​ពេល Ali Larijani បង្ហាញខ្លួន គឺ​ជា​«តម្រុយមាស» ដែល​ធ្វើ​ឲ្យ​​អ៊ីស្រាអែល​ចាត់ការភ្លាម​តែម្តង​​

យោធាអ៊ីស្រាអែល បាននិយាយថា លោក Ali Larijani គឺជា «មេដឹកនាំ​ពិត​ប្រាកដ​មួយ​រូប​របស់អ៊ីរ៉ង់» បន្ទាប់ពីមេដឹកនាំកំពូល លោក Ali Khamenei ត្រូវបានសម្លាប់ ដោយចោទប្រកាន់គាត់ពីបទដឹកនាំការវាយប្រហារលើអ៊ីស្រាអែល និងរដ្ឋអារ៉ាប់ឈូងសមុទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត Jerusalem Post កាលពីថ្ងៃទី១៩មីនា បានដកស្រង់ប្រភព​ក្នុង​ក្រសួង​ការពារជាតិដែល​​អះអាងថា ក្នុងតួនាទីនេះ លោក Larijani បានក្លាយជាគោលដៅកំពូលរបស់កងកម្លាំងការពារជាតិ​របស់​​អ៊ីស្រាអែល (IDF) ដោយទីក្រុង Tel Aviv បានលះបង់ធនធានស៊ើបការណ៍សម្ងាត់ និងប្រតិបត្តិការយ៉ាងច្រើន ចំពោះកិច្ចខិតខំប្រឹងប្រែងដើម្បីស្វែងរកលេខាធិការនៃ​ក្រុមប្រឹក្សា​​សន្តិសុខ​ជាតិជាន់ខ្ពស់​ (SNSC) របស់​អ៊ីរ៉ង់​​។

សារព័ត៌មាន Kan News បានដកស្រង់ប្រភពសន្តិសុខថា កងកម្លាំង IDF បានព្យាយាមសម្លាប់លោក Larijani ម្តងហើយម្តងទៀត រួមទាំងការវាយប្រហារលើកដំបូងនៃប្រតិបត្តិការ Roaring Lion កាលពីថ្ងៃទី ២៨​ខែ​​កុម្ភៈ។ ប្រតិបត្តិការនេះបានសម្លាប់មេដឹកនាំនយោបាយ និងយោធាជាន់ខ្ពស់អ៊ីរ៉ង់ជាច្រើនរូប រួមទាំងមេដឹកនាំកំពូល Ali Khamenei ប៉ុន្តែលោក Larijani បានរួចជីវិត។

ក្រោយមក លោក Larijani តែងតែបង្ហោះនៅលើបណ្តាញសង្គមរិះគន់យុទ្ធនាការវាយលុករបស់អាមេរិក-អ៊ីស្រាអែល ដោយទទូចថា អ៊ីរ៉ង់នឹងមិនចរចាទេ ខណៈពេលដែលការវាយប្រហារតាមអាកាសនៅតែបន្ត។ លោកថា អ៊ីរ៉ង់មិនដូចអាមេរិកទេ គឺត្រៀមខ្លួនសម្រាប់សង្គ្រាមអូសបន្លាយ។

បន្ទាប់មក លោក Larijani ត្រូវបានគេជឿថា កំពុងលាក់ខ្លួននៅក្នុងលេណដ្ឋានក្រោមដី កម្របង្ហាញខ្លួនជាសាធារណៈណាស់ ដែលធ្វើឲ្យចារកម្មអ៊ីស្រាអែលមិនអាចតាមដានបាន។ បន្ទាប់ពីធ្វើការអស់រយៈពេលជាច្រើនឆ្នាំក្នុងការងារសន្តិសុខ លោកត្រូវបានគេនិយាយថាមានបទពិសោធន៍ក្នុងការលាក់ខ្លួន និងចាត់វិធានការជាច្រើនដើម្បីចៀសវាងការត្រូវបានត្រួតពិនិត្យដោយអ៊ីស្រាអែល ដូចជាការផ្លាស់ប្តូរឥតឈប់ឈររវាងទីតាំងសម្ងាត់ផ្សេងៗក្នុងរយៈពេលពីរសប្តាហ៍កន្លងមក។

ប៉ុន្តែនៅថ្ងៃទី ១៣មីនា លោក Larijani ស្រាប់តែបានបង្ហាញខ្លួនជាមួយប្រធានាធិបតី Masoud Pezeshkian និងរដ្ឋមន្ត្រីការបរទេស Abbas Araghchi ក្នុងអំឡុងពេលដង្ហែក្បួន Quds Day នៅតាមដងផ្លូវនៃរដ្ឋធានីតេហេរ៉ង់។ ការបង្ហាញខ្លួនរបស់លោកនៅតាមផ្លូវក្នុងអំឡុងពេលព្រឹត្តិការណ៍ដ៏មមាញឹកមួយបានជួយសម្រួលដល់ចារកម្មអ៊ីស្រាអែល ក្នុងការតាមដាន និងបានជំរុញឲ្យ IDF ចាត់វិធានការភ្លាមៗ។

ជាក់ស្ដែង លោក David Keyes អតីតទីប្រឹក្សាទំនាក់ទំនងការបរទេសនាយករដ្ឋមន្ត្រី Netanyahu បានសរសេរនៅលើ X ថា «លោក Larijani គឺជាគោលដៅបន្ទាប់។ តើខ្ញុំដឹងដោយរបៀបណា? ពីព្រោះបុរសដែលមានរង្វង់ក្រហមនេះ គឺជាភ្នាក់ងារកំពូលម្នាក់របស់អ៊ីស្រាអែល ហើយក៏ជាមិត្តរបស់ខ្ញុំដែរ»។

ក្រោយមក នៅរសៀលថ្ងៃ ១៦មីនា «តម្រុយមាស» មួយបានលេចឡើង ដោយនិយាយថា លោក Larijani និងកូនប្រុសនឹងទៅអាផាតមិនមួយនៅជាយក្រុងជិតរដ្ឋធានីតេហេរ៉ង់។ នៅពេលនោះ អាកាសធាតុក៏អំណោយផលជាងសម្រាប់អ្នកប្រយុទ្ធអ៊ីស្រាអែលក្នុងការអនុវត្តបេសកកម្ម។ អគ្គនាយកដ្ឋានស៊ើបការណ៍សម្ងាត់យោធាអ៊ីស្រាអែល (Aman) បានប្រមូលព័ត៌មានដែលខ្លួនប្រមូលបានភ្លាមៗ ហើយបានបញ្ជាក់ថា លោក Larijani ពិតជាមានវត្តមាននៅក្នុងផ្ទះមែន។

ដោយមិនបង្អង់យូរ នាយករដ្ឋមន្ត្រី Netanyahu និងរដ្ឋមន្ត្រីការពារជាតិអ៊ីស្រាអែល Katz ពីមុនបានណែនាំ IDF ថា ក្នុងករណីណាក៏ដោយ បើមានព័ត៌មានស៊ើបការណ៍ច្បាស់លាស់ វាត្រូវបានអនុញ្ញាតឲ្យសម្លាប់មន្ត្រីជាន់ខ្ពស់អ៊ីរ៉ង់ ឬ Hezbollah ណាមួយភ្លាមៗ ដោយមិនចាំបាច់រង់ចាំការយល់ព្រមពីមេដឹកនាំនយោបាយឡើយ៕

អត្ថបទ៖ សាង ស្រីល័ក្ខ