ព័ត៌មានអន្ដរជាតិ

ក្រុមសកម្មប្រយុទ្ធហេសបូឡាលីបង់ ប្តេជ្ញាចិត្តមិនចុះញ៉មអាមេរិក-អ៊ីស្រាអែល

បានផុស

៤ ខែ មុន

នៅ

ថ្ងៃព្រហស្បតិ៍ ៥ មីនា ២០២៦

ដោយ

មេដឹកនាំហេសបូឡា លោក Naim Qassem បានប្រកាសនៅថ្ងៃពុធទី៤មីនាថា ក្រុមហេសបូឡា នឹងតស៊ូប្រយុទ្ធជាមួយអ៊ីស្រាអែល និងសហរដ្ឋអាមេរិករហូតដល់ទីបញ្ចប់ ដោយបញ្ចាក់ពីការប្តេជ្ញាមិនចុះចាញ់ បើទោះបីជាមានភាពខុសគ្នាយ៉ាងខ្លាំងនៃសម្ភារសឹក និងកងកម្លាំងក៏ដោយ។

**មេដឹកនាំហេសបូឡា លោក Naim Qassem ( រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម france24 ថ្លែងនៅក្នុងសុន្ទរកថាតាមទូរទស្សន៍លើកដំបូង ចាប់តាំងពីអ៊ីស្រាអែលបានចាប់ផ្តើមការវាយប្រហារតាមផ្លូវអាកាសប្រឆាំងនឹងប្រទេសលីបង់ មេដឹកនាំហេសបូឡា រូបនេះបញ្ជាក់ថា៖«យើងកំពុងប្រឈមនឹងសកម្មភាពឈ្លានពាន។ ជម្រើសរបស់យើង គឺប្តូរជីវិតចុងក្រោយ ហើយ យើងនឹងមិនចុះចាញ់សត្រូវដាច់ខាត»។

លោក Kassim បានបន្តថា៖«ការសម្រេចចិត្តរបស់យើងគឺការតស៊ូប្រយុទ្ធ និងការតស៊ូរហូតដល់ដែនកំណត់ជាអតិបរមា។ តាមទស្សនៈរបស់មេចលនាហេសបូឡារូបនេះ អ៊ីស្រាអែលគឺជា «ការគំរាមកំហែងដល់ការរស់រាន»របស់ហេសបូឡា លីបង់ និងតំបន់ទាំងមូល។ អ្វីដែលអ៊ីស្រាអែលបានធ្វើមិនមែនជាប្រតិកម្មចំពោះការបាញ់រ៉ុក្កែតទេ ប៉ុន្តែជាទង្វើឈ្លានពានដែលបានគ្រោងទុកដោយចេតនា។ វាជាកាតព្វកិច្ចរបស់ហេសបូឡាក្នុងការធ្វើអ្វីគ្រប់យ៉ាងតាមអំណាចរបស់ខ្លួន ដើម្បីបញ្ឈប់ដំណើរដ៏គ្រោះថ្នាក់នៃការឈ្លានពានរបស់អ៊ីស្រាអែលជាបន្តបន្ទាប់។

ទន្ទឹមគ្នានោះដែរ លោកបានបដិសេធការចោទប្រកាន់ថា ក្រុមហេសបូឡា គឺជាអ្នកចាប់ផ្តើមការប្រយុទ្ធជាមួយអ៊ីស្រាអែលមុន។ ដោយសង្កត់ធ្ងន់ថា ហេសបូឡា និងចលនាឥស្លាមកំពុងឆ្លើយតបទៅនឹងការវាយប្រហាររបស់អ៊ីស្រាអែល និងអាមេរិក។ នេះជាសិទ្ធិស្របច្បាប់សម្រាប់យើង ហើយនេះគឺជាការតស៊ូដើម្បីការរស់រានមានជីវិត។

ជម្លោះនៅមជ្ឈិមបូព៌ាបានរីករាលដាលដល់ប្រទេសលីបង់នៅដើមសប្តាហ៍នេះ នៅពេលដែលក្រុមសកម្មប្រយុទ្ធហេសបូឡាបានធ្វើការវាយឆ្មក់លើទឹកដីអ៊ីស្រាអែល ដើម្បីសងសឹកជូនចំពោះមេដឹកនាំកំពូលអ៊ីរ៉ង់ លោក Ali Khamenei។ ចាប់តាំងពីពេលនោះមក យោធាអ៊ីស្រាអែលបានបន្តការវាយប្រហារទ្រង់ទ្រាយធំចូលក្នុងទឹកដីប្រទេសលីបង់ ស្របពេលដែលហេសបូឡាក៏កំពុងបន្តបាញ់រ៉ុក្កែតទៅលើគោលដៅអ៊ីស្រាអែលផងដែរ៕

អត្ថបទ៖ សាង ស្រីល័ក្ខ