ថៃ នឹងជួបព្យុះខែប្រាំង លាយឡំរន្ទះបាញ់ ដល់ដើមសប្តាហ៍ក្រោយ

នាយកដ្ឋានឧតុនិយមថៃ បានចេញការព្រមានអំពីព្យុះខែប្រាំងនៅចុងសប្តាហ៍នេះដល់ដើមសប្តាហ៍ក្រោយ ខណៈក្នុងនោះមានខេត្តចំនួន១៥ដែលនឹងមានភ្លៀងធ្លាក់ខ្លាំង លាយឡំជាមួយខ្យល់កន្ត្រាក់និងរន្ទះបាញ់។

តាមការផ្សាយរបស់ Khaosod នៅថ្ងៃសៅរ៍ទី២១ខែកុម្ភៈ, ខេត្តទាំង១៥មានដូចជា Mae Hong Son, Chiang Mai, Chiang Rai, Lamphun, Lampang, Phayao, Nan, Tak, Chumphon, Surat Thani, Nakhon Si Thammarat, Pattani, Yala, Trang និង Satun។

នៅភាគខាងត្បូង សមុទ្រអាចមានរលកធំៗកម្ពស់ប្រហែល ២ ម៉ែត្រ ជាពិសេសនៅតំបន់ដែលមានភ្លៀងធ្លាក់ ដូច្នេះអ្នកនេសាទ និងអ្នកធ្វើដំណើរតាមសមុទ្រត្រូវមានការប្រុងប្រយ័ត្នខ្ពស់។

ដោយសារតែហានិភ័យគ្រោះថ្នាក់ ប្រជាពលរដ្ឋត្រូវបានណែនាំ ឲ្យប្រុងប្រយ័ត្នចំពោះគ្រោះថ្នាក់ដែលបង្កឡើងដោយខ្យល់កន្ត្រាក់ និងរន្ទះបាញ់។

មុននេះ បញ្ជាការដ្ឋានបង្ការ និងកាត់បន្ថយគ្រោះមហន្តរាយជាតិថៃ (NDPMC) ក៏បានបង្គាប់រួចហើយផងដែរ​ឲ្យ​បណ្តាខេត្តទាំងអស់ក្នុងប្រទេស ត្រូវបង្កើនការត្រៀមលក្ខណៈសម្រាប់គ្រោះរាំងស្ងួតឆ្នាំ២០២៦ ដោយផ្តល់អាទិភាពខ្ពស់លើការបម្រុងទឹកសម្រាប់ប្រើប្រាស់ក្នុងគ្រួសារ។

ថៃព្រមានថា ស្ថានភាពស្ងួតហួតហែងចាប់ពីពាក់កណ្តាលខែមករាដល់ពាក់កណ្តាលខែឧសភា អាចបង្ក​ឲ្យ​មានការខ្វះខាតទឹកយ៉ាងធ្ងន់ធ្ងរ ជាពិសេសប៉ះពាល់ដល់វិស័យកសិកម្មនៅក្រៅតំបន់ស្រោចស្រព និងការផលិតទឹកស្អាត។

ដូច្នេះជាការឆ្លើយតប បណ្តាខេត្តត្រូវបង្កើតក្រុមការងារតាមដានកម្រិតទឹក និងរៀបចំផែនការបម្រុងទុក​ឲ្យ​ស្របតាមស្ថានភាពជាក់ស្តែងក្នុងមូលដ្ឋាន៕

អត្ថបទ៖ សុខ សុវណ្ណ