ពលរដ្ឋចិនជាង​១ម៉ឺននាក់​ចាកចេញ​ពី​មជ្ឈិមបូព៌ាវិញ​អំឡុង​ពេលសង្គ្រាម​

ក្រសួងការបរទេសចិន បាននិយាយកាលពីថ្ងៃអង្គារទី១០មីនាថា អាជ្ញាធរនិងក្រុមហ៊ុនអាកាសចរណ៍ចិន បានជួយពលរដ្ឋរបស់ខ្លួនជាង ១០០០០ នាក់ដែលវិលត្រឡប់មកពីមជ្ឈិមបូព៌ាវិញ បន្ទាប់ពីសង្គ្រាមនៅក្នុងតំបន់​មួយ​នេះ​បានបង្ខំឲ្យបិទដែនអាកាស និងផ្អាកជើងហោះហើរពាណិជ្ជកម្មភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញ​ផ្សាយ​ដោយ​​​ Reuters អ្នកនាំពាក្យក្រសួងការបរទេសចិន លោក Guo Jiakun បាននិយាយនៅក្នុង​សន្និសីទសារព័ត៌មានមួយថា ប្រជាជនចិនជាង១ម៉ឺននាក់ បានវិលត្រឡប់មកប្រទេសចិនវិញដោយសុវត្ថិភាព មាន​ចេញ​ពី​​ប្រទេស​អ៊ីរ៉ង់ អារ៉ាប់រួម អូម៉ង់ ព្រមទាំំងអារ៉ាប៊ីសាអូឌីត។ ក្នុងចំណោមពលរដ្ឋជាង១ម៉ឺននាក់ ដែលវិលត្រឡប់មកពីមជ្ឈិមបូព៌ា នៅក្នុងនោះដែរ ពលរដ្ឋជាង ៣០០០ នាក់បានកត់ត្រាថា ពួកគេសុទ្ធតែជម្លៀសចេញពីប្រទេសអ៊ីរ៉ង់ទាំងអស់់។

លោក Guo ក៏នលើកឡើងថា ក្រសួងការបរទេស និងរដ្ឋបាលអាកាសចរណ៍ស៊ីវិលក្នុងប្រទេស បានណែនាំក្រុមហ៊ុនអាកាសចរណ៍ក្នុងស្រុកឲ្យបង្កើនសមត្ថភាព ដើម្បីបញ្ជូនពលរដ្ឋចិនដែលជាប់គាំងនៅមជ្ឈិមបូព៌ាត្រឡប់មកផ្ទះវិញ។

សង្គ្រាមនៅមជ្ឈិមបូព៌ាបានផ្ទុះឡើងបន្ទាប់ពីសហរដ្ឋអាមេរិក និងអ៊ីស្រាអែលបានបើកការវាយប្រហារលើអ៊ីរ៉ង់កាលពីថ្ងៃទី២៨ខែកុម្ភៈ។ ការវិវត្តនេះបណ្តាលឲ្យដែនអាកាសជាច្រើននៅក្នុងតំបន់ត្រូវបានបិទ ដែលនាំឲ្យមានការរំខានដល់ជើងហោះហើរពាណិជ្ជកម្មជាច្រើន។ យ៉ាងណាមិញ ក្រុមហ៊ុនអាកាសចរណ៍ចិនធំៗមួយចំនួនដូចជា Air China និង China Southern Airlines បានបន្តជើងហោះហើរឡើងវិញនៅដើមខែនេះ រវាងទីក្រុងមួយចំនួនរបស់ចិន និងមជ្ឈមណ្ឌលអាកាសចរណ៍នៅក្នុងតំបន់ឈូងសមុទ្រដូចជាទីក្រុងរីយ៉ាដ និងឌូបៃ៕

អត្ថបទ៖ សាង ស្រីល័ក្ខ