កូរ៉េ​ខាង​ជើង​ព្រមានពី «ការ​ឆ្លើយតប​ដ៏​គួរ​ឲ្យ​រន្ធត់» ក្នុង​វិវាទ​ដ្រូន​ជាមួយ​ក្រុង​សេអ៊ូល

វិវាទដ្រូនដ៏តានតឹងរវាងកូរ៉េទាំងពីរបានឈានដល់ចំណុចកំពូលនៅថ្ងៃទី១៣​ខែកុម្ភៈនេះ ដោយលោកស្រី Kim Yo Jong របស់ទីក្រុងព្យុងយ៉ាង បានព្រមានពី «ការឆ្លើយតបដ៏គួរឲ្យរន្ធត់» បើមានដ្រូនកូរ៉េខាងត្បូងហោះឆ្លងកាត់ព្រំដែនម្តងទៀត។

ការព្រមានចុងក្រោយនេះ ធ្វើឡើងបន្ទាប់ពីមានករណីបាញ់ទម្លាក់ដ្រូនស៊ើបការណ៍មួយនៅជិតមជ្ឈមណ្ឌលឧស្សាហកម្ម Kaesong កាលពីខែមករា ដែលកូរ៉េ​ខាងជើងចាត់ទុកថាជាការរំលោភលើអធិបតេយ្យភាពរបស់​ខ្លួន។ បន្ថែម​ពី​នេះ ប្អូន​ស្រី​ដ៏​មាន​ឥទ្ធិពល​​របស់​មេ​ដឹកនាំ​កូរ៉េ​ខាង​ជើង បាន​រក្សាជំហរដាច់ខាតថា ក្រុង​ព្យុងយ៉ាង​មិនខ្វល់ទេថា «អ្នកបញ្ជា» នោះជាជនស៊ីវិល ឬជាទាហានឡើយ។

ប្រធានាធិបតីកូរ៉េខាងត្បូង លោក Lee Jae Myung ដែលបានយកការផ្សះផ្សាទំនាក់ទំនងជាមួយប្រទេសជិតខាងដែលមានអាវុធនុយក្លេអ៊ែរជាអាទិភាព កំពុងប្រឈមមុខនឹងបញ្ហាក្នុងស្រុកយ៉ាងខ្លាំង។ ទោះបីជាមានការបដិសេធដំបូងថា​មិនមានការពាក់ព័ន្ធជាផ្លូវការក៏ដោយ ក៏ក្រុមការងារចម្រុះយោធា និងប៉ូលិសបានងាកមកស៊ើបអង្កេតលើទាហានកំពុងបំពេញការងារចំនួន៣​នាក់ និងបុគ្គលិកទីភ្នាក់ងារស៊ើបការណ៍សម្ងាត់ម្នាក់។ កាលពីថ្ងៃទី១០​ខែកុម្ភៈ អ្នកស៊ើបអង្កេតបានឆ្មក់ឆែកឆេរទីតាំងចំនួន១៨ រួមទាំងការិយាល័យសន្តិសុខខ្ពស់នៃបញ្ជាការដ្ឋានស៊ើបការណ៍ការពារជាតិ និងទីភ្នាក់ងារស៊ើបការណ៍សម្ងាត់ជាតិ (NIS) ដើម្បីស្វែងរកការពិតនៅពីក្រោយការហោះហើរដែលគ្មានការអនុញ្ញាតនេះ។

រឿងរ៉ាវដ្រូននេះកំពុងគំរាមកំហែងដល់កិច្ចការការទូតរបស់លោកប្រធានាធិបតី Lee ហើយអាចរុញច្រានឧបទ្វីបកូរ៉េ​ឲ្យ​ទៅរកមាត់ជ្រោះ​នៃជម្លោះម្តងទៀត។ សាររបស់លោកស្រី Yo Jong តាមរយៈទីភ្នាក់ងារសារព័ត៌មានរដ្ឋ KCNA គឺជាការរំលឹកយ៉ាងច្បាស់អំពីសន្តិភាពដ៏ផុយស្រួយ ដោយព្រមាន​អាជ្ញាធរ​កូរ៉េ​ខាង​ត្បូង​​ឲ្យ​បង្ការកុំ​ឲ្យ​ «ទង្វើដ៏ល្ងង់ខ្លៅ» បែបនេះកើតឡើងម្តងទៀត។ ទីក្រុងសេអ៊ូលកំពុងជីកកកាយរកជនដៃដល់នៅក្នុងប្រព័ន្ធស៊ើបការណ៍របស់ខ្លួន ខណៈ​​ការព្រមានរបស់កូរ៉េខាងជើងគឺជាការបញ្ជាក់​ថា ការរំលោភព្រំដែនលើកក្រោយនឹងមិនត្រូវដោះស្រាយដោយត្រឹមតែពាក្យសម្តីនោះទេ៕

ប្រែសម្រួល៖ ឈាង