកំហែងចុងក្រោយ ខណៈដែលឆ្មាំសមុទ្រសហរដ្ឋអាមេរិក បានបន្តដេញតាមនាវាដឹកប្រេងទីបី ដែលខ្លួនបានពិពណ៌នាថាជាផ្នែកមួយនៃ «កងនាវាងងឹត» របស់វេណេស៊ុយអេឡាប្រើប្រាស់ដើម្បីគេចវេសពីទណ្ឌកម្មរបស់អាមេរិក។

បើទោះជាបែបណាក៏ដោយ វេណេស៊ុយអេឡាបដិសេធការជាប់ពាក់ព័ន្ធណាមួយនៅក្នុងការជួញដូរគ្រឿងញៀន ហើយអះអាងថា ទីក្រុងវ៉ាស៊ីនតោនកំពុងស្វែងរកការផ្តួលរំលំលោកម៉ាឌូរ៉ូ ដើម្បីដណ្តើមយកទុនបំរុងប្រេងក្នុងប្រទេស ដែលជាប្រទេសធំជាងគេបំផុតរបស់ពិភពលោក។ ជាងនេះទៀត ទីក្រុងការ៉ាកាសបានថ្កោលទោសការរឹបអូសនាវារបស់សហរដ្ឋអាមេរិកថា ជាទង្វើនៃចោរសមុទ្រអន្តរជាតិ។

ដោយឡែក រដ្ឋមន្ត្រីការបរទេសរុស្ស៊ី លោក Sergei Lavrov បានសម្តែងការព្រួយបារម្ភយ៉ាងខ្លាំង លើប្រតិបត្តិការការ៉ាប៊ីនរបស់វ៉ាស៊ីនតោន ដោយពាំនាំសេចក្តីថ្លែងការណ៍ពីក្រសួងការបរទេសរុស្ស៊ីថា ទីក្រុងមូស្គូសូមបញ្ជាក់ជាថ្មីនូវការគាំទ្រ និងសាមគ្គីភាពយ៉ាងពេញទំហឹងរបស់ខ្លួនចំពោះថ្នាក់ដឹកនាំ និងប្រជាជនវេណេស៊ុយអេឡានៅក្នុងបរិបទបច្ចុប្បន្ន។

ងាកមកកាន់ប្រទេសចិនឯណោះវិញ ក៏បានថ្កោលទោសសកម្មភាពចុងក្រោយរបស់អាមេរិកថា ជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិ។ ក្នុងនោះដែរ លោក Lin Jian អ្នកនាំពាក្យក្រសួងការបរទេសចិន ថា ទីក្រុងប៉េកាំង សូមប្រឆាំងនឹងសកម្មភាពណាមួយដែលរំលោភលើគោលបំណង និងគោលការណ៍នៃធម្មនុញ្ញអង្គការសហប្រជាជាតិ និងរំលោភលើអធិបតេយ្យភាព និងសន្តិសុខរបស់ប្រទេសដទៃទៀត៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

រុស្ស៊ី បញ្ជាក់ជំហរគាំទ្រ វេណេស៊ុយអេឡា ហ៊ានប្រឈមមុខតតាំងជាមួយ អាមេរិក