ខឹងរឿងបើកច្រក Hormuz មិនបាន! ត្រាំ ពន្លះសម្ព័ន្ធមិត្តថា អាមេរិក ខំជួយរាប់ឆ្នាំ តែអត់ជួយអាមេរិកវិញ

ដោយខឹងចិត្តចំពោះសម្ព័ន្ធមិត្តដែលមិនព្រមបញ្ជូននាវាចម្បាំងទៅជួយបើកច្រកសមុទ្រ Hormuz ស្របពេលភ្លើងសង្គ្រាមនៅតែបន្តឆាបឆេះសន្ធោសន្ធៅ ប្រធានាធិបតីអាមេរិក ដូណាល់ ត្រាំ បានពន្លះសម្ព័ន្ធមិត្តទាំងនោះ ដោយបន្ទោសចំៗថា រាប់ឆ្នាំហើយអាមេរិកខំជួយពួកគេការពារខ្លួនពីសត្រូវខាងក្រៅ ប៉ុន្តែពួកគេបែរជាគ្មានភក្តីភាពនិងមិនជួយអាមេរិកទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងព្រឹត្តិការណ៍នៅសេតវិមានកាលពីថ្ងៃចន្ទទី១៦ខែមីនាឆ្នាំ២០២៦ និងផ្សាយដោយ CNN,​ មេដឹកនាំអាមេរិករូបនេះនិយាយថា ប្រទេសទាំងនោះមិនមានភក្តីភាពគ្រប់គ្រាន់សោះឡើយចំពោះអាមេរិក បន្ទាប់ពីទទួលបានការគាំទ្រផ្នែកសន្តិសុខអស់រយៈពេលជាច្រើនទសវត្សរ៍មកនោះ។

លោកលើកឡើងថា៖ «ប្រទេសខ្លះពេញចិត្តចំពោះរឿងនេះ ហើយខ្លះទៀតមិនពេញចិត្តឡើយ។ មានប្រទេសខ្លះដែលយើងបានជួយអស់រយៈពេលជាច្រើនឆ្នាំមកហើយ។ យើងបានការពារពួកគេពីប្រភពខាងក្រៅដ៏គួរឲ្យខ្លាច ប៉ុន្តែពួកគេមិនសូវពេញចិត្តទៅវិញ។ យ៉ាងណា មានប្រទេសខ្លះកំពុងបញ្ជូននាវាមកហើយ»។

មុននេះ លោកត្រាំបានអំពាវនាវ​ឲ្យ​ប្រទេសជាសម្ព័ន្ធមិត្តជួយអន្តរាគមន៍ដើម្បីការពារសុវត្ថិភាពច្រក Hormuz ដែលជាសរសៃឈាមសេដ្ឋកិច្ចដ៏សំខាន់ ព្រោះវាជាផ្លូវដឹកជញ្ជូនប្រេងរហូតដល់១ភាគ៥ នៃពិភពលោក។ លោកបង្ហើបថា បានទាក់ទងទៅកាន់៧​ប្រទេសរួចហើយ ដែលក្នុងនោះរួមមានទាំង ចិន បារាំង ជប៉ុន កូរ៉េខាងត្បូង និងអង់គ្លេស ផងដែរ។

ទោះបីជាយ៉ាងណាក៏ដោយ ការឆ្លើយតបពីបណ្តាប្រទេសទាំងនោះហាក់មានភាពខុសៗគ្នា។

មិនត្រឹមប៉ុណ្ណឹង លោកថែមទាំងគំរាមដល់ណាតូទៀតផង ដោយអះអាងថា អង្គ​ការនេះ នឹងប្រឈមអនាគតដ៏អាក្រក់បំផុត​ ប្រសិន​បើ​សម្ព័ន្ធ​មិត្ត​​យូរ​ឆ្នាំ​របស់​អាមេរិក មិនព្រមជួយ​បើក​ច្រក Hormuz៕

អត្ថបទ៖ សុខ សុវណ្ណ