សម្ព័ន្ធមិត្តស្នើអ៊ុយក្រែនផ្អាកវាយរោងចក្រប្រេង​រុស្ស៊ី ព្រោះបារម្ភរឿងតម្លៃប្រេងហក់ឡើងខ្លាំង

ក្នុងពេលដែលសង្គ្រាមនៅតំបន់មជ្ឈិមបូព៌ាកំពុងឆាបឆេះយ៉ាងសន្ធោសន្ធៅ លោក Kyrylo Budanov ប្រធានការិយាល័យប្រធានាធិបតីអ៊ុយក្រែន បានទម្លាយឲ្យ​ដឹងថា បណ្ដាប្រទេសជាដៃគូអន្តរជាតិបានដាក់សំណើមកកាន់ទីក្រុងកៀវ​ ឲ្យផ្អាកការវាយប្រហារតាមអាកាសលើរោងចក្រចម្រាញ់ប្រេងរបស់រុស្ស៊ី។

បើតាម Kyiv Post ចុះផ្សាយ​ថ្ងៃទី​៥​ខែមេសា​ឆ្នាំ​២០២៦ ការស្នើសុំនេះធ្វើឡើងដោយសារតែពិភពលោកកំពុងព្រួយបារម្ភខ្លាំងពីការឡើងថ្លៃនៃថាមពល ដែលបណ្ដាលមកពីភាពតានតឹងរវាងអាមេរិក-អ៊ីស្រាអែល និងអ៊ីរ៉ង់ ដោយ​កំពុងធ្វើ​ឲ្យ​ប៉ះពាល់ដល់ការផ្គត់ផ្គង់ប្រេងជាសកល។

លោក Budanov បានឆ្លើយតបបែបការទូតថា លោកពិតជាបានទទួល «សញ្ញា» ខ្លះៗមែនជុំវិញរឿងនេះ ប៉ុន្តែលោកមិនបានបញ្ជាក់ចំឈ្មោះថាជាប្រទេសណាខ្លះនោះទេ។ ស្ថានភាពនៅពេលនេះហាក់មានភាពស្មុគស្មាញមែនទែន ព្រោះថាការឡើងថ្លៃប្រេងពិភពលោកបានក្លាយជាប្រភពចំណូលដ៏មហាសាលដែលជួយប៉ះប៉ូវដល់កញ្ចប់ថវិកាសង្គ្រាមរបស់វិមានក្រឹមឡាំង ដែលនេះជាអ្វីដែលលោកប្រធានាធិបតី វ៉ូឡូឌីមៀរ ហ្សេលេនស្គី ធ្លាប់បានលើកឡើងថាជាឧបសគ្គធំមួយក្នុងយុទ្ធសាស្ត្រកាត់ផ្តាច់សរសៃឈាមសេដ្ឋកិច្ចរបស់រុស្ស៊ី។

ទោះបីជាមានសម្ពាធពីខាងក្រៅក៏ដោយ ក៏យោធាអ៊ុយក្រែននៅតែបន្តធ្វើការវាយប្រហារដោយដ្រូនយ៉ាងជោគជ័យទៅលើរោងចក្រប្រេងធំៗរបស់រុស្ស៊ីកាលពីចុងសប្តាហ៍កន្លងទៅ។ ស្របពេលជាមួយគ្នានេះ គេក៏កំពុងរង់ចាំមើលលទ្ធផលនៃជំនួបជាមួយគណៈប្រតិភូជាន់ខ្ពស់របស់សហរដ្ឋអាមេរិក ដែលនឹងមកដល់ទីក្រុងកៀវ​ក្នុងពេលឆាប់ៗនេះ ដើម្បីជជែកពិភាក្សាអំពីការធានាសុវត្ថិភាព និងគោលដៅការពារជាតិរបស់អ៊ុយក្រែន។

ទន្ទឹម​គ្នា​នេះ​ដែរ លោកប្រធានាធិបតី ហ្សេលេនស្គី ក៏បានទម្លាយព័ត៌មានដ៏គួរ​ឲ្យ​ព្រួយបារម្ភមួយទៀតថា រុស្ស៊ីកំពុងផ្ដល់ព័ត៌មានសម្ងាត់ និងទិន្នន័យពីផ្កាយរណបទៅ​ឲ្យ​ប្រទេសអ៊ីរ៉ង់ ដើម្បីជួយសម្រួលដល់ការវាយប្រហារលើទីតាំងថាមពលរបស់អ៊ីស្រាអែល។ ខណៈដែលមហាអំណាចលោកខាងលិចព្យាយាមទប់តម្លៃប្រេងឲ្យ​មានស្ថិរភាព អ៊ុយក្រែននៅតែប្រកាន់ជំហរថា ការវាយប្រហារលើហេដ្ឋារចនាសម្ព័ន្ធរុស្ស៊ី គឺជាការឆ្លើយតបដ៏ចាំបាច់បំផុត ចំពោះការដែលរុស្ស៊ីតែងតែបាញ់កម្ទេចបណ្ដាញអគ្គិសនីរបស់ខ្លួនស្ទើររាល់ថ្ងៃ៕

ប្រែសម្រួល៖ ឈាង