AP៖ រុស្ស៊ីផ្តល់ «បញ្ជីគោលដៅ» ដល់អ៊ីរ៉ង់ ដើម្បីតាមប្រមាញ់នាវាចម្បាំង និងយន្តហោះអាមេរិក

រុស្ស៊ីត្រូវបានគេរាយការណ៍ថា បានហុច«ផែនទីបង្ហាញផ្លូវ» នៃព័ត៌មានសម្ងាត់​ឲ្យ​ទៅអ៊ីរ៉ង់ ដើម្បីជួយកំណត់គោលដៅវាយប្រហារលើនាវាចម្បាំង និងយន្តហោះចម្បាំងអាមេរិកនៅមជ្ឈិមបូព៌ា។ នេះ​បើយោង​តាម​ការ​ចុះ​ផ្សាយរបស់​ទីភ្នាក់ងារ​ព័ត៌មាន​ AP កាល​ពីថ្ងៃ​ទី​៦​ខែ​មីនា​ឆ្នាំ​២០២៦ ដោយ​ដក​ស្រង់​ប្រភព​​ពី​មន្ត្រី​អាមេរិក។

ដ្បិត​មន្ត្រីអាមេរិកបញ្ជាក់ពីការលេចធ្លាយព័ត៌មាននេះ សេតវិមានបានបដិសេធចំពោះផលប៉ះពាល់នៃរបាយការណ៍ ដោយអ្នកនាំពាក្យ Karoline Leavitt បានលើកឡើងយ៉ាងដាច់អហង្ការថា វាមិនអាចធ្វើ​ឲ្យប៉ះពាល់ដល់ប្រតិបត្តិការយោធាអាមេរិកឡើយ ព្រោះ «យើងកំពុងកម្ទេចពួកគេទាំងស្រុងហើយ»។

វិមានក្រឹមឡាំងបានរក្សាភាពស្ងប់ស្ងាត់ ដោយមិនព្រមបញ្ជាក់ពីការផ្តល់ជំនួយយោធា ប៉ុន្តែបានអះអាងថា កិច្ចសន្ទនាជាមួយអ៊ីរ៉ង់នឹងនៅតែបន្ត។ ទំនាក់ទំនងនេះគឺជាការផ្តល់ផលប្រយោជន៍​ឲ្យ​គ្នាទៅវិញទៅមក ខណៈ​កន្លង​មក​អ៊ីរ៉ង់ធ្លាប់បានផ្តល់ដ្រូន Shahed និងមីស៊ីល​ឲ្យ​រុស្ស៊ីប្រើក្នុងសង្គ្រាមអ៊ុយក្រែន។ ឥឡូវនេះ ដ្រូនប្រភេទដដែលនេះកំពុងត្រូវអ៊ីរ៉ង់យកមកប្រើប្រាស់ដើម្បីវាយបកលើអាមេរិកវិញ ដែលធ្វើ​ឲ្យ​សហរដ្ឋអាមេរិក និងសម្ព័ន្ធមិត្តអារ៉ាប់ ត្រូវងាកទៅរកអ្នកជំនាញអ៊ុយក្រែន ដើម្បីសុំយោបល់ពីរបៀបបាញ់ទម្លាក់ដ្រូនទាំងនោះ៕

ប្រែសម្រួល៖ ឈាង