ព័ត៌មានអន្ដរជាតិ

អាល្លឺម៉ង់ និងអ៊ីតាលីជំរុញឱ្យសហភាពអឺរ៉ុប ធ្វើកំណែទម្រង់ជាបន្ទាន់ ដើម្បីទីផ្សារសេរី

បានផុស

៦ ខែ មុន

នៅ

ថ្ងៃព្រហស្បតិ៍ ២២ មករា ២០២៦

ដោយ

អាល្លឺម៉ង់ និងអ៊ីតាលី នឹងជំរុញសមាជិកសហភាពអឺរ៉ុបធ្វើកំណែទម្រង់ឡើងវិញ នៅក្នុងកិច្ចប្រជុំកំពូលក្រៅផ្លូវការមួយនៅខែក្រោយ ដើម្បីសម្រួលនីតិវិធី និងកែលម្អការប្រកួតប្រជែង ឬហានិភ័យដែលធ្លាក់ចុះបន្ថែមទៀត នៅពីក្រោយសហរដ្ឋអាមេរិក និងចិន។ នេះបើតាមខ្លឹមសារក្នុងគោលនយោបាយដែលគ្រោងនឹងលើកឡើង។

នាយករដ្ឋមន្រ្តីអ៊ីតាលី និងនាយករដ្ឋមន្រ្តីអាល្លឺម៉ង់។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលនយោបាយត្រូវបានចេញផ្សាយដោយសារព័ត៌មានរ៉យទ័រ លើកឡើងថា៖ « ស្តង់ដាររស់នៅ និងអធិបតេយ្យភាពរបស់អឺរ៉ុបកំពុងជាប់គាំង ខណៈដែលដៃគូប្រកួតប្រជែងថ្មីបង្កើនឥទ្ធិពលជាសកលរបស់ពួកគេ ហើយគម្លាតរវាងអឺរ៉ុប អាមេរិក និងចិនកាន់តែឃ្លាតឆ្ងាយពីគ្នា»។

សេចក្តីថ្លែងការបន្ថែមថា៖ «ការបន្តនៅលើផ្លូវបច្ចុប្បន្នមិនមែនជាជម្រើសល្អទេ។ អឺរ៉ុបត្រូវតែធ្វើសកម្មភាពអ្វីមួយឥឡូវនេះ»។

មិនតែប៉ុណ្ណោះ ខ្លឹមសារក្នុងគោលនយោបាយត្រូវបានគូរឡើងដោយប្រធានក្រុមប្រឹក្សានៅច្រកទ្វារអន្តរជាតិក្នុងក្រុង Alden Biesen ប្រទេសបែលហ្សិក នៅថ្ងៃទី១២ ខែកុម្ភៈ។ ដូច្នេះហើយ ទើបទីប្រឹក្សាអាល្លឺម៉ង់ លោក Friedrich Merz និងនាយករដ្ឋមន្ត្រីអ៊ីតាលី លោកស្រី Giorgia Meloni កំពុងជំរុញឱ្យមានយុទ្ធសាស្រ្តមួយ ដែលធ្វើឡើងដោយសហភាពអឺរ៉ុប ដើម្បីសម្របសម្រួល និងគាំទ្រអាជីវកម្ម ក្នុងការទាក់ទាញការវិនិយោគ ជាពិសេសពង្រឹងទីផ្សារតែមួយ។

បន្ថែមពីនេះ ផែនការដែលបានលើកឡើងនឹងជំរុញឱ្យមេដឹកនាំប្រើប្រាស់កិច្ចប្រជុំ និងប្រមូលផ្តុំក្រុមប្រឹក្សាអឺរ៉ុប ដើម្បីយល់ព្រមលើការប្តេជ្ញាចិត្តជាក់ស្តែង ក្នុងខែមីនា។

ចំណែក លោកស្រី Meloni និងលោក Merz ក៏គ្រោងនឹងជួបប្រជុំគ្នានៅថ្ងៃសុក្រនៅទីក្រុងរ៉ូម សម្រាប់កិច្ចប្រជុំកំពូលទ្វេភាគី ដែលផែនការណ៍ Italo-German នឹងត្រូវបានដាក់បង្ហាញ នេះបើយោងតាមប្រភពរដ្ឋាភិបាលអ៊ីតាលីដែលបានលើកឡើងក្នុងលក្ខខណ្ឌមិនបញ្ចេញឈ្មោះ។

ក្នុងគោលការណ៍ក៏បានជំរុញឱ្យសហភាពអឺរ៉ុប(EU) ពន្លឿនកិច្ចចរចាពាណិជ្ជកម្មសេរីជាមួយដៃគូផ្សេងទៀត រួមមាន អូស្ត្រាលី ឥណ្ឌា អារ៉ាប់រួម និងសមាគមប្រជាជាតិអាស៊ីអាគ្នេយ៍ ខណៈគោលការណ៍ក៏បានរំឭក អឺរ៉ុបឱ្យត្រៀមខ្លួនជាស្រេច ដើម្បីប្រើប្រាស់ឧបករណ៍ពាណិជ្ជកម្មការពារប្រសិនបើចាំបាច់៕

ប្រែសម្រួល៖ ណឺ មិនា