កូនប្រុស​ពៅត្រាំពាក់​ក្រវ៉ាត់ក ផ្ទុយ​ពី​ត្រាំនិង​តំណាង​បក្ស ​ផ្ទុះការ​ចាប់អារម្មណ៍​ខ្លាំង​

កូនប្រុសពៅរបស់ប្រធានាធិបតីអាមេរិក លោក ដូណាល់ ត្រាំ គឺ លោក​ បារុន ត្រាំ (Barron Trump) បានទាក់ទាញ​ការ​ចាប់​អារម្មណ៍​ពី​​មហាជន​​ក្នុង​បណ្តាញ​សង្គម​ឲ្យ​ចូលមកវែកញែកព្រោងព្រាត ដោយសារតែរូបគេពាក់ក្រវ៉ាត់​ក​ពណ៌ ខៀវ​នៅក្នុងអំឡុងពេលថ្លែងសុន្ទរកថាស្តីពី​រដ្ឋស​​ហព័ន្ធ (State of Union) នៅ​ក្នុងសភា​​​អាមេរិក​​។ ​​​ភាព​ផ្ទុយគ្នា​នៅត្រង់ ពណ៌ក្រហមតំណាងឲ្យគណបក្សសាធារណរដ្ឋ​ លោក ដូណាល់ ត្រាំ តែ​ងតែ​ពាក់​​ជាប់​មិនដាច់​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សុន្ទរកថាស្តី​ពី​រដ្ឋសហព័ន្ធ​ ដែលជាសុន្ទរកថាដំបូងនៃអាណត្តិទីពីររបស់ប្រធានាធិបតីត្រាំ ដែលបានធ្វើឡើងនៅឯវិមានរដ្ឋសភា ឬ​ហៅថា «វិមានកាពីតូល»​របស់​សហរដ្ឋអាមេរិកក្នុងទីក្រុងវ៉ាស៊ីនតោនឌីស៊ី កាលពីយប់ថ្ងៃទី ២៤កុម្ភៈ ​ឆ្នាំ​២០២៦ ដោយមានការចូលរួមពីកូនៗទាំងអស់ រួមទាំងលោកជំទាវទីមួយ Melania Trump ផងដែរ។

នៅថ្ងៃនោះ កូនពៅលោកត្រាំគឺជាសមាជិកគ្រួសារតែម្នាក់គត់ដែលពាក់ក្រវ៉ាត់កពណ៌ខៀវ។ នៅក្នុងនយោបាយអាមេរិក ពណ៌ក្រហមត្រូវបានផ្សារភ្ជាប់ជាទូទៅជាមួយគណបក្សសាធារណរដ្ឋ និងពណ៌ខៀវជាមួយគណបក្សប្រជាធិបតេយ្យ ប៉ុន្តែក្មេងជំទង់នេះតែម្នាក់ឯងគត់ បានពាក់ក្រវ៉ាត់កដែលមានពណ៌ផ្ទុយ​ពីគេ​​ក្នុង​ជួរបក្ស​និង​គ្រុមគ្រួសារ​។

ដោយមិនរាប់បញ្ចូល ​លោក Barron កូនប្រុសផ្សេងទៀតដូចជា លោក Eric និងលោក Donald Jr. ស្វាមីរបស់កូនស្រីច្បង Ivanka រួមទាំងលោកត្រាំផងដែរនោះ សុទ្ធតែបានពាក់ក្រវ៉ាត់កពណ៌ក្រហម​។ ចំណែកមន្ត្រីរដ្ឋបាលកំពូលៗដូចជាប្រធានបុគ្គលិកសេតវិមាន លោក​ Susie Wiles ក៏ប្រើពណ៌មិនខុសគ្នាដែរ។

បន្ទាប់ពីរូបភាពនិងវីដេអូឃ្លិបរបស់ Barron បានសាយភាយពាសពេញប្រព័ន្ធផ្សព្វផ្សាយ ភ្លាមៗនោះដែរស្រាប់តែមានប្រតិកម្មចម្រុះតាមអ៊ីនធឺណិតយ៉ាងភ្លូកទឹកភ្លូកដី ដោយអ្នកគាំទ្រសាធារណរដ្ឋមួយចំនួនបានយល់ឃើញថា ពណ៌ក្រវ៉ាត់កនោះគឺជាសោកនាដកម្ម ហេតុដូច្នេះហើយ តើអ្នកណាអនុញ្ញាតឲ្យ Barron ជ្រើសរើសពណ៌ក្រវ៉ាត់កបែបនេះ? អ្នកខ្លះថា ក្រវ៉ាត់ករបស់គេមើលទៅរលុង និងមិនមានតុល្យភាព អ្នកផ្សេងទៀតថែមទាំងបានផ្តល់យោបល់ដោយកំប្លែងថា សមាជិកគ្រួសារគួរតែជួយកែសម្រួលក្រវ៉ាត់កដល់កូនពៅផង។

ទោះជាយ៉ាងណាក៏ដោយ ក៏មានអ្នកលេងអ៊ីនធឺណិតលើកឡើងថា វាដូចជាគ្មានអត្ថន័យជាក់លាក់ណាមួយនៅពីក្រោយពណ៌ក្រវ៉ាត់កនោះទេ។ តាមពិត Barron តែងតែពាក់ក្រវ៉ាត់កពណ៌ខៀវ ដូចជាពេលដែលគាត់បង្ហាញខ្លួនជាសាធារណៈជាលើកដំបូង ដើម្បីគាំទ្រយុទ្ធនាការរបស់ឪពុកក្នុងខែកក្កដា ឆ្នាំ ២០២៤ និងនៅឯពិធីស្បថចូលកាន់តំណែងរបស់ប្រធានាធិបតីត្រាំ ក្នុងខែមករា ឆ្នាំមុន។

សូម្បីតែប្រព័ន្ធផ្សព្វផ្សាយមួយចំនួន រួមទាំង New York Post, Daily Mail និង Daily Express US ក៏បានរាយការណ៍អំពីពណ៌ក្រវ៉ាត់កខុសគ្នាតែមួយគត់របស់ Barron ផងដែរ។ កាសែតDaily Mail បានបញ្ជាក់ថា មិនដូចបងប្អូនរបស់គាត់ផ្សេងទៀតទេ លោក Barron មិនបានបង្ហាញទស្សនៈនយោបាយផ្ទាល់ខ្លួនជាសាធារណៈទេ។

លើសពីនេះ អ្នកចូលរួមសុន្ទរកថាស្តីពីស្ថានភាពសហភាព បានបង្ហាញវត្តមានរបស់ពួកគេតាមរយៈស្ទីលម៉ូដសម្លៀកបំពាក់ផ្សេងៗ។ នៅពេលដែលសុន្ទរកថាត្រូវបានផ្សាយផ្ទាល់ទូទាំងអាមេរិក ក្រោមការចាប់អារម្មណ៍យ៉ាងខ្លាំងពីប្រព័ន្ធផ្សព្វផ្សាយ ពួកគេបានប្រើវាជាឱកាស ដើម្បីបង្ហាញសារនយោបាយរបស់ពួកគេរៀងៗខ្លួន៕

អត្ថបទ៖ សាង ស្រីល័ក្ខ