ព័ត៌មានអន្ដរជាតិ

ក្រុងតូក្យូនឹងរងឥទ្ធិពលព្រិលធ្លាក់ខ្លាំង ចាប់ពីថ្ងៃនេះដល់ទី៣១

បានផុស

៥ ខែ មុន

នៅ

ថ្ងៃព្រហស្បតិ៍ ២៩ មករា ២០២៦

ដោយ

ប្រទេសជប៉ុនតែងតែជួបប្រទះនឹងការធ្លាក់ព្រិលខ្លាំងបំផុតក្នុងពិភពលោក ដោយសារអន្តរកម្មពិសេសរវាងខ្យល់ត្រជាក់ពីស៊ីបេរី (Siberia) និងសំណើមក្តៅពីសមុទ្រជប៉ុន ដែលគេតែងហៅថា «ឥទ្ធិពលព្រិលសមុទ្រជប៉ុន»។

នៅពេលដែលខ្យល់ត្រជាក់ស៊ីបេរី (Siberia) ឆ្លងកាត់សមុទ្រក្តៅនៃប្រទេសជប៉ុន វាស្រូបយកសំណើម បន្ទាប់មកប្រែទៅជាព្រិលស្ងួតខ្លាំងនៅពេលឆ្លងកាត់ភ្នំ ជាពិសេសនៅកោះ Honshu និងតំបន់ Hokkaido ។

ព្រិលធ្លាក់នៅក្រុងតូក្យូ ប្រទេសជប៉ុន។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណ៍នេះហើយ ទើបទីភ្នាក់ងារអាកាសធាតុជប៉ុនបានព្យាករថា ព្រិលអាចកកក្រាស់ខ្មឹកនៅកណ្តាលទីក្រុងតូក្យូ នៅយប់ថ្ងៃទី២៩ខែមករានេះ ដោយសារតែមានសម្ពាធទាបនៅតំបន់ភាគខាងត្បូង នៃតំបន់ Kanto ភាគខាងកើតរបស់ប្រទេស។

យោងតាម KYODO NEWS ឱ្យដឹងថា ទីភ្នាក់ងារឧតុនិយមជប៉ុនក៏បានព្រមានពីការធ្លាក់ព្រិលខ្លាំង នៅតំបន់ភាគឦសាន និងភាគខាងលិចតាមបណ្តោយឆ្នេរសមុទ្រជប៉ុន បណ្តាលឱ្យមានការរំខានដល់ចរាចរណ៍តាមដងផ្លូវ។

ភ្នាក់ងារនេះបន្តអំពាវនាវដល់សាធារណជនឱ្យមានការប្រុងប្រយ័ត្នចំពោះផ្លូវរអិល និងអាចមានភ្លៀងធ្លាក់ផងដែរ។

យោងតាមទីភ្នាក់ងារឧតុនិយមឱ្យដឹងទៀតថា ព្រិលធ្លាក់ខ្លាំងទំនងជាកើតឡើងនៅតំបន់ដែលកម្រមាន តាមឆ្នេរសមុទ្រប៉ាស៊ីហ្វិកភាគខាងកើតប្រទេសជប៉ុន រួមទាំងទីក្រុងតូក្យូ ក៏ដូចជានៅភាគខាងលិចប្រទេសរហូតដល់ថ្ងៃទី៣០ ខែមករា។

តែយ៉ាងណា ក្នុងរយៈពេល ២៤ម៉ោង រហូតដល់ម៉ោង ៦ព្រឹក នៅថ្ងៃទី ៣០ ខែមករា ផ្នែកខាងត្បូងនៃតំបន់ Kanto ទំនងមានព្រិលធ្លាក់រហូតដល់ ១សង់ទីម៉ែត្រ។

ទីភ្នាក់ងារជប៉ុនបន្ថែមទៀតថា ម៉ាស់ខ្យល់ត្រជាក់នឹងហូរចូលទៅក្នុងប្រជុំកោះនានា ហើយគំរូសម្ពាធរដូវរងាខ្លាំងនឹងបន្តកើតមាន៕

ប្រែសម្រួល៖ ណឺ មិនា