ព័ត៌មានអន្ដរជាតិ

មន្ត្រីជាន់ខ្ពស់អាមេរិក ថា មិនបោះបង់តំបន់អាមេរិកឡាទីនទេ ទោះបីផ្ទុះសង្គ្រាមនៅអ៊ីរ៉ង់

បានផុស

៥ ខែ មុន

នៅ

ថ្ងៃសុក្រ ៦ មីនា ២០២៦

ដោយ

សង្គ្រាមរវាងសហរដ្ឋអាមេរិក និងអ៊ីស្រាអែលជាមួយអ៊ីរ៉ង់នៅតែបន្តឆាបឆេះយ៉ាងសន្ធោសន្ទៅ ខណៈទីក្រុងវ៉ាស៊ីនតោនសន្យាថានឹងបញ្ជូនកងទ័ព និងសម្ភារៈផ្នែកយោធាបន្ថែមទៀតទៅកាន់តំបន់មជ្ឈិមបូព៌ា ចំណែកទីក្រុងតេហេរ៉ង់ក៏ពង្រីកការវាយប្រហារសងសឹកវិញនៅទូទាំងតំបន់។

យោងតាម Al Jazeera ចុះផ្សាយថ្ងៃទី០៥ ខែមីនា ឆ្នាំ២០២៦ មន្ត្រីជាន់ខ្ពស់ក្រោមការដឹកនាំរបស់ប្រធានាធិបតីអាមេរិក លោក ដូណាល់ ត្រាំ បានប្រាប់សន្និសីទសារព័ត៌មានថា សហរដ្ឋអាមេរិក មិនបានផ្លាស់ប្តូរការផ្តោតអារម្មណ៍ចេញពីអាមេរិកឡាទីន ដោយសារតែសង្គ្រាមមួយផ្សេងទៀតកំពុងកើតមាននោះទេ។

ទីប្រឹក្សាសន្តិសុខសេតវិមាន លោក Stephen Miller រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីឡើងកាន់តំណែងអាណត្តិទីពីរនេះ ប្រធានាធិបតី ត្រាំ បានបង្ហាញពីគម្រោងប្រើប្រាស់ឥទ្ធិពលរបស់សហរដ្ឋអាមេរិកលតំបន់ផ្សេងៗ។ ការជំរុញរបស់លោកក្នុងការគ្រប់គ្រងបានកើតឡើងស្របគ្នាជាមួយនឹងប្រតិបត្តិការយោធាប្រឆាំងនឹងបណ្តាញឧក្រិដ្ឋជននៅតំបន់អាមេរិកឡាទីន រហូតដល់ការទម្លាក់រដ្ឋាភិបាលលោក ម៉ាឌូរ៉ូថែមទៀត។

ក្នុងសន្និសីទលើការប្រយុទ្ធប្រឆាំងមេក្លោងគ្រឿងញៀន «Americas Counter Cartel» លើកដំបូងកាលពីថ្ងៃព្រហស្បតិ៍ ទីប្រឹក្សាសន្តិសុខសេតវិមាន លោក Stephen Miller ប្រាប់អ្នកសារព័ត៌មានថា៖ «អាមេរិកឡាទីននឹងនៅតែជាអាទិភាពយោធាកំពូលរបស់សហរដ្ឋអាមេរិក ដោយមិនគិតពីព្រឹត្តិការណ៍នៅមជ្ឈិមបូព៌ាឡើយ»។

លោក Miller បន្ថែមថា៖ « យើងនឹងមិនប្រគល់ទឹកដីមួយដុំក្នុងអឌ្ឍគោលនេះទៅឱ្យសត្រូវទេ។ សហរដ្ឋអាមេរិកកំពុងប្រើប្រាស់អំណាចដ៏ខ្លាំង អំណាចយោធា កម្លាំងប្រល័យ ដើម្បីការពារមាតុភូមិសហរដ្ឋអាមេរិក»។

លោកបន្ថែមទៀតថា៖«មិនមានដំណោះស្រាយយុត្តិធម៌ព្រហ្មទណ្ឌ ចំពោះក្រុមជួញដូរគ្រឿងញៀនទេ»។ លោកបានប្រៀបធៀបក្រុមជួញដូរគ្រឿងញៀនទាំងនោះ ទៅនឹងក្រុមប្រដាប់អាវុធជ្រុលនិយមដូចជា al-Qaeda និង ISIL (ISIS) ជាដើមផង។

លោក សន្និដ្ឋានថា ឧក្រិដ្ឋកម្មកើតឡើង អាចកម្ចាត់បានដោយសារតែអំណាចយោធាប៉ុណ្ណោះ។

គួរបញ្ជាក់ថា ចាប់តាំងពីលោក ត្រាំ ឡើងកាន់តំណែងកាលពីឆ្នាំមុន រដ្ឋបាលរបស់លោកបានអនុវត្តអ្វីដែលអ្នកជំនាញពិពណ៌នាថាជាវិធីសាស្រ្តសង្គ្រាមសកលប្រឆាំងនឹងភេរវកម្មចំពោះអាមេរិកឡាទីន រួមទាំងការលើកឡើងថាក្រុមជួញដូរគ្រឿងញៀនជាអង្គការភេរវកម្មបរទេសផងដែរ។

លោក Miller ជាមនុស្សសំខាន់ម្នាក់នៅពីក្រោយគោលនយោបាយអន្តោប្រវេសន៍ដ៏តឹងរ៉ឹងរបស់លោក ត្រាំ គាំទ្រវិធីសាស្រ្តយោធានិយមរបស់ប្រធានាធិបតី ទោះបីជាអ្នករិះគន់ព្រមានថាវាបង្កើនការព្រួយបារម្ភពីសិទ្ធិមនុស្ស និងច្បាប់អន្តរជាតិក៏ដោយ៕

ប្រែសម្រួល៖ ណឺ មិនា