អាមេរិក​ព្រមានក្រុមគ្រឿងញៀនម៉ិកស៊ិក បន្ទាប់ពីមេខ្លោង «El Mencho» ត្រូវបានសម្លាប់

សេតវិមានបានចេញការព្រមានយ៉ាងធ្ងន់ធ្ងរដល់ក្រុមគ្រឿងញៀនម៉ិកស៊ិក មិន​ឲ្យ​ប៉ះពាល់​ប្រជាជនអាមេរិក ចំពេលមានរលកអំពើហិង្សាកើតឡើង បន្ទាប់ពីការស្លាប់របស់មេដឹកនាំក្រុម​ Jalisco New Generation គឺលោក Nemesio Oseguera Cervantes រហស្សនាម​ថា «El Mencho» កាលពីថ្ងៃអាទិត្យ នៅរដ្ឋ Jalisco ក្នុងប្រតិបត្តិការរបស់អាជ្ញាធរម៉ិកស៊ិក ដោយមានការគាំទ្រផ្នែកចារកម្មពីសហរដ្ឋអាមេរិក។

តាម​ការ​ផ្សាយ​របស់ EuroNews អ្នក​នាំ​ពាក្យ​សេតវិមាន អ្នកស្រី Karoline Leavitt កាល​ពីថ្ងៃ​អង្គារ​ទី​២៤​ខែ​កុម្ភៈ បានបញ្ជាក់ថា ប្រតិបត្តិការនេះនឹងមិនអាចទៅរួចទេ បើគ្មានការដឹកនាំរបស់ប្រធានាធិបតី ដូណាល់ ត្រាំ ដែលបានចាត់ទុកក្រុមទាំងនេះជាអង្គការភេរវកម្មបរទេស។

អ្នកស្រី Leavitt បានលើកឡើងថា «ក្រុមគ្រឿងញៀនម៉ិកស៊ិកដឹងថា មិនត្រូវប៉ះពាល់សូម្បីតែម្រាមដៃ​ជនជាតិអាមេរិកម្នាក់​ណា​ឡើយ បើមិនដូច្នោះទេ ពួកគេនឹងត្រូវទទួលផលវិបាកធ្ងន់ធ្ងរ»។ បច្ចុប្បន្នមិនទាន់មាន​របាយការណ៍ថា​ ជនជាតិអាមេរិកណាម្នាក់រងគ្រោះថ្នាក់ទេ។ ក្រោយការស្លាប់របស់ El Mencho អំពើហិង្សាបានរីករាលដាល​ពាស​ពេញ​​រដ្ឋ​ចំនួន​២០​ក្នុងប្រទេសម៉ិកស៊ិក បណ្តាល​ឲ្យ​កងកម្លាំងជាតិ២៥​នាក់ និងសមាជិកក្រុមគ្រឿងញៀនយ៉ាងតិច​៣០​នាក់ស្លាប់ ខណៈមានការដុតបំផ្លាញរថយន្ត និងបិទផ្លូវសហព័ន្ធប្រហែល​២៥០​កន្លែង ដែលធ្វើ​ឲ្យ​ភ្ញៀវទេសចរអាមេរិករាប់ពាន់​នាក់ជាប់គាំង។

ក្រសួងការបរទេស​អាមេរិកបានបង្កើតខ្សែទូរសព្ទជំនួយ​២៤​ម៉ោង ដើម្បីជួយដល់ពលរដ្ឋខ្លួនដែលរងផលប៉ះពាល់ ស្រប​ពេល​ដែល​ទីក្រុងវ៉ាស៊ីនតោនបន្តរុញច្រានរដ្ឋាភិបាលម៉ិកស៊ិក​ឲ្យ​បញ្ចប់ការហូរចូលនៃគ្រឿងញៀនតាមព្រំដែនភាគខាងត្បូង។ ក្នុងប្រតិបត្តិការនេះ សមាជិកក្រុមគ្រឿងញៀន​៤​នាក់ត្រូវបានសម្លាប់ ៣​នាក់រងរបួស និង ២​នាក់ត្រូវបានចាប់ខ្លួន។ គួរបញ្ជាក់ថា កន្លងមក​អាមេរិកធ្លាប់បានផ្តល់ប្រាក់រង្វាន់រហូតដល់​១៥​លានដុល្លារ សម្រាប់ព័ត៌មានដែលនាំទៅដល់ការចាប់ខ្លួនមេខ្លោង El Mencho៕

ប្រែសម្រួល៖ ឈាង