ព័ត៌មានអន្ដរជាតិ

ត្រឹម៤០ថ្ងៃ អ៊ីស្រាអែលផ្លោងគ្រាប់ដាក់អ៊ីរ៉ង់ជាង ១ម៉ឺនលើក

បានផុស

៣ សប្តាហ៍ មុន

នៅ

ថ្ងៃសៅរ៍ ១១ មេសា ២០២៦

ដោយ

Chheang

កាលពីថ្ងៃសុក្រទី១០ខែមេសាឆ្នាំ២០២៦ កងទ័ពអ៊ីស្រាអែលបានចេញមុខមកទម្លាយពីទំហំនៃការវាយប្រហាររបស់ខ្លួនទៅលើប្រទេសអ៊ីរ៉ង់ អំឡុងពេលផ្ទុះសង្គ្រាមកាលពីចុងខែកុម្ភៈ ដោយអះអាងថា យុទ្ធនាការតាមផ្លូវអាកាសរបស់ខ្លួនមានជាង ១០ ៨០០លើក ក្នុងរយៈពេលប្រហែល៤០ថ្ងៃ។

យោងតាមការចុះផ្សាយនាសៅរ៍នេះរបស់សារព័ត៌មាន TRT World ក្នុងប្រតិបត្តិការដ៏ធំសម្បើមនេះ គេបានបញ្ជូនយន្តហោះចម្បាំងរាប់សិបគ្រឿងឲ្យហោះហើរ និងវាយប្រហារក្នុងពេលតែមួយទៅលើគោលដៅសំខាន់ៗចំនួន ៤ ០០០កន្លែង និងទីតាំងយោធាជិត ៦ ៧០០កន្លែងផ្សេងទៀតនៅលើទឹកដីអ៊ីរ៉ង់។

មិនត្រឹមតែប៉ុណ្ណោះ ភាគីអ៊ីស្រាអែលបានអះអាងថា ពួកគេបានប្រើប្រាស់គ្រាប់បែក និងគ្រឿងផ្ទុះចំនួនជាង ១៨ ០០០គ្រាប់ ដើម្បីផ្លោងគ្រាប់ដាក់គោលដៅទាំងនោះ។ តួលេខនេះបើធៀបនឹងការវាយប្រហារកាលពីខែមិថុនាឆ្នាំមុន គឺច្រើនជាងដល់ទៅជិតប្រាំដងឯណោះ។ ទោះជាយ៉ាងណាក៏ដោយ ព័ត៌មានទាំងនេះគ្រាន់តែជាការអះអាងពីសំណាក់អ៊ីស្រាអែលតែម្ខាងប៉ុណ្ណោះ ហើយក៏មិនទាន់មានប្រភពឯករាជ្យណាមួយអាចបញ្ជាក់ពីភាពត្រឹមត្រូវនៃទិន្នន័យទាំងនេះបាននៅឡើយទេ។

ជម្លោះក្នុងតំបន់នេះ បានកើនកម្ដៅឡើងខ្លាំងចាប់តាំងពីថ្ងៃទី២៨ខែកុម្ភៈមកម្ល៉េះ នៅពេលដែលអាមេរិក និងអ៊ីស្រាអែលបានបើកប្រតិបត្តិការវាយលុកទៅលើអ៊ីរ៉ង់។ ជាការឆ្លើយតបវិញ ទីក្រុងតេហេរ៉ង់ក៏មិននៅស្ងៀមដែរ ដោយបានបញ្ជូនដ្រូន និងមីស៊ីលជាច្រើនគ្រាប់ទៅវាយប្រហារអ៊ីស្រាអែល រួមទាំងប្រទេសហ្ស៊កដានី អ៊ីរ៉ាក់ និងបណ្តាប្រទេសក្នុងតំបន់ឈូងសមុទ្រដែលជាទីតាំងឈរជើងរបស់កងទ័ពអាមេរិក។ ក្រៅពីការវាយប្រហារដោយផ្ទាល់ អ៊ីរ៉ង់ក៏បានដាក់កម្រិតលើការធ្វើដំណើររបស់នាវាចរណ៍តាមច្រកសមុទ្រហ័រមូសផងដែរ ដែលធ្វើឲ្យសភាពការណ៍កាន់តែតានតឹង។

សំណាងល្អដែលជម្លោះដ៏ក្តៅគគុកនេះបានធូរស្រាលខ្លះ បន្ទាប់ពីមានការជួយជ្រោមជ្រែងពីប្រទេសប៉ាគីស្ថាន តួកគី ចិន អារ៉ាប៊ីសាអូឌីត និងអេហ្ស៊ីប ដែលបានចូលរួមចរចារហូតទទួលបានបទឈប់បាញ់បណ្តោះអាសន្នរយៈពេលពីរខែ កាលពីថ្ងៃពុធកន្លងទៅ ក្រោយពីការប្រយុទ្ធគ្នាអូសបន្លាយអស់រយៈពេល៤០ថ្ងៃ៕

ប្រែសម្រួល៖ ឈាង