ព្យុះភ្លៀងនឹងបន្តអូសបន្លាយ វាយប្រហារភាគខាងត្បូងប្រទេសថៃ ពេញមួយសប្តាហ៍នេះ

នាយកដ្ឋានឧតុនិយមថៃ បានចេញការព្រមានជាថ្មីម្តងទៀត អំពីព្យុះភ្លៀងដែលនឹងបន្តអូសបន្លាយវាយប្រហារភាគខាងត្បូង ពេញមួយសប្តាហ៍នេះតែម្តង ខណៈតំបន់ខ្លះនឹងត្រូវរងគ្រោះធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod កាលពីថ្ងៃចន្ទទី២២ខែធ្នូឆ្នាំ២០២៥ ខេត្តភាគខាងត្បូងប្រទេសថៃ ជាពិសេស Surat Thani នឹងរងគ្រោះខ្លាំងដោយព្យុះភ្លៀង ជាមួយកម្លាំងខ្យល់បក់ខ្លាំង រហូតដល់ថ្ងៃអាទិត្យទី២៨។

ក្រៅពីនេះ ខេត្ត Nakhon Si Thammarat ក៏ទទួលរងនូវឥទ្ធិពលព្យុះភ្លៀងនេះដែរ ស្របពេលមានការព្រមានថា បូករួមជាមួយកម្លាំងខ្យល់បក់, ទឹករលកសមុទ្រអាចមានកម្ពស់ខ្ពស់រហូតដល់ទៅជាង១ម៉ែត្រទៅ២ម៉ែត្រឯណោះ។

យោងតាមនាយកដ្ឋាន, ឥទ្ធិពលនៃព្យុះនេះគឺបណ្តាលមកពី កម្លាំងខ្យល់មូសុងឦសានកាន់តែខ្លាំងដែលគ្របដណ្តប់ឈូងសមុទ្រថៃ តំបន់ភាគខាងត្បូង និងសមុទ្រអាន់ដាម៉ាន់។

មិនមែនត្រឹមតែព្យុះភ្លៀងទេ នាយកដ្ឋានក៏ព្រមានអំពីបាតុភូតផ្គររន្ទះ និងខ្យល់កន្ត្រាក់ផងដែរនៅតាមបណ្តាខេត្តភាគខាងត្បូង។ 

ព្យុះភ្លៀងនេះកើតឡើង បន្ទាប់ពីខេត្តភាគខាងត្បូងចំនួន៧ត្រូវវាយប្រហារខ្លាំងដោយព្យុះមូសុង ក្នុងនោះ មាន៤ខេត្តដូចជា Songkhla, Pattani, Yala និង Narathiwat ដែលរងគ្រោះធ្ងន់ធ្ងរជាងគេ។ 

ម្យ៉ាង គ្រោះធម្មជាតិចុងក្រោយនេះកើតឡើង ក្រោយពេលភាគខាងត្បូងប្រទេសថៃ ជាពិសេសស្រុក ហាតយ៉ៃ នៃខេត្ត សុងក្លា ទើបតែធូរស្រាលប៉ុណ្ណោះ ពីគ្រោះទឹកជំនន់ដ៏សាហាវ ដែលសម្លាប់មនុស្សរាប់រយនាក់។

ផ្អែកលើទិន្នន័យផ្លូវការចុងក្រោយពីអាជ្ញាធរថៃ, តួលេខមនុស្សស្លាប់ដោយសារគ្រោះទឹកជំនន់ដ៏សាហាវនៅភាគខាងត្បូងប្រទេស គឺមានចំនួន២៦៧នាក់ ដ្បិតពលរដ្ឋបន្ទោសរដ្ឋាភិបាលទីក្រុងបាងកកថា បិទបាំងតួលេខពិតក៏ដោយ៕

អត្ថបទ៖ សុខ សុវណ្ណ