អាមេរិក បើកផ្លូវចរចារឿងនុយក្លេអ៊ែរ លុះត្រាតែអ៊ីរ៉ង់ព្រមបើកច្រកសមុទ្រ ហ័រមូស មុនសិន

រដ្ឋមន្ត្រីការបរទេស​អាមេរិក លោក ម៉ាកូ រូប៊ីយ៉ូ (Marco Rubio) បានថ្លែងថា ទីក្រុងវ៉ាស៊ីនតោន ត្រៀមខ្លួនរួចជាស្រេច ក្នុងការចូលរួម «កិច្ចចរចាយ៉ាងហ្មត់​ចត់បំផុត» ជុំវិញកម្មវិធីនុយក្លេអ៊ែររបស់អ៊ីរ៉ង់ ប៉ុន្តែមានលក្ខខណ្ឌមួយ គឺប្រទេសអ៊ីរ៉ង់ត្រូវតែបើកច្រកសមុទ្រយុទ្ធសាស្ត្រ ហ័រមូស (Hormuz) ឡើងវិញជាបន្ទាន់។

យោងតាមការចុះផ្សាយរបស់កាសែត The New York Times នា​ថ្ងៃទី​២៥ ខែ​ឧសភា ឆ្នាំ​២០២៦ ការលើកឡើងនេះ បានបង្ហាញសញ្ញាថា អាមេរិកអាចនឹងងាកមកប្រើប្រាស់យុទ្ធសាស្ត្រចរចាជាជំហានៗ ដោយព្រមទទួលយកកិច្ចព្រមព្រៀងបណ្ដោះអាសន្នមួយជាមុនសិន សូម្បីតែកិច្ចព្រមព្រៀងនោះ មិនទាន់បានដោះស្រាយបញ្ហានុយក្លេអ៊ែរទាំងស្រុងភ្លាមៗក៏ដោយ។

នៅក្នុងកិច្ចសម្ភាសន៍ខ្លីមួយអំឡុងពេលធ្វើទស្សនកិច្ចនៅទីក្រុងញូវដេលី ប្រទេសឥណ្ឌា លោក រូប៊ីយ៉ូ បានបញ្ជាក់យ៉ាងច្បាស់ថា រឿងរ៉ាវនុយក្លេអ៊ែរដ៏ស្មុគស្មាញបែបនេះ មិនមែនអាចជជែកគ្នាកាត់ៗត្រឹមពេល ៧២ម៉ោង​នោះឡើយ។ លោកបានបន្ថែមថា អ៊ីរ៉ង់ត្រូវតែបើកច្រកសមុទ្រហ័រមូស​ភ្លាម បន្ទាប់មកភាគីទាំងសងខាង នឹងចាប់ផ្តើមជជែកគ្នាយ៉ាងហ្មត់​ចត់ ទៅលើលក្ខខណ្ឌដែលបានព្រមព្រៀង រាប់ចាប់តាំងពីរឿងការចម្រាញ់សារធាតុអ៊ុយរ៉ាញ៉ូមកម្រិតខ្ពស់ រហូតដល់ការសន្យារបស់អ៊ីរ៉ង់ថា នឹងមិនបង្កើតអាវុធនុយក្លេអ៊ែរដាច់ខាត។ យ៉ាង​ណាមិញ លោកទទួលស្គាល់ថា បញ្ហាបច្ចេកទេសទាំងនេះ ត្រូវចំណាយពេលខ្លះ ដើម្បីដោះស្រាយ ប៉ុន្តែវាក៏មិនត្រូវអូសបន្លាយរាប់ឆ្នាំនោះដែរ។

ទន្ទឹមនឹងការបើកផ្លូវចរចានេះ លោក រូប៊ីយ៉ូ ក៏បានព្រមានខ្លាំងៗផងដែរថា សហរដ្ឋអាមេរិក អាចនឹងលើកយកការគំរាមកំហែងខាងយោធាមកប្រើប្រាស់វិញ ប្រសិនបើការចរចានោះ មិនទទួលបានលទ្ធផលផ្លែផ្កាអ្វីសោះ ក្នុងរយៈពេល ២ខែ។ លោក រូប៊ីយ៉ូ បានសង្កត់ធ្ងន់ថា យុទ្ធសាស្ត្រចរចានេះ ត្រូវតែផ្តល់លទ្ធផល ដូចអ្វីដែលអាមេរិកចង់បាន បើមិនដូច្នោះទេ ក្នុងរយៈពេល ៦០ ថ្ងៃខាងមុខ ប្រធានាធិបតី ដូណាល់ ត្រាំ នៅតែមានសិទ្ធិពេញលេញ ក្នុងការប្រើប្រាស់រាល់ជម្រើសទាំងអស់ដែលមានក្នុងដៃ រួមទាំងការវាយប្រហារយោធាផងដែរ។

រហូតមកដល់ពេលនេះ ទាំងខាងសហរដ្ឋអាមេរិក និងអ៊ីរ៉ង់ មិនទាន់បានបញ្ចេញព័ត៌មានលម្អិតជាសាធារណៈអំពីកិច្ចការនេះនៅឡើយទេ។ ជាមួយគ្នានោះដែរ អ្នករិះគន់ជាច្រើន បានសម្តែងការព្រួយបារម្ភ និងលើកឡើងថា ការធ្វើកិច្ចព្រមព្រៀងជាជំហានៗបែបនេះ អាចនឹងធ្វើឱ្យប្រធានាធិបតី ដូណាល់ ត្រាំ បាត់បង់ប្រៀប និងអំណាច ក្នុងការដាក់សម្ពាធលើអ៊ីរ៉ង់ សម្រាប់ការចរចានៅវគ្គបន្តបន្ទាប់ទៀត៕

ប្រែសម្រួល៖ ឈាង