ហ្សេលេនស្គី៖ ការ​ដោះស្រាយ​បញ្ហា​ទឹកដី ទាល់​ជួប​​ផ្ទាល់និយាយ​​ជាមួយ​ពូទីន

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បាន​ប្រកាស​កាលពីថ្ងៃសៅរ៍​ទី​៣១​ខែ​មករា​ឆ្នាំ​២០៦​ថា​ ទោះបីជាទីក្រុងកៀវ​បើកចំហចំពោះទម្រង់នៃការចរចាផ្សេងៗដែលមានការចូលរួមពីសហរដ្ឋអាមេរិក និងរុស្ស៊ីក៏ដោយ ក៏ជំនួបផ្ទាល់ជាមួយលោក វ៉ា្លឌីមៀរ ពូទីន គឺជាកត្តាចាំបាច់ដើម្បីដោះស្រាយ​បញ្ហា​ទឹកដី។

ក្នុងកិច្ចសម្ភាសន៍ជាមួយប្រព័ន្ធផ្សព្វផ្សាយ Český rozhlas Plus លោកហ្សេលេនស្គី បានសង្កត់ធ្ងន់ថា ទម្រង់ត្រីភាគីដែលរួមមានអ៊ុយក្រែន រុស្ស៊ី និង​អាមេរិក គឺជាតម្រូវការអប្បបរមាសម្រាប់វឌ្ឍនភាព ដោយលោកបានកត់សម្គាល់ថា ក្រុមការងាររដ្ឋបាលតែម្នាក់ឯងមិនអាចដោះស្រាយ «បញ្ហាដ៏ឈឺចាប់» បំផុតទាក់ទងនឹងបូរណភាពទឹកដីរបស់អ៊ុយក្រែនបានឡើយ។

លោកប្រធានាធិបតីបានបញ្ជាក់ថា ការចរចានៅពេលនេះកំពុងស្ថិតក្នុង «ដំណាក់កាលចុងក្រោយ» ទោះបីជាលោកបានព្រមានថា វានៅមិនទាន់ច្បាស់ថាតើលទ្ធផលចុងក្រោយនឹងអាចសម្រេចបានក្នុងពេលឆាប់ៗនេះឬយ៉ាងណាក៏ដោយ។ ចំណុចសំខាន់នៃកិច្ចព្រមព្រៀងដែលអាចកើតមានគឺការធានាសន្តិសុខ ដែលលោកហ្សេលេនស្គី បានលើកឡើងថា កិច្ចព្រមព្រៀងទ្វេភាគីជាមួយ​អាមេរិកគឺបានត្រៀមរួចរាល់១០០%​ហើយ ខណៈដែលសសរស្តម្ភទីពីរដែលពាក់ព័ន្ធនឹងសហភាពអឺរ៉ុប និង «សម្ព័ន្ធមិត្តស្ម័គ្រចិត្ត (Coalition of the Willing)» ក៏ជិតបញ្ចប់ផងដែរ។ លោកបានបញ្ជាក់យ៉ាងច្បាស់ថា ការចូលជាសមាជិកសហភាពអឺរ៉ុបនៅតែជាសមាសធាតុដែលមិនអាចចរចាបាននៃក្របខ័ណ្ឌសន្តិសុខរយៈពេលវែងរបស់អ៊ុយក្រែន។

លោកហ្សេលេនស្គី ក៏បាន​សង្កត់​ធ្ងន់​អំពីសំណើ «បទឈប់បាញ់ផ្នែកថាមពល» ដែលត្រូវបានពិភាក្សាដោយ​​អាមេរិកផងដែរ។ លោកបានបញ្ជាក់ថា ការផ្អាកការវាយប្រហារលើហេដ្ឋារចនាសម្ព័ន្ធថាមពលរយៈពេលមួយសប្តាហ៍ត្រូវបានគេយកមកពិចារណា ដើម្បីសម្រាលវិបត្តិមនុស្សធម៌ដែលបង្កឡើងដោយសីតុណ្ហភាពត្រជាក់ខ្លាំងក្នុងរដូវរងា។ ទោះជាយ៉ាងណាក៏ដោយ លោកហ្សេលេនស្គី បានបកស្រាយថា បទឈប់បាញ់បែបនេះគឺអាស្រ័យលើការដែលរុស្ស៊ីត្រូវបញ្ឈប់ការវាយប្រហាររបស់ខ្លួនជាមុនសិន ដោយសារទីក្រុងមូស្គូនាពេលថ្មីៗនេះបានប្តូរគោលដៅវាយប្រហារពីទីតាំងថាមពលមកលើប្រព័ន្ធដឹកជញ្ជូន និងមជ្ឈមណ្ឌលស៊ីវិលវិញ ទោះបីជាមានការជ្រៀតជ្រែកពី​អាមេរិកក៏ដោយ៕

ប្រែសម្រួល៖ ឈាង