អាសូរគ្រួសារហ្គាហ្សា​​ភ័យខ្លាចពេកមកដេកជុំគ្នារងការទម្លាក់គ្រាប់បែកពីអ៉ីស្រាអែល​
Connect with us
Helistar Cambodia - Helicopter Charter Services

ព័ត៌មានអន្ដរជាតិ

អាសូរគ្រួសារហ្គាហ្សា​​ភ័យខ្លាចពេកមកដេកជុំគ្នារងការទម្លាក់គ្រាប់បែកពីអ៉ីស្រាអែល​

បានផុស

នៅ

គ្រួសាររបស់​ស្រី​អ្នក​សារព័ត៌មាន​អាយុ​៣០​ឆ្នាំ Reema Saad បាន​ប្រមូល​ផ្តុំ​គ្នា​ដេក​ក្នុង​បន្ទប់​តែ​​មួយ​កាល​ពី​​យប់​ថ្ងៃ​​​ពុធ​ដើម្បី​ផ្តល់​ភាព​កក់​ក្តៅ​ដល់​​​គ្នា​ទៅ​វិញ​ទៅ​មក នៅ​ពេល​ដែល​ប្រទេស​អ៉ីស្រាអែល​​បាន​វាយ​ប្រហារ​ទម្លាក់​គ្រាប់​បែក​នៅ​តំបន់​ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រាត្រី​នោះ​ជា​ពិធី​បុណ្យ​ Eid al-Fitr ដែល​ប្រជា​ជន​ឥស្លាម​​​រៀប​ចំពិធី​​​ការ​បញ្ចប់​តម​អាហារ​រយៈ​ពេល​មួយ​ខែ​តាំង​ពី​ព្រលឹម​រហូតដល់​ព្រលប់។

តាំង​ពី​ដើម​សប្តាហ៍​នេះ ផ្ទៃ​អាកាស​ខាង​លើ​តំបន់​ហ្គាហ្សា​ពោរពេញ​ដោយ​ផ្សែង និង​អណ្តាត​ភ្លើង​ខ្មួល​ខ្មាញ់​ពី​ការ​បំផ្ទុះ​គ្រាប់​បែក និង​​អគ្គីភ័យ។ ចាប់​តាំង​ពីធីបុណ្យ​ Eid បាន​ចាប់​ផ្តើម​ឡើង​កាល​ពី​រាត្រី​ថ្ងៃ​ពុធ​មក ការ​វាយ​ប្រហារ​បាន​កើត​មាន​រហូត។

យោង​តាម​បណ្តាញ​ទំនាក់​ទំនង​សង្គម​បង្ហាញ​ថា ប្រជា​ពល​រដ្ឋ​ហ្គាហ្សាបាន​ឲ្យ​សាច់ញាតិ ក្រុម​គ្រួសារ និង​មិត្ត​ភក្តិ​នៅ​ក្រៅ​ប្រទេស​ផ្ញើ​សារ​ជូន​ពរ​គ្នា​ទៅ​វិញ​ទៅ​មក​ក្នុង​ពិធី​ស្វាគមន៍​បុណ្យ​ Eid និង​​លា​គ្នា មុន​ពេល​ភាព​រន្ធត់​តក់​ស្លត់​បាន​កើត​មាន​ឡើង។

ក្នុង​នោះ​​អ្នក​កាសែតស្រី​​ Reema Saad កូន​ប្រុស​ កូន​ស្រី ​បាន​ស្លាប់ ហើយ​ប្តី​របួស​ធ្ងន់។

ពួក​គេ​ស្ថិត​ក្នុង​ចំណោម​ពលរដ្ឋ​ប៉ាឡេស្ទីន​​១២៦​នាក់​ដែល​ត្រូវ​បាន​សម្លាប់​ដោយ​យុទ្ធនាការណ៍​ទម្លាក់​គ្រាប់​បែក​របស់​អ៉ីស្រាអែល ដែល​អាជ្ញាធរ​និយាយ​ថា គោល​ដៅ​លើ​សកម្ម​ប្រយុទ្ធដែល​មាន​មូលដ្ឋាន​នៅ​ហ្គាហ្សា។ ការ​វាយ​ប្រហារ​បាន​ចាប់​ផ្តើម​កាល​ពី​ល្ងាច​ថ្ងៃ​ចន្ទ។

ប្អូន​ប្រុស​របស់ Reema ឈ្មោះ Ahmad Saad អាយុ​២៧​ឆ្នាំ​បាន​រៀប​រាប់​ថា ៖«ការ​​ទម្លាក់​គ្រាប់​បែក​បានចំ​​ទៅ​លើ​បន្ទប់​ដេក​របស់​បង​ស្រី Reema ប្តី​របស់​គាត់ និង​កូន​ៗ​ដែល​កំពុង​ដេក​យ៉ាង​ធ្ងន់​ធ្ងរ។ បន្ទាប់​ពី​បាន​ព្យាយាម​​រើ​កកាយជា​ច្រើន​​ម៉ោង​​ដើម្បី​ឲ្យ​ប្រាកដ​ថា ពួក​គាត់​អាច​មាន​ជីវិត តែ​យើង​បាន​ត្រឹម​ទាញ​យក​សពបង​ស្រី កូនប្រុស​អាយុ​២ឆ្នាំ​​​ តែ​យើង​នៅ​មិន​ទាន់​រក​ឃើញ​សព​កូន​ស្រី​របស់​គាត់​ទេ»។

