ព័ត៌មានអន្ដរជាតិ

UN៖ ពលរដ្ឋអ៊ុយក្រែនជាង ១៥ ៨០០នាក់ ស្លាប់ក្រោមស្នាដៃរុស្ស៊ី តាំងពីផ្តើមសង្រ្គាម

បានផុស

២ ខែ មុន

នៅ

ថ្ងៃពុធ ២០ ឧសភា ២០២៦

ដោយ

មកទល់ពេលនេះមានរយៈពេលជាង៤ឆ្នាំ រុស្ស៊ីនិងអ៊ុយក្រែននៅតែបន្តប្រយុទ្ធសងសឹកគ្នាយ៉ាងសាហាវ ដោយការវាយប្រហារដ្រូនរាប់ពាន់គ្រឿងរៀងរាល់សប្តាហ៍ រួមទាំងមីស៊ីល ដោយសម្លាប់មនុស្សជារៀងរាល់ថ្ងៃ ព្រោះកិច្ចចរចាសន្តិភាពរវាងប្រទេសទាំងពីរជាប់គាំង ហើយមហិច្ឆតារបស់រុស្ស៊ីនៅតែបន្តមាន ចំពោះអ៊ុយក្រែន។

អង្គការសហប្រជាជាតិ (UN) បានលើកឡើងថា មនុស្សចំនួន ១៥ ៨៥០នាក់ ក្នុងនោះមានកុមារចំនួន ៧៩១នាក់ ត្រូវបានសម្លាប់នៅក្នុងប្រទេសអ៊ុយក្រែន ចាប់តាំងពីការឈ្លានពានទ្រង់ទ្រាយធំរបស់រុស្ស៊ីក្នុងខែកុម្ភៈ ឆ្នាំ២០២២ ។

លោកស្រី Kayoko Gotoh នាយកផ្នែកកិច្ចការនយោបាយ និងកសាងសន្តិភាព (DPPA) ប្រចាំទ្វីបអឺរ៉ុបនិងអាស៊ីកណ្តាល ប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារថា តួលេខជាក់ស្តែងទំនងជាខ្ពស់ជាងនេះ។

លោកស្រី Kayoko Gotoh នាយកផ្នែកកិច្ចការនយោបាយនិងកសាងសន្តិភាព។ រូបភាព៖ UN

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន Al Jazeera ចុះផ្សាយថ្ងៃទី១៩ ខែឧសភា ឆ្នាំ២០២៦ ការចរចាសន្តិភាពរវាងអ៊ុយក្រែន និងរុស្ស៊ីបានជាប់គាំង។ ប្រធានាធិបតីអាមេរិក លោក ដូណាល់ ត្រាំ បានព្យាយាមសម្របសម្រួល និងប្រកាសពីបទឈប់បាញ់រយៈពេលបីថ្ងៃកាលដើមខែឧសភា ប៉ុន្តែការប្រយុទ្ធគ្នាចាប់ផ្តើមឡើងវិញដោយមានរូបភាពសាហាវជាងមុនទៅទៀត។

គួរបញ្ជាក់ថា ការវាយប្រហាររបស់រុស្ស៊ីលើអ៊ុយក្រែនកាលពីថ្ងៃអង្គារ សម្លាប់មនុស្សយ៉ាងហោចណាស់ ៦នាក់ ។ ទន្ទឹមនឹងនោះ អ៊ុយក្រែនក៏បានវាយប្រហារវិញដោយដ្រូនបំផ្លាញរោងចក្រចម្រាញ់ប្រេងរុស្ស៊ី និងវាយប្រហារចូលដល់ក្រុងមូស្គូទៀតផង។

ក្មេងប្រុសអាយុ ១៥ឆ្នាំម្នាក់ស្ថិតក្នុងចំណោមមនុស្សបីនាក់ដែលបានស្លាប់នៅក្នុងការវាយប្រហារដោយមីស៊ីលបាលីស្ទិករបស់រុស្ស៊ីលើទីក្រុង Pryluky ក្នុងតំបន់ Chernihiv ភាគខាងជើងកណ្តាលអ៊ុយក្រែនកាលពីព្រឹកថ្ងៃអង្គារ នេះបើយោងតាមសេវាសង្គ្រោះបន្ទាន់អ៊ុយក្រែន។

នៅតំបន់ Sumy មនុស្សពីរនាក់ត្រូវបានសម្លាប់ នៅក្នុងការវាយប្រហារមួយ ដោយដ្រូនរបស់រុស្ស៊ីពីរគ្រឿង នៅក្នុងទីក្រុង Hlukhiv ស្រុក Shostka នៅព្រឹកថ្ងៃអង្គារ នេះបើយោងតាមការិយាល័យរដ្ឋអាជ្ញាតំបន់ Sumy លើកឡើងលើបណ្តាញសង្គម Facebook ។

នៅក្នុងការវាយប្រហារពេលល្ងាចក្នុងតំបន់ដដែល មានមនុស្សយ៉ាងហោចណាស់ម្នាក់ត្រូវបានសម្លាប់និងម្នាក់ទៀតរងរបួស។

ការវាយប្រហារជារៀងរាល់ថ្ងៃនេះ បណ្តាលឱ្យមានការសងសឹកគ្នាឥតឈប់ ហើយគ្មានប្រទេសណាមួយអាចបញ្ឈប់សកម្មភាពភាគីទាំងពីរបានទាំងស្រុងនោះទេ រហូតមកទល់ពេលនេះ ព្រោះពិភពលោកបច្ចុប្បន្នកំពុងតាមយកចិត្តទុកដាក់សង្រ្គាមនៅអ៊ីរ៉ង់ ដែលចាប់ផ្តើមដោយសហរដ្ឋអាមេរិកនិងអ៊ីស្រាអែលកាលពីចុងខែកុម្ភៈ ច្រើនជាង៕

សម្រួល៖ ណឺ មិនា