អាមេរិកបើកការស៊ើបអង្កេត ជុំវិញសោកនាដកម្មវាយប្រហារចំសាលាមួយនៅអ៊ីរ៉ង់ ស្លាប់​​សិស្ស ១៦៨នាក់

រដ្ឋាភិបាលសហរដ្ឋអាមេរិកបានប្រកាសបើកការស៊ើបអង្កេតជាផ្លូវការ ទៅលើករណីវាយប្រហារតាមអាកាសដ៏រន្ធត់មួយ ដែលបានកម្ទេចសាលាបឋមសិក្សាកុមារី Shajareh Tayyebeh ក្នុងទីក្រុង Minab ប្រទេសអ៊ីរ៉ង់ កាលពីថ្ងៃសៅរ៍កន្លងទៅ។ របាយការណ៍បឋមពីអាជ្ញាធរអ៊ីរ៉ង់បានបង្ហាញតួលេខដ៏ស្លុតចិត្ត ដោយមានកុមារីស្លូតត្រង់ដែលមានអាយុចន្លោះពី ៧ ទៅ ១២ឆ្នាំ ចំនួន ១៦៨នាក់ បានបាត់បង់ជីវិតភ្លាមៗ ខណៈដែលពួកគេកំពុងស្ថិតក្នុងម៉ោងសិក្សា។

យោង​តាម​ការ​ផ្សាយ​របស់​ទីភ្នាក់ងារ​ព័ត៌មាន​ Anadolu នា​ថ្ងៃ​ទី​៥​មីនា​នេះ រដ្ឋមន្ត្រីការពារជាតិអាមេរិក លោក Pete Hegseth បានចេញមុខមកបកស្រាយថា ខាងក្រសួងការពារជាតិកំពុងតាមដាន និងពិនិត្យមើលរឿងនេះយ៉ាងដិតដល់បំផុត ប៉ុន្តែលោកបានសង្កត់ធ្ងន់យ៉ាងម៉ឺងម៉ាត់ថា កងទ័ពអាមេរិកប្រកាន់ខ្ជាប់នូវគោលការណ៍មិនកំណត់គោលដៅលើទីតាំងស៊ីវិលឡើយ។ ទោះបីជាមានការបកស្រាយបែបនេះក្តី ក៏អភិបាលក្រុង Minab លោក Mohammad Radmehr បានបញ្ជាក់យ៉ាងច្បាស់ថា គ្រាប់បែកបានធ្លាក់ចំកណ្តាលអាគារសាលារៀនពេញទំហឹង ដែលក្រៅពីអ្នកស្លាប់ ក៏នៅមានសិស្សស្រីចំនួន ៩៥នាក់ផ្សេងទៀតបានរងរបួសយ៉ាងធ្ងន់ធ្ងរ និងកំពុងស្ថិតក្នុងស្ថានភាពសង្គ្រោះបន្ទាន់។

រដ្ឋាភិបាលក្រុងតេហេរ៉ង់បានចោទប្រកាន់ចំៗទៅលើសហរដ្ឋអាមេរិក និងអ៊ីស្រាអែលថា ជាអ្នកនៅពីក្រោយ «ឧក្រិដ្ឋកម្មសង្រ្គាម» ដ៏សាហាវឃោរឃៅមួយនេះ។ ផ្ទុយទៅវិញ កងទ័ពអ៊ីស្រាអែលបានឆ្លើយតបថា ខ្លួនមិនបានដឹង ឬមានប្រតិបត្តិការណាមួយនៅក្នុងតំបន់កើតហេតុនាពេលនោះឡើយ។ ការបដិសេធនេះកំពុងត្រូវបានមជ្ឈដ្ឋានអន្តរជាតិជជែកដេញដោលយ៉ាងខ្លាំង ព្រោះកន្លងមក អ៊ីស្រាអែលធ្លាប់បានបដិសេធការវាយប្រហារស្រដៀងគ្នានេះ រួចទើបសុខចិត្តទទួលស្គាល់ ឬកែប្រែលទ្ធផលស៊ើបអង្កេតរបស់ខ្លួនវិញ នៅពេលដែលមានភស្តុតាងជាក់ស្តែងលេចឡើង។

សោកនាដកម្មដ៏ធំធេងនេះ កំពុងក្លាយជាចំណុចរបត់ថ្មីមួយក្នុងជម្លោះឆ្នាំ២០២៦ ដែលធ្វើ​ឲ្យ​កំហឹងរបស់ប្រជាជនអ៊ីរ៉ង់ឆេះសន្ធោសន្ធៅកាន់តែខ្លាំង និងអាចជម្រុញឲ្យមានការសងសឹកកាន់តែសាហាវពីសំណាក់កងឆ្មាំបដិវត្តន៍អ៊ីរ៉ង់។ ខណៈដែលរូបភាពនៃ​កម្ទេចកម្ទី​សៀវភៅ និងកាបូបរៀន​សិស្ស​ក្នុងគំនរបាក់បែកកំពុងត្រូវបានចែកចាយពាសពេញពិភពលោក អង្គការសហប្រជាជាតិក៏បានបង្ហាញការព្រួយបារម្ភយ៉ាងខ្លាំង និងអំពាវនាវ​ឲ្យ​មានការបង្ហាញការពិត​ឲ្យ​បានឆាប់បំផុត ដើម្បីផ្តល់យុត្តិធម៌ដល់ជនរងគ្រោះដែលជាកុមារស្លូតត្រង់ទាំងនោះ៕

ប្រែសម្រួល៖ ឈាង