ថៃ​ត្រៀមបង្ការគ្រោះរាំងស្ងួតទូទាំង​ប្រទេស​សម្រាប់​ឆ្នាំ​២០២៦

បញ្ជាការដ្ឋានបង្ការ និងកាត់បន្ថយគ្រោះមហន្តរាយជាតិ (NDPMC) បានបង្គាប់​ឲ្យ​បណ្តាខេត្តទាំងអស់ក្នុងប្រទេសថៃ បង្កើនការត្រៀមលក្ខណៈសម្រាប់គ្រោះរាំងស្ងួតឆ្នាំ២០២៦ ដោយផ្តល់អាទិភាពខ្ពស់លើការបម្រុងទឹកសម្រាប់ប្រើប្រាស់ក្នុងគ្រួសារ។

តាម​ការ​ផ្សាយ​របស់​ The Nation នាថ្ងៃទី​២០​ខែ​កុម្ភៈ​ឆ្នាំ​២០២៦ នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក Anutin Charnvirakul បានព្រមានថា ស្ថានភាពស្ងួតហួតហែងចាប់ពីពាក់កណ្តាលខែមករាដល់ពាក់កណ្តាលខែឧសភា អាចបង្ក​ឲ្យ​មានការខ្វះខាតទឹកយ៉ាងធ្ងន់ធ្ងរ ជាពិសេសប៉ះពាល់ដល់វិស័យកសិកម្មនៅក្រៅតំបន់ស្រោចស្រព និងការផលិតទឹកស្អាត។ ជាការឆ្លើយតប បណ្តាខេត្តត្រូវបង្កើតក្រុមការងារតាមដានកម្រិតទឹក និងរៀបចំផែនការបម្រុងទុក​ឲ្យ​ស្របតាមស្ថានភាពជាក់ស្តែងក្នុងមូលដ្ឋាន។

ដើម្បីធានាបាននូវការឆ្លើយតបឆាប់រហ័ស រដ្ឋាភិបាលកំពុងរួមបញ្ចូលធនធានពីយោធា វិស័យឯកជន និងរដ្ឋបាលមូលដ្ឋាន ដើម្បីត្រៀមលក្ខណៈ២៤ម៉ោងលើ២៤ម៉ោង នូវគ្រឿងចក្រសង្គ្រោះ រួមមានឡានដឹកទឹក និងម៉ាស៊ីនបូមទឹក។ អាជ្ញាធរត្រូវបានចាត់តាំង​ឲ្យ​ជួសជុលប្រព័ន្ធផ្គត់ផ្គង់ទឹកក្នុងសហគមន៍ និងបែងចែកទឹកដោយសមធម៌ ព្រមទាំងជំរុញ​ឲ្យ​សាធារណជនចេះសន្សំសំចៃទឹក។ បន្ថែមពីនេះ កម្លាំងរដ្ឋបាល និងសន្តិសុខនឹងត្រូវតាមដានទប់ស្កាត់បទល្មើសផ្សេងៗក្នុងរដូវប្រាំង ដូចជា ការលួចម៉ាស៊ីនបូមទឹក និងបង្ការជម្លោះក្នុងសហគមន៍ជុំវិញការប្រើប្រាស់ទឹកកសិកម្ម។

លោក Teerapat Katchamat អគ្គនាយកនៃនាយកដ្ឋានបង្ការ និងកាត់បន្ថយគ្រោះមហន្តរាយ (DDPM) បានបញ្ជាក់ថា មជ្ឈមណ្ឌលតំបន់ទាំង១៨ បានត្រៀមខ្លួនរួចជាស្រេចជាមួយឧបករណ៍ជំនាញ រួមមានរថយន្តផលិតទឹកផឹក និងឧបករណ៍បូមទឹកចម្ងាយឆ្ងាយ។ លោក Anutin បានផ្តល់ទំនុកចិត្តដល់សាធារណជនថា វិធានការដ៏ទូលំទូលាយទាំងនេះ គឺដើម្បីធានា​ឲ្យ​មានទឹកផឹក និងទឹកប្រើប្រាស់គ្រប់គ្រាន់រហូតដល់ចប់រដូវប្រាំង៕

ប្រែសម្រួល៖ ឈាង