ព័ត៌មានអន្ដរជាតិ

ត្រាំ យកសីលធម៌ផ្ទាល់ខ្លួន ដើម្បីបញ្ឈប់សង្គ្រាមពិភពលោក

បានផុស

៤ ខែ មុន

នៅ

ថ្ងៃសុក្រ ៩ មករា ២០២៦

ដោយ

ប្រធានាធិបតីសហរដ្ឋអាមេរិក លោក ដូ ណាល់ត្រាំ បាននិយាយនៅក្នុងបទសម្ភាសន៍មួយដែលបានចេញផ្សាយកាលពីថ្ងៃព្រហស្បតិ៍ទី៨ ខែមករា ថា «សីលធម៌ផ្ទាល់ខ្លួន» របស់លោកគឺជាចន្ទល់តែមួយលើអំណាចផ្ទាល់ខ្លួនរបស់លោក ដើម្បីបញ្ជាឱ្យមានសកម្មភាពយោធានៅជុំវិញពិភពលោក។

យោងតាមសារព័ត៌មាន AFP ឱ្យដឹងថា ការអត្ថាធិប្បាយរបស់ លោក ត្រាំ ទៅកាន់កាសែត The New York Times បានកើតឡើងប៉ុន្មានថ្ងៃ បន្ទាប់ពីលោកត្រាំ បានបញ្ជាឲ្យបើកប្រតិបត្តិការផ្តួលរំលំមេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ និងបានគំរាមកំហែងដល់មេដឹកនាំនៃប្រទេសមួយចំនួនទៀត បូករួមទាំងដែនដី Greenland ផងដែរ។

អ្នកកាសែតបានសួរសំណួរទៅប្រធានាធិបតី ត្រាំ ថា តើមានដែនកំណត់អ្វីខ្លះលើអំណាចសកលរបស់លោកដែរឬអត់?

ប្រធានាធិបតី ដូណាល់ ត្រាំ ឆ្លើយភ្លាមថា៖« ត្រូវហើយរឿងដែលសំខាន់គឺខ្លួនខ្ញុំហ្នឹងឯង! វាគឺជាសីលធម៌ផ្ទាល់ខ្លួនរបស់ខ្ញុំ! គំនិតរបស់ខ្ញុំ! មានតែរបស់ទាំងអស់នោះទេ ដែលអាចបញ្ឈប់ខ្ញុំបាន»។

លោកបានសង្កត់ធ្ងន់ថា៖ «ខ្ញុំមិនត្រូវការច្បាប់អន្តរជាតិណាទាំងអស់។ ហើយខ្ញុំក៏មិនបានធ្វើឱ្យមនុស្សទាំងអស់រងការឈឺចាប់ដែរ»។

ប្រធានាធិបត ដូណាល់ ត្រាំ បានបន្ថែមថា៖ «ខ្ញុំគោរពច្បាប់អន្តរជាតិ ប៉ុន្តែវាអាស្រ័យលើនិយមន័យរបស់នរណាម្នាក់ ចំពោះច្បាប់អន្តរជាតិប៉ុណ្ណោះ»។

គួរឱ្យដឹងផងដែរថា សហរដ្ឋអាមេរិកមិនមែនជាសមាជិកនៃតុលាការឧក្រិដ្ឋកម្មអន្តរជាតិ (ICC) ដែលកាត់ទោសឧក្រិដ្ឋជនសង្គ្រាមនោះទេ ហើយខ្លួនបានច្រានចោលការសម្រេចរបស់តុលាការយុត្តិធម៌អន្តរជាតិ (ICJ) ដែលជាតុលាការកំពូលរបស់អង្គការសហប្រជាជាតិ។

លោក ត្រាំ ផ្ទាល់បានពាក់ព័ន្ធជាមួយច្បាប់ក្នុងស្រុក ដែលត្រូវបានគេចោទប្រកាន់ពីរដង ប្រឈមមុខនឹងសហព័ន្ធ រួមទាំងការឃុបឃិត ដើម្បីផ្តួលរំលំការបោះឆ្នោតឆ្នាំ២០២០ ដែលត្រូវបានទម្លាក់ចោល បន្ទាប់ពីការជាប់ឆ្នោតឡើងវិញរបស់លោក និងរឿងអាស្រូវមួយចំនួនទៀត។

ខណៈដែលលោកប្រកាសថា៖«ខ្លួនជាប្រធានាធិបតីដែលនាំមកនូវសន្តិភាព» និងស្វែងរករង្វាន់ណូបែល (Nobel Prize) ប៉ុន្តែលោកត្រាំបែរជាចាប់ផ្តើមប្រតិបត្តិការយោធាជាបន្តបន្ទាប់ នៅក្នុងអាណត្តិជាប្រធានាធិបតីលើកទី២របស់ខ្លួនទៅវិញ៕

ប្រែសម្រួល៖ ណឺ មិនា