លោកត្រាំជំរុញឲ្យ​មេ​ដឹកនាំ​អ៊ីស្រាអែល ឆាប់​អនុវត្ត​ដំណាក់កាល​ទី២ នៃ​ផែនការសន្តិភាពហ្គាហ្សា

ប្រធានាធិបតីអាមេរិក លោក ដូណាល់ ត្រាំ នឹងជួបពិភាក្សាជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ នៅរីសត Mar-a-Lago នាថ្ងៃចន្ទ​ទី​២៩​ខែ​ធ្នូ​ឆ្នាំ​២០២៥​នេះ ដើម្បីជំរុញឲ្យមានការឈានទៅដល់​​ដំណាក់កាលទី​២ នៃកិច្ចព្រមព្រៀងឈប់បាញ់នៅតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម​ AFP ជំនួបដ៏សំខាន់នេះកើតឡើងចំពេលដែលមានការព្រួយបារម្ភថា ទាំងភាគីអ៊ីស្រាអែល និងក្រុមហាម៉ាស កំពុងអនុវត្តយឺតយ៉ាវក្នុងដំណាក់កាលទី២ ដែលតម្រូវឲ្យអ៊ីស្រាអែលដកទ័ពចេញពីហ្គាហ្សា និងតម្រូវឲ្យក្រុមហាម៉ាសទម្លាក់អាវុធទាំងស្រុង។ លោកត្រាំ មានបំណងចង់ប្រកាសពីការបង្កើតរដ្ឋាភិបាលបច្ចេកទេសប៉ាឡេស្ទីន និងការដាក់ពង្រាយកងកម្លាំងរក្សាសន្តិភាពអន្តរជាតិ នៅដើមខែមករាខាងមុខ។

ទោះជាយ៉ាងណា លោកណេតាន់យ៉ាហ៊ូ ត្រូវបានគេរំពឹងថា នឹងព្យាយាមបង្វែរការយកចិត្តទុកដាក់ទៅលើបញ្ហា អ៊ីរ៉ង់ វិញ។ លោកគ្រោងនឹងជំរុញឲ្យអាមេរិកបង្កើនការវាយប្រហារលើកម្មវិធីនុយក្លេអ៊ែររបស់ទីក្រុងតេហេរ៉ង់ ដោយលើកឡើងថា អ៊ីរ៉ង់គឺជាការគំរាមកំហែងមិនត្រឹមតែចំពោះតំបន់មជ្ឈិមបូព៌ាប៉ុណ្ណោះទេ ប៉ុន្តែថែមទាំងចំពោះក្រុង​វ៉ាស៊ីនតោន​ផងដែរ។

អ្នកវិភាគយល់ថា ការផ្ដោតលើបញ្ហាអ៊ីរ៉ង់នេះ គឺជាយុទ្ធសាស្ត្ររបស់លោកណេតាន់យ៉ាហ៊ូ ដើម្បីបង្វែរការរិះគន់ចំពោះការជាប់គាំងនៃសន្តិភាពនៅហ្គាហ្សា ខណៈដែលអ៊ីស្រាអែលរៀបនឹងចូលដល់ឆ្នាំបោះឆ្នោតរើស​មេ​ដឹកនាំ​ថ្មី៕

ប្រែសម្រួល៖ ឈាង