ការ​នាំ​ចេញ​ស្ករស និងអង្កររបស់ថៃ រង​ប៉ះពាល់ ក្រោយ​បម្រាម​របស់​ឥណ្ឌូណេស៊ី

យោងតាមបទប្បញ្ញត្តិថ្មីរបស់ក្រសួងពាណិជ្ជកម្មឥណ្ឌូណេស៊ីលេខ​៤៧/២០២៥ ដែលបានចូលជាធរមានកាលពីថ្ងៃទី​១​ខែមករា​ឆ្នាំ​២០២៦ ការនាំចូលទំនិញចំនួន​១២​ប្រភេទត្រូវបានហាមឃាត់ ដើម្បីគាំទ្រដល់គោលនយោបាយស្វ័យធានាស្បៀងរបស់ប្រធានាធិបតី Prabowo Subianto។ តាម​ការ​ចុះ​ផ្សាយ​របស់​ The Nation នា​ថ្ងៃ​ទី​១​​កុម្ភៈ​ វិធានការនេះបានដាក់សម្ពាធយ៉ាងខ្លាំងដល់វិស័យនាំចេញរបស់ប្រទេសថៃ ជាពិសេសស្ករស និងអង្ករ ដែលកន្លងមកឥណ្ឌូណេស៊ីគឺជាទីផ្សារដ៏ធំបំផុតមួយ។

កាលពីឆ្នាំ​២០២៥ ការនាំចេញស្ករសរបស់ថៃទៅកាន់ឥណ្ឌូណេស៊ីមានតម្លៃប្រហែល ៧២៥​លានដុល្លារ ខណៈដែលការនាំចេញអង្ករ​បានធ្លាក់ចុះយ៉ាងខ្លាំងរួចទៅហើយ ដោយសារឥណ្ឌូណេស៊ីសម្រេចបានអតិរេកផលិតកម្មក្នុងស្រុកជិត ៤លានតោន និងមានស្តុកបម្រុងទុកគ្រប់គ្រាន់សម្រាប់រយៈពេលជិត ៥ខែ។

ទោះបីជាមានបម្រាមលើការនាំចូលសម្រាប់បរិភោគផ្ទាល់ក៏ដោយ ក៏ឥណ្ឌូណេស៊ីនៅតែទុកផ្លូវសម្រាប់ការនាំចូលក្នុងវិស័យឧស្សាហកម្ម។ សម្រាប់ឆ្នាំ២០២៦ រដ្ឋាភិបាលឥណ្ឌូណេស៊ីបានកំណត់កូតានាំចូលស្ករឆៅសម្រាប់ឧស្សាហកម្មចំនួន ៣,១២លានតោន និងកូតាបន្ថែមជាង ៥០០ ០០០តោនសម្រាប់ការផលិតនាំចេញវិញ។

ចំពោះអង្ករ ការនាំចូលសម្រាប់បរិភោគត្រូវបានអនុញ្ញាតតែតាមរយៈសហគ្រាសរដ្ឋដូចជា Bulog ក្នុងករណីចាំបាច់សម្រាប់សន្តិសុខស្បៀងប៉ុណ្ណោះ ខណៈដែលអង្ករសម្រាប់ឧស្សាហកម្មត្រូវមានការអនុញ្ញាតជាមុន និងមិនអាចលក់ដោយផ្ទាល់ទៅកាន់អ្នកប្រើប្រាស់បានឡើយ។ បញ្ហានេះតម្រូវ​​ឲ្យ​អ្នកនាំចេញថៃត្រូវឆ្លងកាត់ប្រព័ន្ធ «អនុម័តការនាំចូល (PI)» ដ៏តឹងរ៉ឹង ដែលបច្ចុប្បន្នត្រូវបានរាយការណ៍ថាមានភាពយឺតយ៉ាវក្នុងការផ្តល់លិខិតអនុញ្ញាត។

ក្រៅពីកត្តាបម្រាមនាំចូល អ្នកនាំចេញថៃក៏កំពុងប្រឈមនឹងបញ្ហាប្រកួតប្រជែងដោយសារតម្លៃប្រាក់បាតឡើងថ្លៃ ដែលធ្វើ​ឲ្យ​ទំនិញកសិកម្មថៃមានតម្លៃថ្លៃជាងគូប្រជែងដូចជា ឥណ្ឌា និងវៀតណាម។ ក្រសួងពាណិជ្ជកម្មថៃបានព្យាករ​ថា ការនាំចេញអង្ករសរុបអាចនឹងធ្លាក់ចុះដល់ ៧​លានតោនក្នុងឆ្នាំ​២០២៦ ដែលជាការធ្លាក់ចុះ ១២,៥% ធៀបនឹងឆ្នាំមុន។ ដើម្បីឆ្លើយតបនឹងស្ថានភាពនេះ ភាគីថៃកំពុងរៀបចំយុទ្ធសាស្ត្រធ្វើពិពិធកម្មទីផ្សារ ដោយងាកទៅរកតំបន់មជ្ឈិមបូព៌ា និងអាហ្វ្រិក ក៏ដូចជាជំរុញការនាំចេញពូជអង្ករដែលមានតម្លៃខ្ពស់ដូចជា អង្ករ Hom Mali ដើម្បីកាត់បន្ថយការពឹងផ្អែកលើទីផ្សារឥណ្ឌូណេស៊ីដែលកំពុងរឹតបន្តឹង៕

ប្រែសម្រួល៖ ឈាង