ចំណែក​ប្តី​របស់​គាត់​របួស​ធ្ងន់ ហើយ​ Reema Saad ថែម​ទាំង​កំពុង​មាន​ផ្ទៃ​ពោះ​៤​ខែ។

តំបន់ហ្គាហ្សាបាន​កំពុង​ស្ថិត​នៅ​ក្រោម​ការ​វាយ​ប្រហារ​កាំភ្លើង​ធំ​នៅ​ព្រឹក​ងថ្ងៃ​សុក្រ​ពី​កម្លាំង​អ៉ីស្រាអែល។

មន្ត្រី​អង្គការ​សហ​ប្រជា​ជាតិ​នៅ​ហ្គាហ្សា​បាន​និយាយ​ថា ប្រជា​ជន​ប៉ាឡេស្ទីន​រាប់​ពាន់​​នាក់​បាន​ភៀស​ខ្លួន​ពី​ផ្ទះ​សម្បែង​របស់​ពួក​គេ​នៅ​ភាគ​ខាង​ជើង​ហ្គាហ្សា និង​នៅ​ភាគ​ខាង​កើត​បាន​ព្យាយាម​ស្វែង​រក​កន្លែងច្រកកោន​នៅ​តាម​សាលា​រៀន ដែល​ជា​កម្មសិទ្ធិ​របស់​ទីភ្នាក់​ងារ​សង្គ្រោះ​អង្គការ​សហ​ប្រជា​ជាតិ​សម្រាប់​ជន​ភៀស​ខ្លួន​ប៉ាឡេស្ទីន (UNRWA) ដែល​ត្រូវ​បាន​រៀប​ចំ​ឡើង​ដើម្បី​ជា​ជម្រក​អាសន្ន។

ការ​ប៉ះ​ទង្គិច​គ្នា​ដោយ​ហិង្សា​រវាង​កម្លាំង​​យោធា​អ៉ីស្រាអែល​ និង​ប៉ាឡេស្ទីន​​បាន​រាល​ដាល​​​ដល់​​តំបន់ជា​ច្រើន​នៅ វេសប៊ែង​ បន្ទាប់​ពី​ប៉ុនា្មន​ថ្ងៃ​វាយ​ប្រហារ​ខ្លាំង​នៅ​តំបន់​ហ្គាហ្សា​។ យ៉ាង​ហោច​ណាស់​ជន​ជាតិ​ប៉ាឡេស្ទីន​១០​នាក់​ត្រូវ​បានរាយការណ៍​ថា​ បាន​ស្លាប់​នៅ​តំបន់ វេសប៊ែង និង​រាប់​រយ​នាក់​បាន​របួស។

ហោច​ណាស់​​មនុស្ស​១២៦​នាក់​ត្រូវ​បាន​សម្លាប់​នៅ​ហ្គាហ្សា និង​៨​នាក់​បាន​ស្លាប់​នៅ​អ៉ីស្រាអែល​ ចាប់​តាំង​ពី​ការ​ប្រយុទ្ធ​គ្នា​បានចាប់​ផ្តើម​ផ្ទុះ​ឡើង។ ក្រសួង​សុខាភិបាលហ្គាហ្សា​បាន​និយាយ​ថា កុមារ​​៣១​នាក់ស្ថិត​ក្នុង​ចំណោម​ជន​រង​គ្រោះ​ទាំង​អស់​ដែល​បាន​បាត់​បង់​ជីវិត និង​ជន​ស៊ីវិល​ជា​ច្រើន​បាន​ស្លាប់។ ជន​ជាតិ​ហ្គាហ្សា​៩៥០​នាក់​ក៏​បាន​របួស។ ប្រទេស​អ៉ីស្រាអែល​បាន​​និយាយ​ថា មនុស្ស​ជា​ច្រើន​នាក់​ដែល​ត្រូវ​បាន​សម្លាប់​នៅ​ហ្គាហ្សា​គឺ​ជា​សកម្ម​ប្រយុទ្ធ ហើយ​​ការ​​ស្លាប់​មួយ​ចំនួន​ដោយ​សារ​បាញ់​គ្រាប់​រ៉ុក្កែត​បាញ់​ខុស​គោល​ដៅ​ចេញ​ពី​ហ្គាហ្សា៕

ប្រែ​សម្រួល៖ វីរបុត្រ
ប្រភព៖ CNN

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម

Helistar Cambodia - Helicopter Charter Services